Tɔɔɓɛlaa veelɛ 13 - Yálá laawoo hɛɓɛ (dc)

Yoakazə Israɛlə tɔɔmun

¹ Ɉuda tɔɔmun Ɉoasə, Akaziasə lon, nwɔ tɔɔlaa gwɛlan bow hveelɛ kɔ́w haaɓa lɔwai ɓə Ɉehu lon Yoakazə ə tɔɔlaa hɔlɔɓo la Israɛlə lɔi nwun na Samari. Ə kwɛlan bow kɔ́w mɛ̨ihveelɛ kɛ dɔɔlaa hu.

² Yoakazə ə túwɔ́ kpɔ a ɲɔ̨nwɔ̨ɔ̨ Yai-Laa ɲɛ̨i ɓa, nɛ̨ŋɛ̨n Nevatə lon Ɉeroboamə ə Israɛlə nuą yee lɔ ɉu, yaa kpɛli ə hvilɛn yili pulu yɛ gɛ.

³ Yai-Laa lii ə holi Israɛlə nuą pɔ, ə di lɔ Aramə tɔɔmun Hazaɛlə yee mu a yələ kəlee, ə mą kɛ Hazaɛlə lon Bɛn-Hadadə yee mu.

⁴ Kɛlaa, Yoakazə ə wɔlɔ Yai-Laa ɓa, Yai-Laa ə nwoo mu hon. Mąąhɔlɔɓo, Israɛlə ə kɛi mɔ̨nɔ̨ mįi, ɛlɛɛ, heei ŋɛ̨i Aramə nuą di mo di mɛ̨i, Yai-Laa ə yili nąą kaa.

⁵ Yai-Laa ə nu tɛɛ Israɛlə nuą pɔ, yii ə di nwun mąąɓo. Israɛlə nuą di kulɔ Aramə nuą yee mu, nu kəlee ə hee ɲəi bɛlɛ́n yɛ bələ ə kɛ la a tɔlɔɔ tɔlɔɔ yələ.

⁶ Kɛlaa, ə mą kɛ tii, nɛ̨ŋɛ̨nŋaai Ɉeroboamə nwɔ pɛ́lɛ́i ə Israɛlə yee lɔ ɉu, Israɛlə nuą di hvo gɛ, di hvo di yee kulɔ ɉu; ə mą kɛ nwului di kɛi gɔ́, ə lɛɛ tɔɔni Samari.

⁷ Nuą lɔ lɛɛ Yoakazə yəi a kɔ́ kɔ́ nuą, di kɛ a hoo mɛ̨i nuą, nu pow lɔɔli, kɔ́ wotolo pow, ɛlɛɛ, kɔ́kuláá waa pow. Aramə tɔɔmun aa kɛ gbəliɠaa tii kəlee paa, ə kɛi hiɛ di hu yɛ nu aa kɛi hiɛ muluun gbala hu.

⁸ Yoakazə kɛ mɛ̨nį gbəliɠaa, da mɛ̨nįɠaai kpɔ ə gɛ, gəlee di hvo mɔ̨ɔ̨ pɛ̨ɛ̨ li Israɛlə tɔɔɓɛlaa kɛ mɛ̨nį hɛɓɛ́ hu?

⁹ Yoakazə ə laa nąnni kwɛlɛ, di bowa loo Samari; non Ɉoasə ə hee dɔɔlaa hu a nąn mąąhvalin.

Ɉoasə Israɛlə tɔɔmun

¹⁰ Ɉuda tɔɔmun Ɉoasə nwɔ tɔɔlaa gwɛlan bow kɔ́w mɛ̨ihveelɛ lɔwai, Yoakazə lon Ɉoasə ə tɔɔlaa hɔlɔɓo Israɛlə lɔi hu Samari, ə dɔɔlaa kɛ a kwɛlan bow kɔ́w mɛ̨ida.

¹¹ Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa. Nɛ̨ŋɛ̨n Nevatə lon Ɉeroboamə ə Israɛlə nuą yee lɔ ɉu, hvo həɠə dai lɔpee pulu, ə kanąn diɛ.

¹² Ɉoasə kɛ mɛ̨nį gbəliɠaa, mɛ̨nįɠaa kpɔ ə gɛ, gɔɠaai da Ɉuda tɔɔmun Amasiasə di gɔ́, kɛlɛi gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-ee?

¹³ Ɉoasə ə laa nąnni kwɛlɛ, Ɉeroboamə ə hee dɔɔlaa hu, di Ɉoasə loo Samari daai Israɛlə tɔɔɓɛlaa kámą hu.

Elise nwɔ ɲɔ̨n gɛ mɛ̨nį da ɉaa mɛ̨nį, kwɛlɛɛn mɛ̨nį hveelɛ ə kɛ ɉaa pulu

¹⁴ Elise ə too a ɲɔ̨n, ɲɔ̨n tii ɓə ə lɛɛi ɉu. Israɛlə tɔɔmun Ɉoasə ə li bɔɔli, ə ɲɛ̨ilai pɛlɛ Elise ɲɛ̨ilai, yɛ wɔlɔ, yɛ kɛ Elise ɓa: «Ną́n! Ną́n! A Israɛlə nwɔ huwalawala da nwɔ hoo mɛ̨imun!»

¹⁵ Elise yɛ mą: «'Ə́ nwɔ kilɛn ɉəɠə, ə́ bɛlɛ mɛ̨ɛ̨kɔwɠaa diɛ.» Ɉoasə ə gilɛn ɉəɠə ə bɛlɛ mɛ̨ɛ̨kɔwɠaa diɛ.

¹⁶ Elise yɛ Israɛlə tɔɔmun mą: «Gilɛn ɲala ɉu!» Yili ə gilɛn ɲala ɉu, Elise ə ɲee pɛlɛ tɔɔmun ɲee ɓa,

¹⁷ yɛ nwɔ̨nɔ̨ mą: «Bɛlɛ́ vinnai tii voló həɠəi pələ, naa ɓo!» Ɉoasə ə naa ɓo. Elise yɛ mą: «'Gilɛn bili!» Yili ə mɛ̨ɛ̨kɔw pili. Elise yɛ mą: «Yai-Laa nwɔ kilɛn a kɔ́ nɛ̨ɛ̨i mą, ya ka tii, mɛ̨ɛ̨kɔwi ɓə a kɔ́ nɛ̨ɛ̨ yɛ́ Aramə mɛ̨i. Ə́ yee kaa pai tɛɛi Aramə ɓa Afɛkə, ə́ di paa ə́ dɛɛ ɲɛ̨n ma.»

¹⁸ Elise yɛ Ɉoasə ɓa: «Mɛ̨ɛ̨kɔwɠaa həɠə!» Yili ə mɛ̨ɛ̨kɔwɠaa həɠə. Elise yɛ Israɛlə tɔɔmun mą: «Nɔi ɓon!» Israɛlə tɔɔmun ə nɔi ɓon gee mɛ̨i haaɓa, ə kpəla ə tɔɔ.

¹⁹ Nąąlɔwai, Yálá nwɔ nui ə níiholi Israɛlə tɔɔmun bɔ, yɛ mą: «Akɛ kɛ, ə́ nɔi ɓɔn gee mɛ̨i lɔɔli, a wala kɛ tii, mɛ̨ida; ə́ yee ə li tɛɛ Aramə ɓa kpɔ ə tɛɛ ɲɛ̨n ma, kɛlaa, ə́ yee kaa pai tɛɛi lɔ Aramə ɓa gee mɛ̨i haaɓa.»

²⁰ Elise ə laa ɲee tɔ̨nɔ̨ mɛ̨i, di gɔ́ a nɔi. Gwɛlan ə tínɛ̨n ə həli, toomɛ̨i kɛ nuą di kɛi həɠə Moabə lɔi hu, diɛ lɔ Israɛlə.

²¹ Yələ ta, nuą di kɛi li nu ta looi, nąąlɔwai, di doomɛ̨i kɛ nuą kpulu tii ta kaa laa, di nui tii lɔ a mąąhulaa Elise kámą hu, di tɛɛ diɛ li. Nu powai tii ə hee lɔ Elise kɔ́wɠaa diɛ, ə pənə ə kɛ a vulú, ɛlɛɛ, ə mu həɠə ə tɔɔ.

Ɉoasə ə pənə ə taa tamąą kulɔ Aramə nuą yəi

²² Aramə tɔɔmun Hazaɛlə ə hee Israɛlə nuą mɛ̨i Yoakazə nwɔ yɛnɛ̨ɛ̨ kəlee hu.

²³ Kɛlaa, Yai-Laa ə Israɛlə nuą ɲɛ̨imąąwɛli kaa, ə ɲɛ̨i lɛlɛɛ hee diɛ, mįnɛ̨ da Abrahamə, Isaakə, Ɉakɔbə ni di ɉəɠə mąą mɛ̨nį ɓa; hvo kɛ bɔ di huwu hvo kpɛɛ, hvo di pili ɲɛ̨ipulu.

²⁴ Aramə tɔɔmun Hazaɛlə ə haa, non Bɛn-Hadadə ə hee a mąąhvalin

²⁵ Daaɠaai Hazaɛlə ə di hon Yoakazə yəi kɔ́ hu, Ɉoasə ə di kulɔ Hazaɛlə lon Bɛn-Hadadə yəi. Ɉoasə yee ə tɛɛ Bɛn-Hadadə ɓa gee mɛ̨i haaɓa. Ə pənə ə Israɛlə taaɠaa kulɔ ɲəi.