Tɔɔɓɛlaa veelɛ 12 - Yálá laawoo hɛɓɛ (dc)

Ɉoasə Ɉuda tɔɔmun

¹ Ɉoasə kaa kwɛlan ə kɛ mɛ̨ihveelɛ, yɛ dɔɔlaa hɔlɔɓo.

² Ɉehu nwɔ tɔɔlaa gwɛlan mɛ̨ihveelɛ lɔwai ɓə Ɉoasə ə dɔɔlaa hɔlɔɓo la. Ɉoasə ə kwɛlan bow nąąn gɛ dɔɔlaa hu Ɉerusalɛmə. Nee ɓaa kɛ a Sivia yai a Beɛrə-Seva mun.

³ Ɉoasə ə túwɔ́ a ɉaŋąą Yai-Laa ɲɛ̨i ɓa nwɔ yɛnɛ̨ɛ̨ kəlee yee mu. Mąąhɔlɔɓo, ɉaláá laa həli mun Yohoyada ɓə kɛi ɉutɔɔ.

⁴ Kɛlaa, ə mą kɛ tii, hvo ɉali kɔ́iɠaa taɠa, nuą di kɛi lɔ haláá kulɔ ɲeeɠaa ɓa, diɛ hɛn lansan kələn gɛɛnąąɠaa tii ɓa.

Ɉoasə ə Yálá hee pɛlɛ́ pɛli a ninɛ̨

⁵ Ɉoasə ə ɉaláá laa həli nuą təli yɛ diɛ: «Nwalii kpɔ da paa la Yai-Laa yəi bɛlɛ́n a Yálá kɔ́ hɛn, da nįįhɔ̨nwɔ̨i nu tɛitɛi ə kɛi gulɔ yɛ bələi ɲee pɛli mąą mɛ̨nį kaa la, nwalii kpɔ nwɔ̨nɔ̨ nu tɛitɛi a paa la Yai-Laa yəi bɛlɛ́n a naa gwəi mɛ̨inɛ̨ɛ̨,

⁶ ɉaláá laa həli nuą da ɉəɠə a di wɔɔ, di kɔ́lɔn mun ɲəi, kɛlaa, ɓɛi lɔpee Yai-Laa nwɔ pɛ́lɛ́i aa kala laa, da nąą pɛli.»

⁷ Kɛlaa, Ɉoasə nwɔ tɔɔlaa gwɛlan bow hveelɛ kɔ́w haaɓa lɔwai, ɉaláá laa həli nuą di hvo ni kɛ Yai-Laa nwɔ pɛlɛ́i nąą ta pɛlii.

⁸ Tɔɔmun Ɉoasə ə ɉaláá la həli mun Yohoyada təli, da ɉaláá laa həli nuą takpɛliɠaa, yɛ diɛ: «Lə ɓə kɛ yai, ɓɛɠaa bɛlɛ́ kalaa laa, ka hvo nąąɠaa pɛlii? Ə həɠə yiihu ɓa, ka hvo kɛa wali hon ka kɔ́lɔn nuą yəi, mąąhɔlɔɓo, mąąnɛ̨ɛ̨ kɛ ka ɉon bɛlɛ́ pɛli mɛ̨nį ɓa.»

⁹ Ɉaláá la həli nuą di hvaa mą, di hvo kɛa kɛi wali hon nuą yəi, ɛlɛɛ, bɛlɛ́ pɛli mɛ̨nį hvo kɛa kɛ di nwuɔ̨.

¹⁰ Ɉaláá laa həli mun Yohoyada ə kəhi ta həɠə, ə nwolo ɓɔ naawulun mɛ̨i, ə ɉee ɉaláá kulɔ taɓali kwɛlɛ, nu a kɛi lɔ Yai-Laa yəi bɛlɛ́n, ɓa-mįi-yee hu pələ. Ɉaláá laa həli nuąi kɛi di ɲɛ̨i kɛ bɛlɛ́ laaləi, walii kpɔ di kɛi paa la Yai-Laa yəi bɛlɛ́n, di kɛi doo gəhii tii hu.

¹¹ Da ga lɔ kɛ diɛ nwali aa kɛnɛ̨ gəhi hu, tɔɔmun nwɔ hɛɓɛ́ kɛmun da ɉaláá laa həli nuą di nwun nąmu, di kɛi pa, diɛ Yai-Laa yəi bɛlɛ́n nwalii tii həɠə diɛ nonon.

¹² Da kpɛɛ a nwali lonɔɔ, da dɛɛ nuąi kɛ góló mɛ̨nį nwun na di pɔ, da nuąi kɛ Yai-Laa nwɔ pɛ́lɛ́i nwun na. Di kɛi nwalii tii kɛ a bɛlɛ́ mɛ̨i kɛ nuą da nuąi kɛi kóló kɛ Yai-Laa nwɔ pɛ́lɛ́i ɓa di hala.

¹³ Nwalii tii ɓə, bɛlɛ́ tɔɔ nuą, da gwɛni mąą haɠa nuą di kɛi nwuluɠaa da gwɛniɠaa ya la; ɓɛɠaai Yai-Laa nwɔ pɛ́lɛ́i aa kɛ kala laa, nąąɠaa pɛli mɛ̨nį ɓa, Yai-Laa nwɔ pɛ́lɛ́i góló kɛ mɛ̨nį kəlee hu.

¹⁴ Kɛlaa, nwaliɠaai tii di kɛi paa la Yai-Laa yəi bɛlɛ́n, di hvo wali gəgən bɛli a da, ə mą kɛ ɓɔwa, ə mą kɛ túlú, ə mą kɛ tea kpɛa kpɛaa. Di hvo hɛn nɔpee ta pɛli a wali, a wala kɛ tii hɛni, yii a kɛ a Yai-Laa yəi bɛlɛ́n ɉɛnɲąŋą ta.

¹⁵ Di kɛi nwaliɠaa tii tɛɛ góló nwun nąmįną pɔ, yiliɠaa diɛ nɔ Yai-Laa nwɔ pɛ́lɛ́i pɛli mɛ̨nį hu.

¹⁶ Nuąi di kɛi nwaliɠaa tɛɛ di pɔ, góló kɛ nuą hvɛla kulɔ mɛ̨nį ɓa, di hvo kɛi di mąąni kɛ nwali mɛ̨nį hu, mąąhɔlɔɓo, di kɛi ɉon a nɛlɛɛ.

¹⁷ Nu pɔɔɲą pɛli waliɠaa, da nɛ̨ŋɛ̨n ɉaláá kulɔ waliɠaa, di hvo kɛi lɔ Yai-Laa nwɔ pɛ́lɛ́i pɛli mɛ̨nį hu; ɉaláá laa həli nuą di wɔɔ li kɛ.

Ɉoasə nwɔ tɔɔlaa laa kulɔ pələ

¹⁸ Nąąlɔwai Aramə tɔɔmun Hazaɛlə ə pa ə kɔ́ pɛlɛ Gatə ɓa, ə ɉon. Hazaɛlə ə kɛi gbɔwɔ pɛli, kɔ́ too mɛ̨nį ɓa Ɉerusalɛmə ɓa.

¹⁹ Ɉuda tɔɔmun Ɉoasə ə ɉɛn gɔwɠaai kɛ Yai-Laa yəi bɛlɛ́n gəlee həɠə, yai kɛ Ɉosafatə, Yoramə, da Akaziasə, diɛi kɛ a galani a Ɉuda tɔɔɓɛlaa, ə mą kɛ yaa kpinįi tii, yii kɛ daa Yálá kɔ́ la, ə mą kɛ ɉɛni yii kɛ ɲəi bɛlɛ́n, dɔɔ pɛlɛ́ mu, ə gəlee tɛɛ Aramə tɔɔmun Hazaɛlə ɓa; yili hvo kɛa pa Ɉerusalɛmə a kɔ́.

²⁰ Ɉoasə kɛ mɛ̨nį gbəliɠaa, da mɛ̨nįɠaa kpɔ ə gɛ, kɛlɛi gəlee pɛ̨ɛ̨ Ɉuda tɔɔɓɛlaa kɛ mɛ̨nį hɛɓɛ́ hu-ee?

²¹ Ɉoasə yee pɔ nuą di di muhəɠə, di lɔgilii kɛ mą, di tɔɔ na, di Ɉoasə paa Bɛtə-Milo, ɓɛlɔwai ə kɛi li la Sila pələ.

²² Simeatə lon Yozavadə, da Somerə lon Yehozavadə ni ɓə mɛ̨nįi tii kɛ. Di ɓɔwa pu Ɉoasə ɓa, ə haa. Di bowa loo nąnni kámą hu Davidə taa. Non Amasiasə ə hee dɔɔlaa hu a nąn mahvalən.