Kɔlɔnikɔ Veerɛi 15 - Yálá laawoo hɛɓɛ (dc)

Asa ə kalan mɛ̨nį ɲɛ̨i kulɔ

¹ Yálá nwɔ Kilii ə kɛ Odɛdə lon Azariahu yəi.

² Azariahu ə kulɔ yɛ li Asa laakwiɛn, yɛ mą: «'Ka ká wəli tɔɔ mą́ą́, Asa, Ɉuda da Bɛnɉamɛn ka kəlee! Yai-Laa ə kɛ ka pɔ, 'ka lɛɛ bulu! 'Ka gwɛlii, a gbɔwɔ lɛɛ laa kaa gaa! Kɛlaa, ka həɠə bului, a kulɔ ka pulu.

³ Israɛlə ə lamun, Yálá kpɔ-kpɔ hvo kɛ ɲəi, haláá laa həli mun və kɛ laa yɛ nuą mąąkwɛli, tɔ́n və kɛ laa.

⁴ Kɛlaa, di kɛɛ mąąwɛli mɛ̨nį hui, di pənə di pa Yai-Laa Israɛlə nwɔ pɔ, di ɲɛ̨ilaa kwɛli, ɛlɛɛ, ə gbɔwɔ lɛɛ laa di gaa.

⁵ Nąąlɔwai tii, nuąi kɛi li diɛ pa, di wəli pulu hvo kɛ laɠi li, kɛlaa yaamun, nɔi nuą kəlee di kɛi ɲɔw.

⁶ Di kɛi kɔ́, lɔi yɛ pɛlɛ lɔi ɓa, taa yɛ pɛlɛ taa ɓa. Gbala ə tɔɔ, Yálá ə di nwun ɉee gee ɓa a mɔ̨nɔ̨ huwu kəlee.

⁷ Kɛlaa, ka wɛi, 'ka ká huwalawala, ka yee hu hvo haa, ka koló hvɛla kaa pai hɔlɔɓoi!»

⁸ Nwooɠaa tii mąn Asa ə mo, da Yálá nwɔ wəlɛɛ tii gwəi mɛ̨nį hukulɔ mun Odɛdə ə mo, yili ə Asa hvaŋąlɔ; ɉali mɛ̨nįɠaai kpɔ kɛ Ɉuda lɔi da Bɛnɉamɛn lɔi hu, ə gəlee kulɔ laa, ə mą kɛ daaɠaa tii ə di hon Ɛfraimə yee hu. Yai-Laa kɔ́i ŋɛ̨i kɛ Yai-Laa nwɔ gala laaləi, ə bu nįnɛ̨ kɔ́lɔi.

⁹ Asa ə Ɉuda nuą da Bɛnɉamɛn nuą kəlee ɲąąkpɔn, da nuą tii pu Ɛfraimə lɔi hu, Manase lɔi da Simeɔn lɔi hu, diɛ di mąąkilɛ. Gbala ə tɔɔ, gaai nuą di mo, diɛ kɛ Yai-Laa nwɔ Yálái tɔɔi bulu, Israɛlə nuą di pa bɔ a di kpulu kɛnɛ̨.

¹⁰ Di di ɲąąkpɔn Ɉerusalɛmə, a Asa nwɔ tɔɔlaa gwɛlan bow kɔ́w lɔɔli ɲąnįn ɉaaɓa yələ.

¹¹ Ɉɛnŋąą tii di həɠə la gɔ́ ɓa, di nįŋɛ̨ nwun mɛ̨ihveelɛ, da taatɛlɛɛ pɛlɛɛ waa mɛ̨ihveelɛ kulɔ a haláá Yai-Laa ɓa.

¹² D mįnɛ̨ həɠə, diɛ di kaa pai lɛɛi Yai-Laa di nąnni di wɔɔ Yálái pulu, di kwəi tɔ̨nɔ̨ mɛ̨i da di lii kəlee.

¹³ Ɛlɛɛ, nuąi lɔpee hvo pai gɛi hvo hvilɛn Yai-Laa Israɛlə nwɔ Yálái pului, da baa; ə kɛ a nu kɛnɛ̨, ə kɛ a lokolo. Ə kɛ a nɛ̨ɛ̨nu, ə kɛ a hulɔnu.

¹⁴ Di di woo kwɛlɛ Yai-Laa ɓa a di woo kɛnɛ̨ɛ̨, diɛ tulu hvɛɛ da nįŋɛ̨ mįnɛ̨ɠaa.

¹⁵ Ɉuda nuą kəlee kwəi ə nɛ̨ɛ̨, di kwɛla mɛ̨nįi tii hu. Di kwɛlai di mo di kwəi tɔ̨nɔ̨ mɛ̨i, diɛ pa lɛɛi la Yai-Laa pulu a di kwəi kwəlɛɛ, əgɛ, ə gbɔwɔ lɛɛ laa di gaa. Ə liilaa tɛɛ di pɔ pələ kəlee hu.

¹⁶ Tɔɔmun Asa ə nee Maaka yee kulɔ ŋą tɔɔ leenɛ̨ą laai hu, Mąąhɔlɔɓo, ə hali pɛli a Asera laa. Asa ə ɉali ɲɔ̨nwɔ̨ɔ̨ mąą nįnįn tii hu yali, ə ɉuwolo-wolo, ə gələn Sedrɔn ɓoloon ɉu.

¹⁷ Ə mą kɛ tii, ɉali kɔ́iɠaa di hvo kpɛɛ Israɛlə lɔi hu. Kɛlaa, Asa ə lɛɛ a gwəi kwəlɛɛ Yálá ɓa nwɔ yɛnɛ̨ɛ̨ kəlee yee mu.

¹⁸ Wali da hɛni, da hɛnŋąąi, yaa, da nąn daa kɛ di laa a dee, ə pa a diɛ Yai-Laa yəi bɛlɛ́n.

¹⁹ Kɔ hvo kɛa kɔ́, ə lɛɛ ɉu, Asa nwɔ tɔɔlaa gwɛlan bow haaɓa gɔw lɔɔlinąą ə həli.