Tɔɔɓɛlaa dɔlɔɔ 6 - Yálá laawoo hɛɓɛ (dc)

Yálá hee pɛlɛ́ tɔɔ mɛ̨nį

¹ Ə həɠə Israɛlə nuą kulaa Eziptə lɔi hu ɓa, ə həli la Yálá hee pɛlɛ́ tɔɔi lɔwai ɓa, ə kɛ a kwɛlan nwun nąąn kwɛlan bow mɛ̨ihaaɓa. Gwɛlan tii ə kɛ a Salomɔn nwɔ tɔɔlaa gwɛlan nąąn nɔwai Israɛlə lɔi nwun na. Salomɔn ə bɛlɛ́ kóló kɔ́wɔ tɔɔ a ɲąnin ŋɛ̨i da kɛ mą: Ɉiwə yai a di wɔɔ kwɛlan ɲąnįn veelɛnąą, ɲąnįn tii hu ɓə Salomɔn ə Yálá hee pɛlɛ́ tɔɔ la.

² Bɛlɛ́i Salomɔn ə dɔɔ Yai-Laa ɓa, gwɛa pələ ə kɛ a yee laa mą pow mɛ̨ida, ŋąą kɛnɛ̨ pələ yɛ ɓo a yee laa mą pow hveelɛ, dɔɔ mɛ̨i ə ɓo a yee laa mą pow haaɓa.

³ Ɲįmąn ŋɛ̨i kɛ bɛlɛ́ laaləi, di gulɔ bɛlɛ́ ŋąą kɛnɛ̨i pələ; yili ə kɛ a yee laa mą pow hveelɛ, ŋąą kɛnɛ̨ pələ ə ɓo a yee laa mą pow.

⁴ Ə hvaŋą piliiɠaa kɛ bɛlɛ́ ɓa, ə kwɛli hɛ̨ąn doo naɠaa.

⁵ Ə gulɔ-gbunma tɔɔ bɛlɛ́ nąą kəlee, di ɉu tee a pɛlɛ́ pɛlɛɛ-pɛlɛɛ.

⁶ Gulɔ-gbunmaɠaai tii kɛ mu pələ di kɛ a yee laa mą lɔɔli; ɉąąi nwɛi ə ɓo mɛ̨ida, ɉaaɓa kɛɛnąą, yee laa mą mɛ̨ihveelɛ. Di kɛi gbədələn bɛlɛɛ kɛ Yálá hee pɛlɛ́ ɓa, diɛ tɛ la, di yili kɛ tii bɛlɛ́ ɓa ɲɛnɛ̨ɛ̨ pələ, ə gɛ ə ɲee hee gulɔ-gbunma mu, bɛlɛ́ hvo pa ɓɛlai.

⁷ Di bɛlɛ́i tii tɔɔ a kwɛnii di kɛi mąąhaɠa gwɛni lɔwa la. Di bɛlɛ́ tɔɔ, kwɛli hɛn nɔpee ta tin və tɔɔ laa.

⁸ Gulɔ-gbunmai ŋɛ̨i kɛ mu pələ, naaləi ə kɛ bɛlɛ́ mamįiyee hu pələ. Di mɛ̨nɛ̨ɠaa kɛ mą, yii nuą di kɛi tɛ mą, diɛ lɔ gulɔ-gbunma ɉąąi mu, ə mą kɛ ɉaaɓa kɛɛnąą mu.

⁹ Kpɛɛi kɛa Salomɔn ə mo a bɛlɛ́ tɔɔ, ə gbaan bu a kpitili wulu ɓɛla.

¹⁰ Ə gulɔ-gbunma tɔɔ bɛlɛ́ ɓa, a yee laa mą lɔɔli; di gulɔ-gbunma da bɛlɛ́ nwąną di yee lɔ gee hu a kpitili wulu ɓɛla.

¹¹ Yai-Laa ə pələ ɓo Salomɔn ɓa,

¹² yɛ mą: «Yaa bɛlɛ́i ŋɛ̨i tɔɔ, tɛ̨ą li, kɛlaa, akɛ ya hiɛ yɛ bələi nwɔ́ tɔ́n gaa la, ə́ túwɔ́ yɛ bələi nwɔ́ kɛ pələ kaa la, ə́ gɛ yɛ bələi nwɔ́ liɛwooɠaa kaa la, nwóó ŋɛ̨i ŋą́ gwɛlɛ ə́ nąn Davidə ɓa ə́ mąą mɛ̨nį ɓa, ŋą́ gəlee pɔ mɛ̨nį kɛ yɛ́.

¹³ Ɛlɛɛ, akɛ tii, ŋą́ kɛ kɛa Israɛlə lonnii lɔwai; nwɔ́ nu huwui ŋɛ̨i a diɛ, vá di lɛɛ laa tɔ̨nɔ̨ kpɛli.»

Yálá hee pɛlɛ́ mu pɛli hɛnŋąą

¹⁴ Salomɔn ə bɛlɛ́ tɔɔ, ə ɲee laa kulɔ.

¹⁵ Salomɔn ə bɛlɛ́ nwąną ɉu pələ mąą kpulu a kpitili wulu ɓɛla, ə həɠə nɔi ɓa, ə tɛ gbaan ma. Ə siprə wulu ɓɛla pɛlɛ́ nɔi ɓa nąą kəlee.

¹⁶ Ə bɛlɛ́ gbón ɉu bələ pɛlɛ a kpitili wulu ɓɛla ɉu pələ, ə həɠə nɔi ɓa ə tɛ gbaan ma. Ə gɛ tii a yee laa mą pow hveelɛ. Ə nąą kɛ a kɛɛnąąi Mąąhəɠɛɛ gəlee ɓa.

¹⁷ Bɛlɛ́ kɛnɛ̨ mu ə kɛ a yee laa mą pow nąąn.

¹⁸ Nwulu ɓɛlaɠaa tii kɛ bɛlɛ́ nwąną ɓa, di hɛnŋaa mąąnįnįnŋąą həɠə mą, daɠaa di ɓo a gbąmąɠaa, da wulu powa lɛlɛɛɠaa mąąnįnįn. Nwulu ɓɛlai tii kəlee ə kɛ a kpitili, nu hva pɛli kɛ bɛlɛ́ nwąną kaai.

¹⁹ Ə pɛlɛ́ lon da kɛ gɛɛnąą mąąhəɠɛɛ tii hąąi, nąą ɓə ə Yai-Laa nwɔ mįnɛ̨ kə́hii hee laa.

²⁰ Bɛlɛ́ yii ŋɛ̨i kɛ ɉu pələ, gwɛa yee ə ɓo a yee laa mą pow hveelɛ, ŋąą ə ɓo a yee laa mą pow hveelɛ, dɔɔmɛ̨i ə ɓo a yee laa mą pow hveelɛ, yaa ɓə Salomɔn ə hɛni ya hiɛ ɉu nąą kəlee. Ə haláá kulɔi pɛli laa bɛlɛ́n a kpitili wulu.

²¹ Yili pulu, Salomɔn ə hɛni yá hiɛ bɛ́lɛ́ ɉu pələ nąą kəlee, bɛlɛ́ yii ŋɛ̨i di kɛi Yálá kɔ́ mu, ə yowon doo na hɛni yá hiɛ mą.

²² Hɛni yá hiaa bɛlɛ́ nąą kəlee ɓa. Ɉaláá kulɔi ŋɛ̨i kɛ Yálá nwɔ pɛ́lɛ́i mu, ə hɛni yá hiɛ yili ɓa.

²³ Ə mąąkpɛ malaka hveelɛ pɛli a olivə wulu, di tɔɔmɛ̨i ə ɓo a yee laa mą pow.

²⁴ Dɔ̨nɔ̨ koon veelɛi hu hvólóon ŋąą, ə kɛ a yee laa mą pow. Malaka hveelɛi tii goonŋąą pɛliɛ kɛ a gee.

²⁵ Dɔ̨nɔ̨ yaan goon ɉu hvólóon ŋąą ə kɛ a yee laa mą pow. Malaka hveelɛi tii di pɛliɛ kɛ a gee.

²⁶ Malaka dɔlɔɔ da veelɛ di nwun ŋą teei pɛliɛ kɛ a gee, di kɛ a yee laa mą pow pow.

²⁷ Salomɔn ə mąąkpɛ malaka hveelɛ tii tɔɔ bɛlɛ́ hąąi. Mąąkpɛ malaka hveelɛi tii koon ɉu haŋąą kɛ, di tɔɔ di kee tənən ma, di koon yɛ gee kaa bɛlɛ́ hąąi, gəlee hveelɛi nwɔ tɛitɛi yɛ hee bɛlɛ́ ɓa, ɓɛ pələ da ɓɛ pələ.

²⁸ Salomɔn ə hɛni yá hiɛ malaka hveelɛi tii ɓa.

²⁹ Bɛlɛ́ kɔ́lɔ ɓa, da ɉu pələ, ə mąąkpɛ malakaɠaa mąąnįnįn ɉəɠə naa kəlee, da gwala laa mąąnįnįn, da wulu powa lɛlɛɛɠaa.

³⁰ Bɛlɛ́ ɉu pələ nɔi ɓa da ɲɛnɛ̨ɛ̨ pələ, ə hɛni yá hiɛ nąą kəlee.

³¹ Yálá kɔ́ pɛlɛ́ laaləi, gbon mɛla hveelɛi tii ə kɛ a olivə wulu. Bɛlɛ́ gadalan nwəlila laa hɛn da gbon nwəlila laa hɛn di kɛ lɔɔli.

³² Gbon mɛla hveelɛi tii, da nwəli la laa wulu ɓɛla kəlee; Salomɔn ə mąąkpɛ malakaɠaa mąąnįnįn ɉəɠə mą, da gwala laa, da wulu powa lɛlɛɛ, ə hɛni yá hiɛ gəlee ɓa.

³³ Pələ lɔ ɓə ə gɛ la a bɛlɛ́ laaləi kɛnɛ̨, ə nąą kəlee kɛ a olivə wulu.

³⁴ Di kpon mɛla tɔ̨nɔ̨ ə kɛ a bɛlɛɛ gee la hveelɛ, diɛ pɛli volóon ɉii, diɛ bɛlɛ gee la; bələ ɓə gəlee hveelɛi di kɛ la, di ɓo a siprə wulu.

³⁵ Ə pənə nwɔ̨nɔ̨, ə mąąkpɛ malaka, gwala laa da ə wulu powa mąąnįnįn ɉəɠə mą, ə hɛni yá hiɛ mą.

³⁶ Yili pulu, ə gala tɔɔ bɛlɛ́ ɓa a kwɛni mąąhaɠaa yɛli haaɓa, ə nwəli la laa a kpitili wulu ɓɛla.

³⁷ Salomɔn nwɔ tɔɔlaa gwɛlan nąąn nɔwai Ɉiwə ɲąnin ɉu ɓə di Yai-Laa hee pɛlɛ́ kɔ́wɔ hvilɛn na.

³⁸ Di di yee laa kulɔ bɛlɛ́ tɔɔ ɓa, a Salomɔn nwɔ tɔɔlaa gwɛlan bow kɔ́w tɔ̨nɔ̨ lɔwai, ɲąnįn ŋɛ̨i da kɛ mą Bulə ɉu; yai kɛ a di wɔ kwɛlan ɲąnin mɛ̨ihaaɓa. Kwɛlan mɛ̨ihveelɛ ɓə Salomɔn ə gɛ yɛ Yai-Laa hee pɛlɛ́ tɔɔ, ə ɲee laa kpɔ tɛ̨ɛ̨tɛ̨ɛ̨.