Tɔɔɓɛlaa dɔlɔɔ 11 - Yálá laawoo hɛɓɛ (dc)

Salomɔn ə nwoo kala

¹ Tɔɔmun Salomɔn ə lɔi takpɛliɠaa hu nɛ̨ąą tamąą wɛli la kɛ, Eziptə tɔɔmun lon ɉəɠɛɛ pulu, Moabə nɛ̨ąą, Amɔn nɛ̨ąą, Edɔmə nɛ̨ąą, Sidɔn nɛ̨ąą, da Hɛtə nɛ̨ąą.

² Nɔiɠaa tii hu nɛ̨ąą ɓə wɔlɔ Yai-Laa ə kɛ diɛ: «Ka hvo da həɠə a ka nɛ̨ą, diɛ mɛ̨n, di hvo ka lonnii ta həɠə a di nɛ̨ą. Ka hvo li di pɔɔli, diɛ kpɛli di pa ka pɔɔli, ə gɛ, di hvo pa ka wɔ kiliŋąhiɛ tinɛ̨n di wɔ haliɠaa pɔ pələ.» Nɔiɠaa tii ɓə Salomɔn ə kanąn diɛ nwɔ wɛli mɛ̨nįɠaa hu.

³ Hilɛtaa nɛ̨ąąi kɛ Salomɔn yəi, di kɛ a nɛ̨ąą nwun mɛ̨ihveelɛ, diɛ ɓo a dɔɔ pɛlɛ́ mu nɛ̨ąą. Ɛlɛɛ, nɔ pɛlɛ́nŋaa di ɓo a nu nwun ɉaaɓa. Salomɔn nɛ̨ąni di gili mąą pənə gwəi.

⁴ Ɓɛlɔwai kɛa Salomɔn ə pɔlɔ la, nɛ̨ąni di gili tinɛ̨n di nɔ wɔ hali kɔ́wɔ hu, nwɔ giliŋąhiɛ hvo kɛa lɛɛ a ɉaŋąą Yai-Laa nwɔ Yálái pɔ pələ. Salomɔn nwɔ kɛ pələ ə kulɔ nąn Davidə nwɛi mu.

⁵ Salomɔn ə hvilɛn Astarte pulu, yai kɛ a Sidɔn nuą di wɔ hali, da Milkomə, yai kɛ a Amɔn lɔi hu nuą di wɔ ɓɛlɛkpɛɛmąą halii.

⁶ Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, Salomɔn ə ɲee lɔ ɉu; hvo lɛɛ Yai-Laa pulu ɲee tɔ̨nɔ̨ mɛ̨i, yɛ bələi nąn Davidə ə gɛ la.

⁷ Nąąlɔwai ɓə Salomɔn ə Kemɔsə hali kɔ́ pɛlɛ́ ta tɔɔ la, yai kɛ a Moabə lɔi hu nuą di wɔ ɓɛlɛkpɛɛmąą halii, ɛlɛɛ, da Molɛkə, yai kɛ a Amɔn lonnii di wɔ ɓɛlɛkpɛɛmąą halii, ə di wɔ haláá kulɔi kɛ ɲeei tii Ɉerusalɛmə tənən ma, nwuɔ̨.

⁸ Nɔi pulu nɛ̨ąąi kɛ ɲəi, ə gɛ lɔ tii di wɔ haliɠaai diɛ; diɛ lansan kələn diɛ, diɛ haláá kulɔ di wɔ haliɠaai diɛ.

⁹ Yai-Laa ə niiɲąnwąną Salomɔn ɓa, mąąhɔlɔɓo, nwɔ kiliŋąhiɛ aa həɠə kɛ Israɛlə nwɔ Yálá pɔ; yai gbɔwɔ lɛ mą a gee mɛ̨i hveelɛi.

¹⁰ Yɛ mo kpɔ mą a nwąnąąi, yɛ kɛ mą: Hvó kɛ a hali kɔ́mun. Kɛlaa, Salomɔn hvo kɛ Yai-Laa woo hon ni.

¹¹ Yai-Laa yɛ Salomɔn ɓa: «Yɛ bələi yáá túwɔ́ la tii a ɲɔ̨nwɔ̨ɔ̨, nwóói ŋą́ gwɛlɛ yɛ́, hvó ɉon ni, hvó nwɔ́ tɔ́n hon ni, yai ŋą́ mo yɛ́; gáá pai dɔɔlaa kulɔi ə́ yəi, ŋą́ dɛɛ ə́ yee pɔ mun da pɔ.

¹² Kɛlaa, və́ pai gɛi tii ə́ hvulú kɔ́wɔ ŋą, ə́ nąn Davidə mąą mɛ̨nį ɓa. Gáá pai gulɔi ə́ lon ɲəi.

¹³ Kɛlaa, və́ pa nɔi kəlee kulɔi ɲəi. Gáá pai Israɛlə nu huwu tɔ̨nɔ̨ tɛɛi bɔ ə́ nąn Davidə mąą mɛ̨nį ɓa, da Ɉerusalɛmə mąą mɛ̨nį ɓa, daai ŋą́ ɉəɠə ɉu a nííɓa taa.»

Nuą di di muhəɠə Salomɔn laa ɓa

¹⁴ Yai-Laa ə nu ta líi muhəɠə Salomɔn pɔ a ɲowolaa. Edɔmə mun kɛ a Hadadə, yai kɛ a Edɔmə tɔɔɓɛlaa huwu hu mun da.

¹⁵ Ɓɛlɔwai Davidə ə kɛ la kɔ́ ɓa, da Edɔmə, gɔ́laɠa nwun nąmu Ɉoabə ə li nu powaɠaa loo mɛ̨nį ɓa, ə Edɔmə hinąą kəlee paa.

¹⁶ Ɉoabə da nwɔ kɔ́kulááɠaa di lɛɛ gɛɛnąą tii ɓa ɲąnin mɛ̨ida, ə lɛɛ ɉu di Edɔmə hinąą kəlee paa.

¹⁷ Kɛlaa yaamun, Hadadə da Edɔmə nuą taɠaa di pu, diɛi kɛ Hadadə nąn bɔ a wɔ tínuą. Di li Eziptə Hadadə ə kɛ ni a hulɔnon.

¹⁸ Di həɠə Madian, di li Paran, di Paran hinąą taɠaa hvilɛn di pɔ; di həli Eziptə tɔɔmun ma, yili ə pɛlɛ́ tɛɛ Hadadə pɔ, ə gɔ̨nɔ̨n gulɔ, ə lɔi tɛɛ bɔ.

¹⁹ Hadadə mąą mɛ̨nį ə Eziptə tɔɔmun gwəinɛ̨ɛ̨. Tɔɔmun ə nɛ̨ą nəɠə tɛɛ Hadadə pɔ a nɛ̨ą. Tɔɔmun nɛ̨ą Tapenɛsə nəɠə.

²⁰ Tapenɛsə nəɠə da Hadadə di lon ɉulɔnu kaa, di naa hee a Genuvatə. Tapanɛsə ə nokoloi tii kulɔɉu tɔɔmun ɲəi bɛlɛ́n. Genuvatə ə kɛ tɔɔmun ɲəi bɛlɛ́n, da tɔɔmun nonnii.

²¹ Hadadə ə lɛɛ Eziptə ə bələ mɛ̨n, diɛ kɛ: Davidə aa laa nąnni kwɛlɛ, ɛlɛɛ, gɔ́laɠa nwun nąmu Ɉoabə yaa kpɛli aa haa. Hadadə yɛ Eziptə tɔɔmun ma: «Hvaa mą, ə́ nɛ́ɛ́ laa, ŋį́ li nwɔ́ lɔi hu.»

²² Eziptə tɔɔmun yɛ mą: «Lə ɓə hvɛɠɛɛi la ɓɛ gwɛ́lɛ, yai ə́ kaa bɔ ə́ li ə́ wɔ lɔi hu?» Yili ə nwoo pulu pənə yɛ mą: «Hɛn gəlee kaa ɲə́i, kɛlaa, ə mą kɛ tii, nɛ́ɛ́ lɔ laa ŋį́ li.»

²³ Yálá ə Salomɔn ɲowo takpɛli muhəɠə, yili ɓa kɛ a Ɛliada lon Rezɔn. Ə pu, ə həɠə Sova tɔɔmun Hadadɛzɛrə pɔɔli, yai kɛ a nąmu.

²⁴ Ə nuą ŋąąkpɔn gwɛlɛ, ə kɛ a too mɛ̨i kɛ nuą nwun nąmu. Di paai Davidə ə kɛi mo, di pu di li Damasə, di hee laa, diɛ ɓo Damasə ɲąąwooɓomun bɔ.

²⁵ Rezɔn ə kɛ a Israɛlə ɲowo Salomɔn nwɔ yɛnɛ̨ɛ̨ kəlee yee mu. Mɛ̨nį ɲɔ̨nwɔ̨ɔ̨i Hadadə ə gɛ ya ɓaa: Ə wɛlikpɛɛmąąla kulɔ a Israɛlə. Ə nwɔ tɔɔlaai hee Aramə lɔi hu.

Di nɔi ɓɛlaɓo mɛ̨nį ɓo Ɉeroboamə ɓa

²⁶ Ɉeroboamə, Nevatə lon, ə kɛ a Ɛfraimə mun da, bɔ taai ɓa kɛ a Sereda, nee laa ɓa kɛ a Serua, neei kɛ a kalanin. Ɉeroboamə ə kɛ Salomɔn yee pɔ mun da. Ə tɔɔ tɔɔmun na.

²⁷ Bələi ə tɔɔ la tɔɔmun na, bələ ka: Mɛ̨nɛ̨i ŋɛ̨i kɛ Yálá hee pɛlɛ́, da dɔɔ pɛlɛ́ di lɔwai, ɓɛlɔwai Salomɔn ə kɛi dɔɔ la, yɛ nąn Davidə taa hį́i nwoloi laa kpulu,

²⁸ Ɉeroboamə ə kɛ a nu wala wala ta, a nui kɛ di laana. Salomɔn ə naŋąlon tii nwɔ kóló kɛ pələ kaa, yili ɓə gɛ yɛ ɉəɠə la ɉu, yɛ ɉee Ɉosɛfə nwɔ pɛlɛ́ kóló mɛ̨nįi nwun na.

²⁹ Nąąlɔwai, Ɉeroboamə aa kɛ kulɔ Ɉerusalɛmə, da Yálá kwəi mɛ̨nį hukulɔ mun Ahiya, yai kɛ a Silo mun, di kwiɛn bələi. Həɠə nįnɛ̨ ɓə kɛ Ahiya kwaną, ɛlɛɛ, di nu hveelɛi ɓə kɛ laa bələ pɔ.

³⁰ Ahiya ə ɉəɠə nįnɛ̨i tii huɓɛla ɉu pow kɔ́w hveelɛ,

³¹ Yili pulu, yɛ Ɉeroboamə ɓa: «Gbuɔ pow həɠə! Mąąhɔlɔɓo, mɛ̨nįi Yai-Laa Israɛlə nwɔ Yálá ə mo ya ka: ‹Gáá pai dɔɔlaa kulɔi Salomɔn yəi, nɔi Salomɔn yəi, ŋą́ bow tɛɛ ə́ pɔ.

³² Ɛlɛɛ, nu huwu tɔ̨nɔ̨ lɔ ɓə pai lɛɛi ɲəi, nwɔ́ tímun Davidə mąą mɛ̨nį ɓa, da Ɉerusalɛmə mąą mɛ̨nį, yai ŋą́ ɉəɠə ɉu Israɛlə nu huwuɠaa kəlee lɔwai.

³³ Daa nɛ́ɛ́ laa, diɛ pɛlɛ Astarte lííla, yai gaa a Sidɔn nuą di wɔ hali nɛ̨ɛ̨nu, da Kemɔsə Moabə nuą di wɔ hali, da Milkomə Amɔn lonnii di wɔ hali. Di hvo hiɛ li nwɔ́ pələɠaai mɛ̨i, mɛ̨nįi ɉaŋąą ɲɛ̨́i ɓa, di hvo gɛ li. Di hvo hvilɛn ni nwɔ́ tiɓoɠaa pulu, yɛ bələi di nąn Davidə ə gɛ la.

³⁴ Və́ pai nɔi ta kulɔi mą, ɓɛlɔwai Salomɔn kaa la a vulú, mąąhɔlɔɓo, ŋą́ ɉee a tɔɔmun ɲíi hvóló kəlee yee mu; nwɔ́ tímun Davidə mąą mɛ̨nį ɓa, yai ŋą́ ɉəɠə ɉu, ɛlɛɛ ə nwɔ́ tiɓoɠaai da nwɔ́ tɔ́n nwooɠaai kəlee pɔ mɛ̨nį kɛ.

³⁵ Kɛlaa, gáá pai dɔɔlaa kulɔ non ɲəi, ŋą́ dɛɛ ə́ pɔ, nu huwu pow ɓə kɛi ə́ yee mu.

³⁶ Non nwɛi, gáá pai nu huwu tɔ̨nɔ̨ tɛɛi bɔ, ə gɛ, nwɔ́ tímun Davidə nwɔ nwɔ̨n hvo pa luwun nííla, Ɉerusalɛmə taai ŋą́ ɉəɠə ɉu, a nwɔ́ɔ́, gɛ́ náá hee laa.

³⁷ «‹Ə́ wɛi, gáá pai ə́ həɠəi, yɛ́ kɛ a tɔɔmun ɓɛi lɔpee a nɛ̨ɛ̨ yɛ́, ə kɛ a tɔɔmun Israɛlə mɛ̨i.

³⁸ Mɛ̨nįɠaa kpɔ gáá pai naai ə́ nwuɔ̨, yá ə́ wəli tɔɔ diɛ, yá hiɛ nwɔ́ pələɠaa hu, mɛ̨nįi ɉaŋąą ɲɛ̨́i ɓa yɛ́ gɛ, ə́ yee ə ɓo nwɔ́ tɔ́n nwooɠaai da nwɔ́ tiɓoɠaa diɛ, yɛ bələi nwɔ́ tímun Davidə ə gɛ la, ŋą́ kɛ ə́ pɔ, ŋą́ pɛlɛ́ tɔɔ yɛ́, a nwalawalaa yɛ bələi ŋą́ dɔɔ la Davidə ɓa; ŋą́ Israɛlə tɛɛ ə́ pɔ,

³⁹ Bələ ɓə ŋą́ Davidə huwu hu nuą nwumɛ̨ la tii, kɛlaa, hva kɛ a yələ kəlee mɛ̨nį.›»

⁴⁰ Salomɔn ə kɛi Ɉeroboamə paa pələ kwɛli, Ɉeroboamə ə pu, ə li Eziptə, ə hee Sisakə kɔ́wɔ mɛ̨i, yai kɛ a dɔɔmun nąąlɔwai. Ə lɛɛ laa, ə lɛɛ ɉu, Salomɔn ə haa.

Salomɔn haa mɛ̨nį

⁴¹ Salomɔn kɛ mɛ̨nįɠaa gbəli, mɛ̨nįɠaa kpɔ ə gɛ, da nwɔ kilimąą mɛ̨nį, gəlee pɛ̨ɛ̨i Salomɔn kɛ mɛ̨nį hɛɓɛ́ hu.

⁴² Salomɔn ə kwɛlan bow nąąn gɛ tɔɔlaa hu Ɉerusalɛmə Israɛlə lɔi nwun na.

⁴³ Yili pulu, Salomɔn ə laa nąnni kwɛlɛ. Di bowa loo Davidə taa. Salomɔn lon Roboamə ə hee dɔɔ kpəlin ɉu a nąn mąą hvalin.