Korɛntə dɔlɔɔ 13 - Yálá laawoo hɛɓɛ (dc)

Wɛlikɛmąąlaa

¹ Ŋą́ ma pɛli hįiwoo kəlee ɓoi, ə mą kɛ malakaɠaa lawoo, akɛ wɛlikɛmąąlaa hvo ɲə́i, gáá lɔ yɛ kwɛlii nwoo kaa ɉu, gɛlɛ tin.

² Ə mą kɛ ŋą́ pɛli Yálá-taa mɛ̨nįɠaa kəlee hu kulɔi, gɛ́ ɓo a mɛ̨nį looɔɠaa kəlee kɔ́lɔnŋąa, da kili mɛ̨nį kəlee, ə mą kɛ laa na laa kaa ɲɛ̨́i gɛ́ yeeɠaa həɠə la dɔɔi, akɛ wɛlikɛmąąlaa awala kɛ ɲə́i, gáá a kpɛli-kpɛli.

³ Ə mą kɛ ŋą́ą́ ɲəi hɛnŋąa kəlee ɲąąkwɛlɛ nuą pulu kaa diɛ, di pɔ, ə mą kɛ, ŋą́ą́ gbɔ́wɔ́ tɛɛ, diɛ gə́lən, akɛ wɛlikɛmąąlaa hvo ɲə́i, vá hɛn da hɔlɔɓo ɉu.

⁴ Wɛlikɛmąąlaa liikpəlɛɛi, wɛlikɛmąąlaa a kpɔnmąą kɛ, hva tolo kulɔ, hɛn nwɛli laa hvo wɛlikɛmąąlaa hu, kpɔɔ ɲąą kɛnɛ̨ hvo wɛlikɛmąąlaa hu.

⁵ Wɛlikɛmąąlaa hva mɛ̨nį ɲɔ̨n gɛ, hva gbɔwɔ ŋį tɔnɔ kwɛli, hva nííholi, hva mɛ̨nį hee gwəi;

⁶ hvulu mɛ̨nį hva gwəinɛ̨ɛ̨, Kɛlaa, a gwəinɛ̨ɛ̨ tɛ̨ą mɛ̨nį hu.

⁷ Wɛlikɛmąąlaa a hɔn kəlee mąąhvaalɛɛ, a laa mɛ̨nį kəlee la, a gilitɔɔ mɛ̨nį kəlee ɓa, a niikpələ mɛ̨nį kəlee mu.

⁸ Wɛlikɛmąąlaa hva kpɛɛ. Yálá kwəi mɛ̨nį hukulaa yaan? Gaa pai kpɛɛi. Hįiwooɠaa diɛn? Di kaa pai kpɛɛi. Mɛ̨nį kɔ́lɔnŋąa yaan? Gaa pai kpɛɛi.

⁹ Mąąhɔlɔɓo, guɔ mɛ̨nį kɔ́lɔnŋąa ɲɛ̨n dɔɔi, guɔ Yálá kwəi mɛ̨nį hukulɔ mɛ̨nį yaan, ɲɛ̨n dɔɔ.

¹⁰ Kɛlaa, ɓɛlɔwai mɛ̨nį kəlee laa kaa pai hvɛɛi la, mɛ̨nį ɲɛ̨n dɔɔɠaa tii kəlee da kpɛɛ.

¹¹ Gɛ́ɛ́ a lokolo, ŋą́ kɛli hvaa lɔ yɛ lokolo, gɛ́ kiliŋąhiɛ yɛ lokolo, kɛlaa, gɛ́nɛ̨ɛ̨ kɛa, ŋą́ lɛapɛlɛɛ mɛ̨nįɠaa kəlee lɛɛ laa.

¹² Yiihu kɛa, gu kaa kɛɛ kaai pɛnɛ̨n vili-hvili hu, kɛlaa, a Yələ ta, gu kaa pai gaai hələ-tətə. Yiihu, nwɔ́ mɛ̨nį kɔlɔnŋąą ɲɛ̨ndɔɔi, a kɛ tii, gáá pai gɔlɔn ɉii, yɛ bələi Ə gɔ́lɔ́n na.

¹³ Mɛ̨nį haaɓa ɓə laa hva kpɛɛ, diɛ ɓaa: Laa na laa, kilitɔɔmąąlaa, wɛlikɛmąąlaa, kɛlaa, yii gɛnɛ̨ dɛɛ gəlee diɛ, ya ɓaa: Wɛlikɛmąąlaa.