Luka 17 - Bibiliya mu Kirundi coroshe

Inyigisho ku vyaha, ku kwizera no ku bikorwa

¹ Umusi umwe Yesu yabwiye abigishwa biwe ati: “Ibituma abantu bacumura ntibizoreka kuza, ariko aragowe umuntu abizana.

² Ikimukwiye ni uko yoboherwa ibuye rinini kw’izosi, agatererwa mu kiyaga, hako atuma hagira n’umwe muri aba bato acumura.

³ Nuko rero mwiyubare mu vyo mukora. Umuvukanyi wawe niyacumura, umwihanize. Niyihana, umuharire.

⁴ Niyagucumurako incuro indwi ku musi, akagaruka incuro indwi nyene akubwira ati: ‘Ndihanye mbabarira,’ uze umuharire.”

⁵ Intumwa zibwira Umwami Yesu ziti: “Mwigisha, twongerereze ukwizera.”

⁶ Arabishura ati: “Iyo muba mwari mufise ukwizera kungana n’akabuto k’igiterwa citwa mutaride, mwobwiye iki giti muti ‘Randuka, ushingwe mu kiyaga,’ kandi cobumviye.

⁷ Ni nde muri mwebwe, afise umukozi, yohengera avuye kurima canke kuragira, akamubwira ati: ‘Kaze ku meza dufungure’?

⁸ Mbega ntaca avuga ati: ‘Ntegurira imfungurwa, hanyuma wambare neza ungaburire, ninaheza gufungura na we uraheza ufungure’?

⁹ Mbega arashimira uwo mukozi ko yakoze ivyo yamutegetse vyose? Haba na mba!

¹⁰ Nuko rero namwe nimwaheza gukora ivyo mwategetswe vyose, muze muvuge muti: ‘Turi abakozi b’imburakimazi, twakoze ivyo dutegerezwa gukora.’ ”

Yesu akiza abanyamibembe cumi

¹¹ Yesu ariko araja i Yerusalemu, aca ku rubibe rwa Samariya na Galilaya.

¹² Agira ashikire imihana, haza abanyamibembe cumi baza guhura na we, ariko bahagarara kure yiwe.

¹³ Barasemerera bati: “Yesu, Mwigisha, tugirire impuhwe!”

¹⁴ Ababonye, arababwira ati: “Nimugende, mwiyereke abaherezi.” Bakiri mu nzira bagenda, baca barakira imibembe, barahumanuka.

¹⁵ Umwe muri bo abonye ko yakize, aca asubira inyuma aho Yesu yari ari, ashima Imana n’ijwi rirenga.

¹⁶ Amushikiriye, yikubita imbere y’ibirenge vyiwe, aramushimira. Kandi yari Umusamariya.

¹⁷ Yesu arabaza ati: “Mbega abakize bagahumanuka ntibari cumi? None abandi icenda bari he?

¹⁸ Nta n’umwe yagarutse guha icubahiro Imana atari uwu munyamahanga?”

¹⁹ Aca aramubwira ati: “Haguruka wigire, ukwizera kwawe kwagukijije.”

Ivy’ukuza kw’Ubwami bw’Imana

²⁰ Umusi umwe Abafarisayo babajije Yesu aho Ubwami bw’Imana buzozira, na we arabishura ati: “Ubwami bw’Imana ntibuza mu buryo bubonwa n’amaso,

²¹ kandi nta wuzovuga ngo: ‘Ehe buri hano’ canke ngo: ‘Ehe buri hariya.’ Kuko Ubwami bw’Imana buri hagati muri mwebwe.”

²² Aca abwira abigishwa biwe ati: “Hazogera igihe mwipfuza kubona n’umusi umwe mu misi y’Umwana w’Umuntu, ariko ntimuzowubona.

²³ Abantu bazobabwira bati: ‘Ehe ari hariya!’ Canke ngo: ‘Ehe ari hano!’ Ntimuze mujeyo canke ngo mubakurikire.

²⁴ Kuko nk’uko umuravyo uravya ukaboneshereza ijuru ryose, ni ko bizomera Umwana w’Umuntu niyaza ku musi wiwe.

²⁵ Ariko azobanza kubabazwa cane no kwankwa n’abantu b’iki gihe.

²⁶ Nk’uko vyari bimeze mu gihe ca Nowa, ni ko bizomera no mu gihe c’Umwana w’Umuntu.

²⁷ Bararya, baranywa, bararongora, bagashingiza, gushika umusi Nowa yinjiye mu bwato, maze umwuzure ukaza ukabatikiza bose.

²⁸ Ni ko vyari bimeze no mu gihe ca Loti. Bararya, baranywa, barasuma, baradandaza, bararima, barubaka amazu,

²⁹ gushika umusi Loti yaviriye i Sodomu, maze umuriro n’ibizuku bikoroka bivuye mw’ijuru, birabarigita bose.

³⁰ Ni ko bizoba no ku musi Umwana w’Umuntu azohishurirwako.

³¹ Kuri uwo musi, uwuzoba ari hejuru ku nzu, ntazosubire mu nzu kurondera ivyiwe. N’uwuzoba ari mu murima, ntaze asubire i muhira.

³² Mwibuke ivyashikiye muka Loti.

³³ Uwugomba gukiza ubugingo bwiwe azobubura, ariko uwuzobuheba azobukiza.

³⁴ Ndababwire, abantu babiri bazoba baryamye ku buriri bumwe, umwe azojanwa, uwundi asigare.

³⁵ Abagore babiri bazoba bariko barasya hamwe, umwe ajanwe, uwundi asigare. [

³⁶ Abagabo babiri bazoba bari kumwe mu murima, umwe ajanwe, uwundi asigare.”]

³⁷ Maze abigishwa baramubaza bati: “None ivyo bizobera he ga Mwami?” Na we arabishura ati: “Aho umuvyimba uzoba uri, ni ho ibikona bizokoranira.”