Yaŋ 141 - Yennu Gbouŋ Mɔɔr

Daajoouk Yenmiaru

¹ Yennu, n yia; sommitin mɔtana. Mi-i yiina yoo nba, fan gbiint ki turin.

² Gaat n miaru ki lii tee nan bonnunubit na, ki maa donn n nii nba na-ii tee nan daajoouk maruŋ na.

³ Yennu, ii dia n mɔb, kii guu n mɔmaan.

⁴ Ii guun ki n daa loon biit tumu, koo ki n daa tokii biit damm ki tuun biiti. Ŋaant ki n daa ban pukii bi jaamm dinu ni.

⁵ Niŋanɔ saa fit dat n tubir, ki jii ŋant ki ŋmakitin; ŋaan n ki loon biit damm baakir, kimaan yoo kur n mei ki biir bi toonbiit nae.

⁶ Bi-i lu bi diateeb na ki bi nyii jɔyirin ki baa yoo nba, niib na saa bann nan n maan na tee barmɔniie.

⁷ Bi kpaba sii dɔɔ kaauk boore buri buri nan baa tuu yakit daauk ki butɔ buri buri biaŋinba na.

⁸ Ŋaan n yada be fin Yabint Yennu nie yoo kur, n loon a guurue; a daa te ki n kpenni.

⁹ Nyintin barit nba ki bi pii guuntin na ni, biit damm barit maŋ ni.

¹⁰ Ŋaant biit damm na n baa bi barit nba ki bi bar na ni, ŋaan ki min daa laat siara daŋi.