Toona 28 - Yennu Gbounpaauŋ Mɔɔr

Malta teeb nba gaarit biaŋinba

¹ Ta din la tinnu na poorpoe, ki ti bann nan tiŋ maŋ sann yi Malta.

² Leŋ niib din diat bonŋann, kimaan saak din baa, ki waat be bonchiann, ki bi joo mugann ki turit a ti nanii, ŋaan teen ti kur sommir sommir.

³ Ki Pɔɔl tan tikir daginganii bonchiann ki kpab nan waauk, ki teen muu na ni, ki muu na tonu tan gbat waauk na, ki u nyii ki jokir Pɔɔl nuu.

⁴ Ki leŋ niib nba la ki waauk na jɔɔn Pɔɔl nuu paak, ki bi ji beer bi leeb a “Jɔɔ na kpan tee nikpiiruko. Wa lek tinn u mɔŋ mɔkgbeŋŋir nna, ŋaan kpeemm ŋarin kan nyikɔ ki wuu be u manfoor ni.”

⁵ Ki Pɔɔl ŋak u nuu, ki waauk na baa muu na ni, ŋaan ki Pɔɔl ki la daŋ nan waama.

⁶ Ki bi ji daan a bin laan u siar po sa mɔr, amii u tan sa kpir baa ki kpo. Ba ji daan daan ki tan goo ki ki la siar teenɔ na, ki bi nyik bi dindann maŋ, ŋaan yaa a u tee yensɔɔe.

⁷ Leŋ bia din ki fɔk nan Publius kpaant nba be na. Ŋɔɔe bia din tee tiŋ maŋ ni bat. Ki u din gaarit saantuk ki saa jaŋ damunjaa ŋanntaa.

⁸ Ki Publius baa mun din dɔɔ yiar gbanantouŋ nan nɔniikak ni. Ki Pɔɔl tan kɔɔ u diiuk ni, ki jii u nii ki yii u paak, ŋaan miar Yennu ki te ki u paak.

⁹ Wa din te ki u paak na, ki baatleeb nba be leŋ na kura din baar, ki u tan te ki bi mun paak.

¹⁰ Ki bi din pit piinii bonchiann. Ta bia din tan fi a tin kɔɔ ŋaruŋ yoonba, ki bi baar nan linba ki ti tan sii loon sɔnu ni, ki kɔɔn ŋaruŋ ni ki turit.

Ta din saa Rom biaŋinba

¹¹ Ti benu leŋ ŋmaarii ŋanntaa poorpoewa, ki ti din kɔɔ ŋaruŋ nba din nyii Aleksandria ki din be Malta fufuk yoo na, ki bi yi ŋaruŋ maŋ Yenjaasinba. Ki li fiir saa,

¹² ki yaan tan baar doo nba ki bi yi Sairakus na, ki biar leŋ daa ŋanntaa,

¹³ ki tan tɔɔt gar baar Regium doo ni. Ki li tan yent ki wouŋ yaan jak danu, ki nyii niigaŋ po ki tutit. Ki ti jii daa ŋannlee ki yaan baar Puteoli doo ni.

¹⁴ Leŋe ki ti la Yisaweisiab. Ki bi gɔɔrit a tii be namm ki jaŋ daa ŋannlore. Ki ti be namm, ki tan nyii leŋ ki saa Rom doo ni.

¹⁵ Yisaweira nba be Rom doo ni na nba gbat ti po na, ki bi fiir baar chetit Apius daak ni, ki siab mun chetit Saamŋei Ŋanntaa nba kpia Rom na. Pɔɔl nba lab yoonba, ki li turɔ parcheenn, ki u tur Yennu niipoouk.

¹⁶ Ta din baar Rom na, ki bi sak chab Pɔɔl ki u be u yur po ŋaak, ki bi te ki lanjima guu-u.

¹⁷ Tɔn, li daa ŋanntaa daare ki Pɔɔl yiin Juu teeb yudamm lakinu. Ba tikir leeb yoonba, ki u yetib a “N naa waas, n lek ki tun bonbisiar ki biir ti niib amii ti yejamm sennu, ŋaan bi din soorin ki kɔɔnin dansarik Jerusaleme, ŋaan jiin ki kubinin Rom teeb nuu ni.

¹⁸ Ki bi boin buboit, ki tan loon ki bin nyikin, kimaan bi ki la ma tun bonbisiar nba jaŋ nan bin kpimi.

¹⁹ Ŋaan Juu teeb nba din ki sak a bin nyikin na, li paak ji din te ki n yaa n sa gaan n maan kpanbara yudaanɔ Siisa peŋ, ŋaan li din ki tee a n loon ki n pak biir ti niib siari.

²⁰ “Li paake te ki n yiini ma n tan lai ŋaan beti labaar na po. Ma mɔɔntir Yennu Niganntɔɔ po na, wunba ki Juu teeb daan dindann na poe, ŋanne te ki bi baanin jarit na.”

²¹ Ki bi betɔ yaa “Ti ki la gbant ki li nyii Judea ki baar ki li want a po, amii ti sɔɔ bia ki nyii leŋ ki baar nan labasiari, amii sɔɔ mun bia ki pak bonbisiar ki saan gaan a po biaki.

²² Ŋaan ti sii loon ki tin bann a dudukit ni. Ti poŋ mi nan siar po kura, niib bonchiann piak ki biir jiantu nba ki a jiantir na.”

²³ Li paak ki bi senn daar. Ki niib bonchiann tan baar Pɔɔl peŋ daar maŋ ni. Ki u kat wannib nan nunmɔnn Yennu naan po, sanyiɔk ni mɔkmɔk nan dajouk, ki wantib Yisa barii nba be Moses sennu ni nan Yennu sɔkiniinba sɔbu ni biaŋinba, ki yabii a wun tunn niib na yan ki jiin Yisa po.

²⁴ Ki bi siab yan din tunn ki kɔɔ Yisa po, u maan maŋ paaka, ki siab mun ki teen yada. Ki bi jak leeb nan mɔniɔk, ŋaan yaa bin yat saan.

²⁵ Ŋanne ki Pɔɔl din yet mɔbonyennkɔɔ a “Yoo nba ki Yennu Seyeeŋ nba din te ki u sɔkinii Aisaya nba din pak tur ti yejamm na, u din pak mɔniie,

²⁶ ki din yet yaa nna: ‘I saa ki saa bet niib na a i tan sa gbiint ki gbiint, ŋaan lek kan bann li paaki. a ki bia tan sa got ki got, ŋaan bia lek kan la,

²⁷ kimaan niib na tee yankpeena damme, ki bi bia kpaa bi tuba nan bin gbat, a ki bi bia mun bi nunii nan bin la. Bi-i bo-i kii mun bi nunii, bi bo sa lawa, ki biakii bo-i kii kpaa bi tuba, bi bo sa gbata, ki bi-i biakii bo-i kii tee yankpeena dammi, bi bo sa bann li paaka. Li-i kii teen nna bonni, bi bo sa nyik bi biit, ki n te ki bin paaka.’ ”

²⁸ Ki Pɔɔl bia ŋamm yet a “Ki bia jenna, li paak, li ŋan ki yin bann nan Yennu tinnu maan baar niib nba ki tee Juu teeb paake, ki bi sa gbat.”

²⁹ Pɔɔl nba din pak nna yoonba, ki Juu teeb ji din yat saa, ŋaan jak leeb nan mɔniɔk bonchiann.

³⁰ Pɔɔl nba din be ŋaak nba na ni, u din pa likirii ŋaak maŋ paak, ŋaan din be leŋ bina ŋannlee. Nirɔ nba kur tan baar u boor, u tuu gaarɔ bonŋann.

³¹ Ki u bia din tuu mɔɔntir Yennu naan po, ki bia want niib ti Yomdaanɔ Yisa Masia po, ki din tuu piak u yama ni nan parcheenn.