Toona 25 - Yennu Gbounpaauŋ Mɔɔr

Pɔɔl nba gaan u maan Siisa boor biaŋinba

¹ Yudaanɔ Festus nba baar Siisarea, li daa ŋanntaa daar ki u nyii leŋ ki doo Jerusalem.

² Leŋe ki Yennu jiantu yudamm nan Juu teeb yudamm baar Festus peŋ ki pak paan Pɔɔl maan na, ŋaan miar Festus

³ a wun te ki bi para-ii mei, ki te ki Pɔɔl-n baar Jerusalem, ŋaan din lor lor a bin bɔr ki laa ki tan kpi Pɔɔl sɔnu ni.

⁴ Ki Festus jiin a “Pɔɔl be dansarik ni Siisarea, ŋaan n mɔŋ mɔŋ lek sa ŋmat ki saan leŋ daa ŋannlelee nawa.

⁵ Li paak, ŋaant man ki i yudamm-n wein, ki tin sik Siisarea. Li-i tee ki jɔɔ na tun bonbiir ki kpetie, bin pak paanɔ mapaauk maŋ.”

⁶ Festus din dii kaman nan daa ŋanniin amii dapiik na ki be namm, ki tan fit ki ŋmat Siisarea. Ki li yent sanyiɔk ni, ki u ji kar u buut paak, ŋaan te ki bi nyinn Pɔɔl ki baar nanɔ.

⁷ Pɔɔl nba baar yoonba, ki u ji jak buut bunu. Ki Juu teeb nba nyii Jerusalem na, ki bi fiir ki ŋaa lint Pɔɔl, ŋaan pak bonbiir bonchiann ki biirɔ, ŋaan bia lek ki fit wann u bonbisiar maŋ paaki.

⁸ Ŋanne ki Pɔɔl pak u mɔŋ mɔŋ paak, ki yet a “N ki tun ki biir Juu teeb sennu. N bia ki tun ki biir Yennu jiantu ŋasaakak siari, amii Rom kpanbara yudaanɔ.”

⁹ Ŋaan ki Festus loon ki wun penn Juu teeb para. Li paak, ki u boi Pɔɔl a “A loon ki a saan Jerusalem, ki n sa bu a buut leŋii?”

¹⁰ Ki Pɔɔl yetɔ a “N kpan daa see kpanbara yudaanɔ Siisa buut bunbuboore na. Ŋannii ŋan nan ki a bu n buut. N ki tun Juu teeb bisiati, ki a mɔŋ mɔŋ mun bia mi nna.

¹¹ Mi-i bo-i tee mɔyêtdaanɔie, ki tun bonbiir nba ki li jaŋ nan kuun, n kan yet a n fit nyi kuun ni. Ŋaan li-i tee ki bi pak paanin mapaauk yannie, sɔɔ kan fit jiin ki kubinin bi nuu ni. Ŋaan see ki n gaan n maan maŋ kpanbara yudaanɔ Siisa boor.”

¹² Ŋanne ki Festus pak nan u saakab maan maŋ po, ŋaan bet Pɔɔl a “A gaan a maan Siisa boora. Li paak, a set sa saana.”

Bat Agripa nan u ŋaapoo nba gbiintir Pɔɔl maan biaŋinba

¹³ Daa ŋannlee nna nba gar, ki Bat Agripa nan u ŋaapoo Beniis tan baar Siisarea a bin foont yudaanɔ Festus.

¹⁴ Ŋaan bi din teen leŋ daa ŋaŋŋawa, ki Festus tan wann bat na Pɔɔl maan nba tee biaŋinba, ki yet a “Fiiliks daan yaat, ŋaan ŋaan sɔɔ dansarik ni,

¹⁵ ŋaan ma daan saan Jerusalem yoonba na, ki Juu teeb saakab nan jiantu yudamm daan pak biirɔ, ki yaa a n bu u maan maŋ ki biirɔ.

¹⁶ Ki n mun jiin ki betib a ‘Timm Rom teeb yaa boor ni ŋarin, li ki tee ti kaar kaa ki tin chab nirɔ nba ki bi yaa a u tee biirtɔɔ ki bin kpiu, ŋaan u madamm daa ki baar buut boori, ki ŋɔɔ nan u biirteeb daa ki took leeb ki u pak ki yaa wun nyinn u mɔŋi.’

¹⁷ “Li paak, bi kura nba daan tan baar nna yoonba, n ki taantiri, ki li yent sanyiɔk ni ki n kar n buut paak, ŋaan tur mɔb ki bi kɔɔ nan Pɔɔl.

¹⁸ “Ŋanne ki binba paau maan maŋ fiir ki set a bin pak ki biirɔ, ŋaan ki fit la u biit nba tee biaŋinba kaman nan ma daan bo dukii mi a la sii bi ki tee biaŋinba,

¹⁹ ŋaan bi kpan nɔi mɔniɔk ki jikit saa bi mɔŋ mɔŋ Yenjiantu po, nan jasɔɔ nba din kpo, ki u sann yi Yisa na, wunba ki Pɔɔl lek yeen yaa a u be u manfoor ni na.

²⁰ “Ki li maan jarin. Li paak, ki n bet Pɔɔl a li-i tee ki u loon ki wun saan Jerusalem ki n sa bu u maan leŋ, wun yetin.

²¹ Ki u yet a bii diau dansarik ni mɔkmɔk nan yoo nba ki bi tan sa saan nanɔ kpanbara yudaanɔ boor, ki wun saa jiar u maan maŋ. Ŋanne ki n tur mɔb ma bii guu-u, ki n tan te ki bin saan nanɔ kpanbara yudaanɔ na peŋ.”

²² Ki Bat Agripa yet Festus a “N mɔŋ mɔŋ loon ki n gbat nirɔ maŋ mɔb ni.” Ki Festus jiinɔ a “Wonnewa ki a won sa gbat u mɔb ni.”

²³ Ki li yent sanyiɔk ni, ki Bat Agripa nan u ŋaapoo Beniis muk mukit bonchiann, ki lanjimanba yudamm nan doo na yudamm wei bi poor ki baar kɔɔ buut diiuk na ni ki kar. Ki yudaanɔ Festus ji tun toomii a bin jii Pɔɔl ki baar nanɔ na.

²⁴ Ŋanne ki Festus yet a “Bat Agripa nan yimm nba kur be nna na, i la jɔɔ na nba nee, ki Juu teeb nba be nna na nan binba kur be Jerusalem baar n boor nna nan u maan, ki paanɔ, ki yakii kpayakit nanin, ki yaa a li ki ŋan ki wuu be.

²⁵ Ŋaan min ŋarin la ki u ki tun bisiat nba ki li jaŋ nan kuumi. Ki u mɔŋ mɔŋ bia yaa a u loon ki wun gaan u maan maŋ kpanbara yudaanɔ peŋe. “Tɔn, li paak ki n dukin ma n te ki wun saan.

²⁶ Ŋaan n ki mi ma sa sɔb gbouŋ ki tur kpanbara yudaanɔ na ki pakɔ linba ki saan gaan u po. Ŋanne te ki n baar nanɔ i kur numm nna, ŋaan li mantik kpaa fin Bat Agripae. Li paak, u buboit fiitu poorpo, n sii mɔk maan nba ki n sa fit ki sɔb ki tur kpanbara yudaanɔ maŋ,

²⁷ kimaan li kaa paak nan ki n te ki dansarkɔɔrɔ-n saan kpanbara yudaanɔ peŋ, ŋaan ki n kan fit wann wa biir linba.”