Toona 24 - Yennu Gbounpaauŋ Mɔɔr

Juu teeb nba paa Pɔɔl maan biaŋinba

¹ Tɔn, ki daa ŋaŋŋmu daar tan gar, ki Yennu jiantu yudaanɔ Ananias, nan saakab, nan lɔya wunba ki bi yiu Tetulus na, tan baar Siisarea ki saan yudaanɔ Fiiliks boor ni, ki bia yaa a bin paan Pɔɔl maan na. Ki Fiiliks te ki bi yiinɔ.

² Li yoo na ki Tetulus jak ki piak paa Pɔɔl maan, ki yeen a “Chanbaa Fiiliks, a paake te ki ti tiŋ na mei, nan a minu paak ki a yabii ki teen ti tiŋ na.

³ Siar kur po ti mɔk parpeenn nan linba na yoo kura, ki ti teena niipoouk bonchiann.

⁴ “N ki mantik loon ki n biir a yoo, ŋaan n barimae ki a di sukuru ki gbiint ti maan na waan.

⁵ “Ti la jɔɔ na ki u tee daamii nirɔe, ki bia jenna, ki u tuk Juu teeb, tingbouŋ na kur ni. Ŋɔɔe bia tee Nasareniinba yudaanɔ gbaa.

⁶ U daan loon ki wun biir Yennu jiantu ŋasaakak. Ŋanne te ki ti soorɔ ki ti daan bo loon a tin bu u buute kaman nan ti sennu nba want biaŋinba na,

⁷ ŋaan ki lanjimanba yudaanɔ Lisias baar, ki tan kpir ti niib nan paŋ ki fatɔ ti peŋ.

⁸ Li poorpoe ki Chanbaa Lisias maŋ bia tur mɔb a binba paau mapaauk maŋ-n baar a boor nna, ki a mɔŋ mɔŋ mun-n tan boi ki fiitɔ, ki bann ta paau linba paakiie.”

⁹ Ŋanne ki Juu teeb mun bia yaa a “Li kpan set tee mɔniie.”

Pɔɔl nba piak nyint u mɔŋ biaŋinba

¹⁰ Li yoo na ki yudaanɔ na wann Pɔɔl nuu a wun fiir pak. Ki Pɔɔl yet a “N mi nan fa teen timm Juu teeb na barbuurɔ, li dii bina bonchiann. Li paak, li teenin parpeenn nan ma yaa n pak n mɔŋ mɔŋ paak a boor nna.

¹¹ “Li-i tee ki a loon, a sa boi ki bann nan li ki gar kaman nan dapiik nan ŋannlee nna ki n daan doo Jerusalem, ma n saa jiant Yennu.

¹² Ki Juu teeb daan ki la ki n nɔi mɔnɔsiɔk nan sɔɔ Yennu jiantu ŋasaakak ni, amii ki tikii niib ki fiint bi wutoa Yenjiantu diit ni, amii doo maŋ ni biaki.

¹³ Bi bia kan fit ki wann linba ki birsuk kaa, ki bi paan mapaauk maŋi.

¹⁴ “Min beerae nan ma waa sɔnu nba ki Juu teeb yeen a li sɔnu ki ŋan na, ŋaan min lek jiantir ti yejamm Yennue. Linba sɔb Moses sennu gbant nan Yennu sɔkiniinba gbant ni na, n teen li kura yada,

¹⁵ ki mɔk dindann kaman nan binba paanin maan na mɔŋ mɔŋ mun bia mɔk li dindann booru nnee, nan Yennu tan sa fiin binba tee niŋamm nan binba tee nibiit kur kuun ni.

¹⁶ Ki li paak, n yabii n mɔŋ yoo kur ma n tun linba took sɔnu, ki n par-ii be fanu Yennu nan nisaarik boor ni.

¹⁷ “Tɔn, ma din nyii Jerusalem, li din yukir bonchiann na, ki n ji tan ŋmat leŋ ma n tur n niib likirii, ŋaan bia pi Yennu piinii.

¹⁸ Tɔn, sinsinn, ma daan ŋamm n mɔŋ gbenna, ki n daa be Yennu jiantu ŋasaakak ni, ki daa pi piinii maŋ, ki bi kɔɔ ki lan leŋ. Li yoo na niib daan ki yab ŋaak maŋ ni, ki fuut mun bia kaa.

¹⁹ Ŋaan ki Juu tesiab nba daan nyii Asia tiŋ ni na ŋarin daan be Yennu jiantu ŋasaakak na ni. Li-i bo-i tee ki bi la n biit, li bo kpaa talas ki bin bo baar ki paanin li maan.

²⁰ Ŋann-i kaa, fan ŋaan ki niib nba be nna na-n wann biit nba ki bi daan la ki n tun ma daan see bi tituk kaanu ni yoonba na.

²¹ Bi daan ki la n biiti, see bonyenn kuukɔɔ nba ki n daan yet bi sinsuuk ni, linba ki bi ki loon, ki n yaa a ‘Buut nba ki i bu nanin na tee ma yet yaa a kpeemm fiiru be na paake.’ ”

²² Fiiliks nba ŋarin mi Yisa weiu po bonŋann na, ki u nyik maan na, ŋaan yaa a “Lanjimanba yudaanɔ Lisias-i taŋŋi baar yoonba, n sa dukin i maan maŋ po,”

²³ ŋaan bet u lanjimanba saakɔyenɔ a wuu guu Pɔɔl, ki wuu be u yama ni, ŋaan bia chab Pɔɔl yɔɔsinba a bii teenɔ linba ki u loon.

Biaŋinba ki Pɔɔl pak ki teen yudaanɔ Fiiliks nan u ŋaapoo

²⁴ Ŋanne ki daa ŋaŋŋa nna tan gar, ki Fiiliks tan baar u buut boor nan u ŋaapoo Drusila, wunba din tee Juu nirɔ na, ŋaan te ki bi yiin Pɔɔl ki baar nanɔ. Ki ŋɔɔ Fiiliks gbiintir, ki Pɔɔl piak biaŋinba ki nirɔ sa teen Yisa Masia yada.

²⁵ Tɔn, Pɔɔl nba piak ki want yentinu nan mɔŋdianu nan buut daar baaru po yoonba, ki jaŋmaanii ji soor Fiiliks, ki u yet a “Mɔtana, i daa kii saa, ŋaan li-i tee ki n la yaak, n bia sa ŋamm yiina.”

²⁶ Ŋaan li yoo maŋ na ki Fiiliks bia lek loon Pɔɔl-n sa turɔ likirii. Li paake te ki u din tuu yɔɔ ki yi Pɔɔl ki piak nanɔ.

²⁷ Tɔn, bina ŋannlee poorpo ki Posius Festus mun gaar Fiiliks setu ki gaar yudant maŋ. Fiiliks nba din yaa wun nyik toonn na, ki u din loon ki wun penn Juu teeb para, ki ŋaan ki Pɔɔl be dansarik ni.