Toona 22 - Yennu Gbounpaauŋ Mɔɔr

¹ “Chanbaanba nan n naa waas, gbiintir man maan nba ki n yaa n pak ki turi na.”

² Ba gbat ki u piak bi mɔŋ mɔŋ maan ni na, ki bi ji ŋmin soonna. Ki u piak ki saa a

³ “N tee Juu nirɔe, ŋaan ki bi marin Tasus nba be Silisia yakir ni, ŋaan ki n tan ŋmant nirɔ Jerusalem nna. Ki n wanntɔɔ din tee Gamaliele. Ki u din wantin ti yejamm sennu chib chib. Ki n lek din waa Yennu nan nunmɔnn, kaman nan i kur nba waau dinna biaŋinba na.

⁴ Ma bia din tuu la niib nba waa Yisa sɔnu na, n din tuu mukisirib, ki bia poŋ kpib gbaa, ki bia din so jasiab nan poosiab ki kɔɔntib dansarii.

⁵ “Li-i tee ki i loon siara li po, Yennu jiantu yudaanɔ nan ti yudamm kur sa fit ki teen n siara linba ki n piak na paak nan li set tee barmɔniie; ki dasiar ki n tan saan gaar gbant bi peŋ ki tur Juu teeb nba be Damaskus na, ŋaan saan leŋ ma n saa soor niib nba waa Yisa sɔnu na, ki baamm bant, ki jen namm Jerusalem nna, ki bin dat bi tuba.

Pɔɔl nba betib u lebitu po biaŋinba

⁶ “Tɔn, ki dasiar ki n tan saa ki saa per Damaskus yensuuk ni, min taan taantir sɔɔ ki yentsaakar nyikint sanpagbann ni, ki sik yent ki lintima.

⁷ Ki n baa tiŋ ni, ki gbat kunkɔr yin a ‘Sɔɔl, Sɔɔl, bee ki a mukisirimi?’

⁸ Ki n jiin ki boi ma ‘N Yomdaanɔ, ŋmee?’ Ki u betin a ‘Min, Nasaret nirɔ Yisae, ki a mukisirin maŋ.’

⁹ Niib nba din chiantin na ŋarin din la yentu nawa, ŋaan ŋamm din ki gbat kunkɔr nba piak nanin na ŋarimi.

¹⁰ “Ŋanne ki n boiɔ ‘N Yomdaanɔ, n sa teen nlee?’ Ki ti Yomdaanɔ betin a ‘Fiit kii saa Damaskus, ki bi sa saa wanna linba kur ki Yennu nyinn a a tun.’

¹¹ Tɔn, n din jɔɔna, kimaan yentu nba din yent ki nyɔkit n ninbina ni na paak. Ki n tɔknanleeb na ji din dat n nuu ki saan nanin Damaskus.

¹² “Ki jasɔɔ nna mun din be Damaskus, ki u sann yi Ananias, ki u din tee yentinɔ, ki bia din dia Moses sennu fanu, ki Juu teeb kura nba be Damaskus na din teenɔ nibaakir bonchiann.

¹³ Ki u din baar n peŋ ki set, ŋaan yetin a ‘N naa bik Sɔɔl, nyɔɔntir!’ Li taakpaak ni na ki n nyɔɔnt ki lau.

¹⁴ Ki u betin a ‘Yennu nba tee ti yejamm Yennu na poŋ ganna a a bann u yanbɔɔtoona, a ki bia la popeendaanɔ Masia, a ki bia gbat u mɔŋ mɔŋ kunkɔr,

¹⁵ kimaan u loon fine-n teen u siara daanɔ, kii piak kii teen sɔɔ kur fa la linba ki bia gbat linba.

¹⁶ Li paak ki a ji kar ki guu bia? Fiit, ki n wura Yennu nyunwuru, ki Yennu sa nyik chab a toonbiit, fa sii yi Yisa sann na paak.’

¹⁷ “Tɔn, ki n ji din ŋmat Jerusalem, ki saa kɔɔ Yennu jiantu ŋasaakak ni, ki mei Yennu, ki tan la yerintu.

¹⁸ Ki n yerintu maŋ ni, ki n la ti Yomdaanɔ Yisa, ki u betin a ‘Kakitir ki nyi Jerusalem yian yian, kimaan li-i tee ki a beer Jerusalem teeb n maan, bi kan gaar maan maŋi.’

¹⁹ Ki n jiin a ‘N Yomdaanɔ, bi poŋ tuu mi nan mine tuu lin kɔɔ Yenjiantu diit ni, ki so niib nba waa a sɔnu na, ki boob kɔɔntib dansarii.

²⁰ Ki bia jenna, ba din yaa bin kpi a siara daanɔ Stiifen na, n mɔŋ mɔŋ mun din be leŋ, ki din loon ki bin kpiu. Mine bia din dia niib nba din kpiu na tiat.’

²¹ Ki ti Yomdaanɔ betin a ‘Finii saawa, a mine yaa n tuma niib nba be banfɔka ki ki tee Juu teeb na tinii ni.’ ”

²² Tɔn, Pɔɔl nba piak nna maŋ, ki niib na lek maak bi mɔŋ ki gbiint wa pak linba maŋ, ŋaan wa tan pak joont ki bi ji ki saki, ki tian tintianii sanpaapowa a “Jɔɔ na ki ŋan nan wuu be tingbouŋ na ni. Yimm taan lek kpimɔ man.”

²³ Ki bi yikin wuyikinii ki tian, ŋaan liatir bi tiat ki pat ŋakin, ŋaan wo tant ki yarin sanpaapo, bi wutoa nba doo na paak.

²⁴ Ŋanne ki Rom lanjimanba yudaanɔ na tur mɔb a bin jii Pɔɔl ki kɔɔ nanɔ tabdiiuk na ni, ŋaan bia betib a bin boou, ki wun bann biit nba ki u tun ki Juu teeb tian tintianii maŋ.

²⁵ Ki bi lorɔ, ŋaan ji yaa bin boou. Ŋanne ki u boi lanjimanba saakabik nba see leŋ na a “Min nba ki Rom teeb chabin yaak, ya daa ki bu n buuti, sennu na chabi a yin boomii?”

²⁶ Lanjimanba saakabik maŋ nba gbat nna yoonba, ki u saan bi yudaanɔ na peŋ, ki saa yetɔ a “A karee? Rom teeb tur jɔɔ na bi yaaka.”

²⁷ Ki lanjimanba yudaanɔ na mun fiir, ki tan baar boi Pɔɔl a “Betirin, Rom teeb set tura bi yaakee?” Ki Pɔɔl jiin a “Nn.”

²⁸ Ki lanjimanba yudaanɔ na yetɔ a “Min ŋarin din pa likirii saamewa ki bi chabin yaak maŋ.” Ki Pɔɔl yetɔ a “Ŋaan min ŋarin, ba marin, bi poŋ chabin yaak maŋa.”

²⁹ Li taakpaak ni na, ki lanjimanba nba bo loon ki bin boi Pɔɔl boot buboit na ji furin, ki ŋmat potuntuna jik. Ki jaŋmaanii ji soor lanjimanba yudaanɔ na, kimaan wa ji bann nan Rom teeb chab Pɔɔl bi yaak na, nan wa bia te ki bi lorɔ na paak.

Ba bu Pɔɔl buut biaŋinba

³⁰ Ŋanne ki lanjimanba yudaanɔ maŋ lek yabii a wun bann maan nba ki Juu teeb paan Pɔɔl na paak chib chib. Ki li ji tan yent sanyiɔk, ki u te ki bi lotɔ, ŋaan bia tur mɔb a Juu teeb jiantu yudamm na nan bi tituk kaanu damm kura-n tikir na, ŋaan te ki Pɔɔl baar set bi tɔɔnn po.