Toona 16 - Yennu Gbounpaauŋ Mɔɔr

Timoti po

¹ Li poorpoe ki Pɔɔl nan Sailas din tan baar Debe nan Listra, ki la Yisaweitɔsɔɔ, ki u sann yi Timoti, ki u be leŋ. U naa din tee Juu nirɔ nba tee Yisaweirɔe, ŋaan ki u baa din tee Griik nirɔ.

² Yisaweira kur nba din be Listra nan Ikonium na din pak Timoti po bonŋann.

³ Ki Pɔɔl bia din loon wun jiiu ki bii saa sɔnii. Ŋaan Juu teeb nba din be digbann kur yakir na ni kur din mi nan Timoti baa tee Griik nirɔe. Li paak ki Pɔɔl din pot Timoti punn.

⁴ Ki bi din saa doi ni, ki teen Yisaweira na sennu nba ki Yisa toomiinba na nan saakab din senn Jerusalem na.

⁵ Ki linba na chee Yisaweira maŋ para u sɔnu ni. Ki niib mun bia tee yada ki pukii Yisaweira po daar kur.

Pɔɔl yerintu lanu labaar

⁶ Ki bi din gar saan Frijia nan Galasia yaka po, ki loon bin saan Asia tiŋ ni, ŋaan Yennu Seyeeŋ din ki sak ki bin pak Yisa maan Asia tiŋ ni.

⁷ Ba din tan baar Misia yakir terik paak, ki bi kot a bin saan Bitinia yakir po, ŋaan ki Yisa Seyeeŋ din ki sak a bin saani.

⁸ Ŋanne ki bi din gar Misia yakir po, ki sik Troas.

⁹ Leŋe ki Pɔɔl din la yerintu nyiɔk, ki u la ki Masedonia nirɔ, ki u baar see ki barimɔ a “Pootir mɔkgbeŋŋir na ki baar Masedonia yakir po na, ki tan sommit.”

¹⁰ Pɔɔl nba la yerintu maŋ na, li taakpaak ni ki ti teen siir a tin saan Masedonia, kimaan ti ji din la nan Yennu betit a tin saan kii sii mɔɔntir Yisa barŋanii kii teen niib na leŋ.

Biaŋinba ki Lidia teen Yisaweirɔ

¹¹ Ŋanne ki ti bia kɔɔ ŋaruŋ, ki nyii Troas, ki tokin baar Samotras, ki li yent ki ti baar Neapolis. Leŋe ki ti nyik ŋaruŋ na,

¹² ŋaan tɔɔt ki gar baar Filipi, doo nba tee digbansaakar Masedonia yent ni na. Doo maŋ din tee Rom teeb yente. Ti din be doo maŋ ni ki li mann nan daa ŋaŋŋa nawa.

¹³ Ki foon daar ki ti nyii sik doo maŋ kpenu ni. Ti din mi a Juu teeb Yenmiaru boor tee leŋe, ki ti baar kar ki pak nan poob nba tikir leŋ na.

¹⁴ Poob nba din gbat ti maan maŋ, bi yenɔ sann din tee Lidia. U din nyii Tiatairae, ki din tee chinchenmuŋ nba ki li daauk paar na kɔɔtitɔɔ, ki bia din tee wunba jiantir Yennu. Ki Yennu din loot u par ni a wun sak Pɔɔl maan nba ki u piak na.

¹⁵ Ki ti din wur ŋɔɔ nan u ŋaateeb Yennu nyunwuru. Ki u din gɔɔrit, ki yet a “Li-i tee ki i mi a n set tee ti Yomdaanɔ yada nan barmɔniie, yin baar kii be n ŋaak ni.” Ŋanne ki ti baar ki kɔɔ be.

Ba kɔɔn Pɔɔl nan Sailas dansarik biaŋinba

¹⁶ Dasiar ki ti tan ŋmat saa Yenmiarboor na, ki sapaandaabir nna din mɔk u yomdamm, ki tan chetit. Ki narinbiiuk din be u ni ki yentɔ, ki narinbiiuk maŋ din teenɔ ninnyɔɔntɔɔ. U ninnyɔɔnsin maŋ ni, u din laat likirii bonchiann ki teen u damm na.

¹⁷ Ki u din waa timm nan Pɔɔl ki tian sanpaapo a “Niib na tee Yabint Yennu daabae. Bi mɔɔntir ki teen yimm doo na teebe biaŋinba ki i sa la tinnu.”

¹⁸ U din tian ki yikin nna ki li mann nan daa ŋaŋŋa nawa. Ŋanne ki Pɔɔl ji din tan miat nan u yikinii maŋ, ki jiant ki bet narinbiiuk nba be sapaamɔ maŋ ni na a “Yisa Masia sann ni, n tura mɔb, nyimin u ni!” Li taakpaak ni ki narinbiiuk na nyii u ni.

¹⁹ U yomdamm nba bann nan bi liknamu sɔnu na gbennii na, ki bi soor Pɔɔl nan Sailas, ki datib baar namm bi yudamm linlakin boor ni.

²⁰ Ba baar namm Rom teeb barbuura boor ni yoonba, ki bi yet a “Niib na tee Juu teebe, ki baat nan muksuk bonchiann ti doo paak,

²¹ ki wantit bi kaasia nba ki ti sennu ki chabit a tin gaar, kimaan ti tee Rom teebe.”

²² Ŋanne ki nibur nba be leŋ na mun jakib ki kpirib. Ki barbuura na soor Pɔɔl nan Sailas liata ki fɔb ki liat liat, ŋaan te ki bi boob nan lanbann.

²³ Ba boob bonchiann ki gbenn yoonba, ki bi ji jiib saan kɔɔmm dansarik, ŋaan bet dansarguurɔ na a wun kparib kenkenkema.

²⁴ Wa gbat bi mɔb maŋ, ki u mun jiib ki kɔɔmm dansarik diiuk maŋ ni pib piba, ŋaan baamm daat baana.

²⁵ Ki li din tan tee kaman nan tansuunii na, ki Pɔɔl nan Sailas din tan mei Yennu ki yiin yanii ki piakɔ, ki dansarkɔɔleeb na ji gbiintirib.

²⁶ Yiama ki tiŋ jek bonchiann ki ŋak dansarik na fiaka. Li taakpaak ni ki tammɔi loot, ki jarit nan baana yabit yommii na kur nii nan bi taa ni, ki baa baa.

²⁷ Li yoo na ki dansarguurɔ na fiir gɔɔn ni, ki la yommii na tammɔi ki li loot yaa yaa, ki u dukin mi a yommii maŋ kur nyiie, ki u nɔɔt u jukbanjiak ki loon wun kpi u mɔŋ.

²⁸ Ki Pɔɔl tian sanpaapowa a “Daa tee a mɔŋ daŋi, kimaan ti kur be.”

²⁹ Ŋanne ki guurɔ na yaa a bin too muu, ŋaan faar kɔɔ yommii diiuk maŋ ni, ki gbaan wook ki jekir Pɔɔl nan Sailas tɔɔnn,

³⁰ ki tan fiir nyinnib, ŋaan boib a “Chanbaanba, n sa teen nlee ki la tinnu?”

³¹ Ki bi jiin a “Teent ti Yomdaanɔ Yisa yada, ki a ŋaateeb-n mun teenɔ yada, ki i sa la tinnu,”

³² ŋaan pak Yennu maan ki tur ŋɔɔ nan u ŋaateeb kura.

³³ Li yoo maŋ nyiɔk na, ki u jiib ki wuur bi fiat na. Li poorpoe ki bi wur ŋɔɔ nan u ŋaateeb na kura Yennu nyunwuru.

³⁴ Ki u bia tan jii Pɔɔl nan Sailas ki saan namm u ŋaak ni, ki saa turib jeet ki bi dii. Ki ŋɔɔ nan u ŋaateeb ji mɔk parpeenn ki li saa yakir, kimaan ba teen Yennu yada ki kpint ki teen Yisaweira na paak.

³⁵ Li din yent sanyiɔko, ki Rom teeb barbuura na din tun lanjimanba dansarguurɔ na boor ni a bin yetɔ a “Ŋaan jab maŋ ki bin saan.”

³⁶ Ki dansarguurɔ na bet Pɔɔl a “Barbuura na tun lanjimanba a n te ki fin nan Sailas-n nyi. Li paak na, i nyi man kii saa nan laafia.”

³⁷ Ki Pɔɔl jiant bet lanjimanba na, “Bi daa ki bu ti buuti, ŋaan won boot nan lanbann niwor ni, ŋaan ti lek tee binba ki Rom teeb chabit bi yaak na, ki i barbuura bia won taan jiit ki lut dansarik ni, ki mɔtana ki bi ji loon bin bɔr nyinnitii? Waa! Ŋann kan teeni. Ŋaant ki barbuura maŋ-n baar bi mɔŋ ki tan nyinnit.”

³⁸ Ki lanjimanba na ŋmat ki saa bet barbuura maŋ Pɔɔl nba pak biaŋinba na. Barbuura maŋ nba ji bann nan Pɔɔl nan Sailas tee binba ki Rom teeb chabib bi yaak na, ki jaŋmaanii ji soorib.

³⁹ Li paak, ki bi baar Pɔɔl nan Sailas peŋ, ki tan teemm gafara, ŋaan nyinnib dansarik na ni, ki barimm a bin lek nyi bi doo ni.

⁴⁰ Ki Pɔɔl nan Sailas seet leŋ, ki saan kɔɔ Lidia ŋaak ni. Ki Yisaweira tan baar; ki bi pak Yisa maan ki cheen bi para, ŋaan yaat.