Rom Teeb 4 - Yennu Gbounpaauŋ Mɔɔr

Abraham labaar

¹ Tɔn, ti sa yet a bee ki jikit saa ti yeja Abraham po, nan u binbeŋ po?

² Wa din waa sennu na-i diŋŋi te ki Yennu yet a u tee niŋanɔ u tɔɔnn, u bo sii mɔk linba bo sa te ki u mɔk parbifaant, ŋaan u kii mɔk parbifaant Yennu tɔɔnni.

³ Li sɔb Yennu gbouŋ ni a “Abraham din teen Yennu yadae, ki u yada maŋ paake ki Yennu jiiu ki u tee niŋanɔ u tɔɔnn.”

⁴ Li-i tee ki nirɔ tuun toona, u nyɔɔt kii tee piinii kaa, ŋaan li sii tee paauko.

⁵ Ŋaan nirɔ nba ki teen sennu weiu na yada, ŋaan teen Yennu wunba nyikit biitdamm bi biit ki chabitib na yada, Yennu sa jii li daanɔ ki u tee niŋanɔ u tɔɔnn; li daanɔ yada paake ki Yennu sa jiiu.

⁶ Nnee ki David din yet a daanɔ nba ki Yennu jiiu ki u tee niŋanɔ u tɔɔnn ki li ki tee a u toonŋana paak kaa, li daanɔ mɔk parpeenn bonchiann.

⁷ David din yet a “Damm nba ki Yennu nyik bi biit ki chabib ki kpeen bi biit na, bi mɔk parpeenn;

⁸ Damm nba ki Yennu ki tian bi toonbiit po, bi mɔk parpeenn.”

⁹ Li parpeenn maŋ tee binba pot na kuukɔɔe yar amii? Aaii, nan binba ki pot na mun yaa yare. Ti poŋ bo yet a li sɔb Yennu gbouŋ ni a “Abraham din teen Yennu yadae, ki u yada maŋ paake ki Yennu jiiu ki u tee niŋanɔ u tɔɔnn.”

¹⁰ Nlee yooe ki Yennu din jiiu nna? Yennu poŋ din yiu niŋanɔewa ki u tan pot amii u din potewa ki Yennu yiu niŋanɔ? Aaii, Yennu poŋ din yiu niŋanɔewa ki u tan pot.

¹¹ U din pota, ŋaan u potu maŋ tee siara nba want nan u yada maŋ paake ki Yennu poŋ din jiiu ki u tee niŋanɔ, li poorpoewa ki u ji tan pot. Li paak, binba kur tee Yennu yada ŋaan ki pot na, Abraham tee bi baae; ba tee Yennu yada paake, ki Yennu yib niŋamm.

¹² Abraham tee binba pot na mun yaa baae, li ki tee a ba pot na paak kaa, ŋaan ba bia waa biaŋinba ki ti baa Abraham din teen Yennu yada na, li poorpoewa ki u din tan pot; bi yada paake ki Abraham tee bi baa.

Ta gaar Yennu mɔsonn yada paak biaŋinba na

¹³ Yennu din senn mɔsonn ki tur Abraham nan u yaaboona a tingbouŋ na tan sii tee bi yare, li din ki tee nan Abraham nba waa sennu na paak kaa ki Yennu senn li mɔsonni, ŋaan li din tee u yada paake nan Yennu nba din jiiu ki u tee niŋanɔ u tɔɔnn na.

¹⁴ Li-i bo-i tee ki Yennu mɔsonn na tee binba dia sennu maŋ yarie, ŋann ŋanin, nirɔ yada bo sii tee yanne, ki Yennu mɔsonn bo kii mɔk nyɔɔti.

¹⁵ Sennu nee baat nan Yennu wutoor li mɔyêtuk paak, ŋaan bi-i kii senn sennu, mɔyêtuk sii kaa.

¹⁶ Yennu mɔsonn na tee binba teenɔ yada na yare; u ninbatinu paak, ki u senn mɔsonn maŋ ki li set tee Abraham yaaboona kur yar, li ki tee a binba waa sennu na kuukɔɔ yar kaa, ŋaan binba kur teen Yennu yada kaman nan Abraham nba din teen biaŋinba, kimaan ŋɔɔ Abrahame tee ti kura baa

¹⁷ kaman nan la sɔb Yennu gbouŋ ni ki u yet Abraham a “N teena nibooru bonchiann baae.” Li paak, Yennu boor Abraham tee ti baae, Yennu wunba ki Abraham teenɔ yada na, ŋɔɔe te ki kpeemm laat manfoa, ki bia piak linba daa ki be po kaman nan li set be.

¹⁸ Siar din ki want dindann ŋaan Abraham lek ji din mɔk dindann nan Yennu sa turɔ bika, ki bia teen yada, ki u yada teenu paak ki u din teen nibooru bonchiann baa kaman nan Yennu nba yetɔ a “A yaaboona tan sa pɔt bonchiann.”

¹⁹ Abraham din la nan bina kobik na, ki din mi nan u gbanant kpeta, ki u ŋaapoo Sara bia din tee pookanmatire, ŋaan nan li kura gbaa, Abraham yada din ki wati.

²⁰ U mantik din teen Yennu yada, u din ki mɔk birsuk nan Yennu mɔsonn na, u yadae din te ki u mɔk paŋ bonchiann, ki u din piak Yennu.

²¹ U mantik din teen Yennu yada ki ki birisi, ki mi nan Yennu nba senn biaŋinba, u set sa fit tuma.

²² Li paak, ki “Yennu jiiu ki u tee niŋanɔ,” kimaan u teen Yennu yada.

²³ Ŋaan Abraham kuukɔɔ paak kaa ki li sɔb Yennu gbouŋ ni a “Yennu jiiu ki u tee niŋanɔ,”

²⁴ ŋaan li sɔb ki teen timm nba ki Yennu sa gaarit mun ki ti tee niŋamm u tɔɔnn, kimaan ta teenɔ yada, ŋɔɔ Yennu wunba fiin ti Yomdaanɔ Yisa kuun ni na.

²⁵ Ŋɔɔe din jii Yisa ki chab ki u kpo ti toonbiit paak, ŋaan bia fiinɔ kuun ni, a wun te ki tii tee niŋamm u tɔɔnn.