Barŋanii nba ki MAK din sɔb nae na 5 - Yennu Gbounpaauŋ Mɔɔr

Yisa nba din nyinn narinbiit jasɔɔ ni biaŋinba

¹ Ki Yisa nan u poorpoweiteeb poot Galilee mɔkgbeŋŋir na gbingbanleer po, Gerasa tingbouŋ ni.

² Yisa nba nyii burgbetir na ni yoonba, li taakpaak ni ki jasɔɔ nyii kaat ni ki chetɔ. Narinbiiuk din be jɔɔ na ni,

³ ki u dɔɔ kaat na ni. Sɔɔ din kaa ki sa fit baanɔ banti, ki bia kan fit lorɔ nan jarit gbaa;

⁴ kimaan bi-i baan u nii nan u taa bant, ŋaan u din tuu yan bant na kura ki bia cheer kut na u taa ni. U din mɔk paŋ bonchiann, ki sɔɔ ki fit gɔɔrɔ.

⁵ Nyiɔk nan yennu ni kur ki u lin kaat nan jɔɔt ni ki yikin ŋaan dia tana ki ŋma u mɔŋ.

⁶ Wa din daa be banfɔkira ŋaan la Yisa yoonba, ki u tin ki tan gbaan Yisa tɔɔnn ni,

⁷ ŋaan yikin sanpaapowa ki yet a “Yisa wunba tee Yabint Yennu Bija, min nan fin nlee mantiki? Yennu paak ki n barima, a daa mukisirimi.”

⁸ U yet nnae, kimaan Yisa poŋ yakii nan narinbiiuk na a “Fin narinbiiuk na, nyin jɔɔ na ni.”

⁹ Li poorpo ki Yisa boiɔ a “A sannii?” Ki u jiin a “N sann yi Bure, kimaan ti yab bonchiann.”

¹⁰ Ki narinbiit na te ki jɔɔ na barin Yisa a li-i tee ki u sa nyinnib jɔɔ na ni, u daa nyintib tiŋ na ni.

¹¹ Ŋanne ki doorii bonchiann see jɔɔr na paak ki di jeet.

¹² Ki narinbiit na barin Yisa a, “Chabint ki tin saan kɔɔ doorii na ni.”

¹³ Ki Yisa chabib sɔnu, ki bi nyii jɔɔ na ni, ki kɔɔ doorii na ni. Ki doorii na tin sik mɔkgbeŋŋir na ni ki saa dii nyun bi kura. Doorii na kann din tee kaman nan tusa ŋannlee na.

¹⁴ Ki binba guu doorii na fiir ki chiar ki saa mɔɔnt li labaar doo ni nan kpaant ni. Ki niib baar a bin la linba tun maŋ kura.

¹⁵ Ba baar Yisa boor ni yoonba ki la jɔɔ nba ki narinbur bo be u ni na, ki u ji kar leŋ nan laafia nan u dudukit kura fanu ki ji lia tiat, ki jaŋmaanii soorib.

¹⁶ Ki binba lar nan bi nunii na betib linba tun ki tur jɔɔ na, ki bia betib doorii na labaar.

¹⁷ Ŋanne ki niib na barin Yisa a wun nyi bi tiŋ ni.

¹⁸ Yisa nba din tee siir a wun saan kɔɔ burgbetir na yoonba, ki jɔɔ nba ki Yisa nyinn narinbiit u ni na barimɔ a “Ŋaant ki min nan fin-n lakin saan.”

¹⁹ Ŋaan ki Yisa ki sak, ŋaan betɔ a “I ŋmat kii kun a niib boor ki saa betib a Yomdaanɔ nba tina ninbaauk biaŋinba, ŋaan bia tun toonjaann ki tura.”

²⁰ Ŋanne ki jɔɔ na ji lin tingbouŋ nba ki bi yir Doi-piik na ni, ki mɔɔntir linba kur ki Yisa tun turɔ maŋ, ki li teen sɔɔ kur yaarlituk.

Jairus bonpobik baatuk labaar

²¹ Li poorpo ki Yisa bia ŋmat poot mɔkgbeŋŋir na gbingbanleer. Wa saa baar mɔk-pootir na, ki niburchiauŋ tikir ki lintɔ.

²² Ki jasɔɔ baar leŋ, ki u sann yi Jairus; u din tee Yenjiantu diiuk ni saakɔsɔɔe. Jɔɔ na nba la Yisa yoonba ki u gbaan Yisa tɔɔnn ni,

²³ ki barimɔ nan u par kura a “N bonpobike yiar ki per kuuma. A kan baar na ki tan yii a nii u paak ki wun lek la laafia ki tinnii?”

²⁴ Ŋanne ki ŋɔɔ nan Yisa ji saa u ŋaak ni. Ki niburchiauŋ mun bia waa ki muk ki tut Yisa.

Poosɔɔ nba sii Yisa liatir ki la paaku biaŋinba

²⁵ Poosɔɔ nna mun din be ki siik faboŋ ki tan jaŋ bina piik nan ŋannlee,

²⁶ ki lin tebteeb bonchiann boor ni a wun teb u mɔŋ, ki tan gbenn u likirii, ŋaan ki yiaru na bia pukii yoo kur.

²⁷ Ki poo na tan gbat Yisa po; li paak, ki u baar nibur na ni, ki waa u poorpo, ŋaan bikii u par ni a

²⁸ “Mi-i lekii sat sii u liatir kuukɔɔie, ŋaan n sa la laafiawa;”

²⁹ ŋaan set tan sii u liatir. Li taakpaak ni ki u faboŋ na ji din jit; ki u bann u gbanant ni nan u la laafia u yiaru na niwa.

³⁰ Li yoo ki Yisa bann u par ni a paŋ nyii u niwa. Ki u gbia boi niib na a “Ŋmee sii n liatiri?”

³¹ Ki u poorpoweiteeb mun ŋmant boiɔ a, “Fin la ki niburchiauŋ na muka nna, ŋaan ki a boit a ŋmee siitani?”

³² Ŋaan ki u lek bia gorii lintir, a wun la nisɔɔ nbae siiu.

³³ Ŋaan poo na nba bann linba tun u gbanant ni na paak, ki jaŋmaanii soorɔ, ki u jekir yɔr yɔr, ki baar tan gbaan Yisa tɔɔnn ni, ŋaan betɔ barmɔnii kur.

³⁴ Ŋanne ki Yisa betɔ a “N niipoo, fa teenin yada na paake te ki a la laafia. I saa nan parmaasir, ki a yiaru kur gbenna.”

Yisa nba fiin bonpobik na kuun ni biaŋinba

³⁵ Yisa nba daa be piak linba na ki siab nyii saakɔɔ na ŋaak ni ki baar ki tan yetɔ a “A bonpobik na taan kpowa. Bee ki a ji mukis Wanntɔɔ na?”

³⁶ Ki Yisa lek ki fiin ba yet linba na, ŋaan bet saakɔɔ na a “Daa tiin jaŋmaanii. Teentin yada kuukɔɔ.”

³⁷ Ŋanne ki Yisa ki sak ki sɔɔ-n weiɔ saan ŋaak na ni, see Piita nan Jems nan u waarɔ Jɔɔnn.

³⁸ Ba din baar ŋaak na ni yoonba ki Yisa gbat fuut nan kpemɔnii.

³⁹ Ŋanne ki u kɔɔ ki boib a “Bee fuute nna mani? Bee ki i bui? Bik na ki kpo kaa, ŋaan u gɔɔnte.”

⁴⁰ Ba gbat u barii na ki bi laau. Ŋanne ki u berib nyinnib, ŋaan jii bik na baa nan u naa ki pukin u poorpoweiteeb banntaa na po, ki bi kɔɔ diiuk ni, bik na nba dɔɔ siaminba na.

⁴¹ Ba kɔɔ yoonba, ki u soor bik na nuu ŋaan yetɔ a “Talitha kumi.” Li paak tee, “Bonpobik, mii beta, fiit.”

⁴² Li taakpaak ni ki bonpobik na fiir set kakibii, ki somm lin. (U din tee bina piik nan ŋannlee bike.) Ki li yaar ŋaan litib bonchiann.

⁴³ Ŋaan ki Yisa kpaamm a bii mi ki bin yet sɔɔ, ki bia betib a bin tur bik na jeet ki wun di.