Matiu 3 - Yennu Gbounpaauŋ Mɔɔr

Jɔɔnn nba din wuur niib Yennu nyunwuru na labaar

¹ Li yoo maŋ na, Jɔɔnn nba wuur niib Yennu nyunwuru na din be muuk ni, Judea tingbouŋ ni, ki mɔɔntir Yennu barŋanii ki yeen a

² “Nyikin man i biit, kimaan Yennu naan dinu per na.”

³ Yennu sɔkinii Aisaya din poŋ sɔb ŋɔɔ Jɔɔnn poewa a “Nisɔɔ tan sii be muuk ni ki hoot ki yaa a ‘Ŋammit man ti Yomdaanɔ baaru sɔnu ki turɔ, ki bia ŋamm u sɔnii ki lii took.’ ”

⁴ Jɔɔnn din lia lagumii kobit liatire, ki bia boob gbann u siak ni, ki u jeet din tee naasuut nan siate.

⁵ Li yoo ki Jerusalem doo ni teeb, nan Judea tingbouŋ ni teeb kur, nan Jɔɔdann mɔkir tingbouŋ ni teeb kur din saan u boor ni,

⁶ ki fiit bi toonbiit, ki u wurib Yennu nyunwuru Jɔɔdann mɔkir maŋ ni.

⁷ Wa din tan la ki Farisiinba nan Sajusiinba bonchiann ki bi mun baat u boor ni a wun wurib Yennu nyunwuru na, ki u betib a “Yimm walabirii na! Ŋmee kpaani a yii tin ki nyi Yennu wutoor nba yaa lin baar i paak na ni?

⁸ Yii tuun man linba sa wann nan i set nyik i biit.

⁹ I daa mɔk parbifaant nan Abraham tee i yeja; n beerie, Yennu sa fit ki fiin tana nba na ki lin kpant Abraham yaaboona.

¹⁰ Pajar poŋ teen siira a wun chɔɔ tiinii; ki tiik nba kur ki loon lɔɔnŋana, bi sa chɔɔre ki lur muu ni.

¹¹ Min ŋanin wuuri nyun ki li want nan i nyik i biita, ŋaan wunba yaa wun baar n poor po na cheen; ki n poŋ ki ŋan nan ki n jii u taasaati; ŋɔɔe sa jii Yennu Seyeeŋ nan muu ki wuur i para.

¹² U dia u dilenn ŋmanniie ki yaa wun lenn bonŋann, ki nyinn dibin ki wuun u bɔɔr ni, ŋaan joo fouŋ na muu nba kan mi ki kpeenni.”

Jɔɔnn nba din wur Yisa biaŋinba

¹³ Li yoo maŋ ki Yisa din nyii Galilee ki saan Jɔɔdann mɔkir po, ki baar Jɔɔnn boor ni a wun wurɔ Yennu nyunwuru.

¹⁴ Ki Jɔɔnn ki saki, ki yetɔ a “Mine bo sa baar a boor ni ki a wurin, ŋaan ki a mun tan baat n boor ni-ii?”

¹⁵ Ŋaan ki Yisa yetɔ a “Ŋaant ki lin tun nna mɔtana, kimaan nnee ki li ŋan ki tin tun toonŋana kura.” Li yoo na ki Jɔɔnn sak.

¹⁶ Wa wur Yisa Yennu nyunwuru ki gbenn yoonba, li taakpaak ni ki Yisa nyii nyun na ni; ki sanpaapo tan loot, ki u la ki Yennu Seyeeŋ siik u paak ki naan nan ŋmann na, ki tan jakin u paak.

¹⁷ Ki kunkɔr nyii sanpaapo ki yet a “N Bilonkakii na, ŋɔɔe ki n numm gboou.”