Matiu 26 - Yennu Gbounpaauŋ Mɔɔr

Yudamm nba din lor a bin kpi Yisa biaŋinba

¹ Yisa nba din pak maan maŋ kur ki gbenn yoonba ki u bet u poorpoweiteeb a

² “I mi nan daarpoe tee yukitgar tiaru jaamm, ki bi daan sa jii min nisaarik Bik ki tur niib a bin kpaan dapunpunn paak.”

³ Li yoo maŋ ki Yennu jiantu yudamm nan Juu teeb saakab din tikir leeb Kayafas ŋaak ni, wunba tee Yennu jiantu yudamm saakɔɔ na.

⁴ Bi din lor ba sa teen biaŋinba ki bɔr soor Yisae ki kpiu.

⁵ Ŋaan bi din lor a bi kan soorɔ jaamm daa ni, kimaan bi-i teen nna see ki kpikpiruk baar.

Poosɔɔ nba din but tulaarii Yisa yur paak biaŋinba

^6-7 Tɔn, Yisa nba din tan be Betani doo ni, Simon nba din tee gbaatir na ŋaak, ki kar di jeet, ki poosɔɔ din kɔɔ ki dia salenŋann, ki tulaarii nba ki li daauk paar bonchiann din gbee leŋa, ki baar tan but Yisa yur paak.

⁸ Ki Yisa poorpoweiteeb na nba din la nna yoonba ki bi piak burin nan wutoor ki yeen a “Bee ki poo na biir tulaarii na nna mani?

⁹ a kimaan bi bo sa fit kɔir ki gaar likirii bonchiann ki somm talasdamm.”

¹⁰ Ki Yisa din bann bi bunburimii maŋ, ki boib a “Bee teen ki i burin ki daan poo na? Bonŋanne ki u tun ki turin maŋ.

¹¹ Talasdamm ŋanin sii yɔɔ be i boor ni yoo kura, ŋaan min ŋanin kii yɔɔ be nna kaa.

¹² Tulaarii nba ki u but n paak na, u teen n piinu siire.

¹³ Barmɔniie ki n beeri na, siaminba kur ki bi sa mɔɔnt barŋanii na tingbouŋ na ni, bi bia sa mɔɔnt poo maŋ nba tun linba na, ki lii tee tiarime ki turɔ.”

Biaŋinba ki Judas din sak nyii Yisa poor

¹⁴ Li yoo na ki Yisa poorpoweiteeb na ni yenɔ, wunba ki bi yiu Judas Iskariot na, nyii ki saan Yennu jiantu yudamm boor ni,

¹⁵ ki saa boib a “I sa turin bee ŋaan ki n lon sɔnii ki Yisa-n kɔɔ i nuu ni?” Ki bi kan sarima likibin piinntaa ki turɔ.

¹⁶ Ki la din nyii li yoo maŋ ki jii saa ki u lon sɔnii nba ki u sa jii Yisa ki kubinɔ bi nuu ni.

Yisa nan u poorpoweiteeb nba din dii yukitgar tiaru jaamm biaŋinba

¹⁷ Ki boroboro nba ki bi din ki tee datiŋ na jaamm piinu daar, ki Yisa poorpoweiteeb din baar u boor ni, ki tan boiɔ a “A loon ki tin saan lee ki saa teen siir ki guuna yukitgar tiaru jaamm na dinu?”

¹⁸ Ki u betib a “I saa man doo na ni jasɔɔ nna ŋaak ni, ki saa betɔ a ‘Ti Wanntɔɔe tumit a ti tan beta a u yoo per na, ki u loon ŋɔɔ nan u poorpoweiteeb-n di yukitgar tiaru jaamm a ŋaak nna.’ ”

¹⁹ Ki u poorpoweiteeb mun din tun nan wa wannib biaŋinba na, ki din teen jaamm maŋ jeet siir.

²⁰ Dajouk nba din tan baar, ki Yisa nan u poorpoweiteeb piik nan bannlee na kɔɔ ki kar a bin di.

²¹ Ba din di yoonba ki Yisa yetib a “Barmɔniie ki n beeri na, i ni yenɔ sa nyi n poor ki fikisin.”

²² Ki u poorpoweiteeb na para ni din biir bonchiann, ki bi piin ki boiɔ yenɔ yenɔ a “N Yomdaanɔ, barmɔnii, a yeen minee?”

²³ Ki u jiin ki yet a “Wunba ki min nan ŋɔɔ lakin sukii kpinsenyeŋ ni nee sa nyi n poor.

²⁴ Min nisaarik Bik set sa kpo kaman nan Yennu gbouŋ nba wann biaŋinba nee, ŋaan bonbiir sii be wunba yaa wun nyi n poor na paak. Bi-i bo-i diŋŋi kii mar li daanɔ gbaa, li bo din sɔ.”

²⁵ Ŋanne ki Judas wunba yaa wun nyi u poor na mun din boiɔ a “Wanntɔɔ, a yeen minee?” Ŋanne ki Yisa jiin ki betɔ a “Nn, fine yaa.”

Ti Yomdaanɔ jeet dinu po

²⁶ Ba tan kar di jeet yoo nba na ki Yisa jii boroboro, ki tur Yennu niipoouk li paak, ŋaan ŋmit ŋmit, ki tur u poorpoweiteeb, ŋaan betib a “Gaat man ki di. Nee tee n gbanant.”

²⁷ Ki u bia din jii nyunyuŋmaŋ nan tilɔɔna nyun, ki tur Yennu niipoouk li paak, ki jiir ki turib ŋaan betib a “Gaat man, ki i kura-n nyu.

²⁸ Linba nee tee n sɔn nba sa te ki Yennu mɔsonn-n set nan barmɔnii, sɔn nba tan sa nyi n gbanant ni, nisaarii bonchiann paak, a Yennu-n nyik chab bi biite na.

²⁹ N beerie, n kan mi nyu tilɔɔna nyun maŋ, see daar nba ki min nan yimm tan sa lakin nyu li bonpaann n Baa Yennu naan ni sanpaapo.”

³⁰ Ŋanne ki bi din yin Yenjiantu yanii, ŋaan nyii ki saan Olif Tiinii kunkonn paak.

Yisa nba din yet a Piita sa nɔi a u ki miu biaŋinba

³¹ Li yoo na ki Yisa din betib a “Nyiɔk na, i kura sa tin ŋaan nyikima, kimaan li sɔb Yennu gbouŋ ni a ‘Yennu tan sa kpi pekpaarik na, ki pei nba ki u tuu kpaarib na sa tin yat.’

³² Ŋaan mi-i taŋŋi fiir kuun ni, li poorpo, n sa liit i tɔɔnn ki saan Galilee.”

³³ Ki Piita jiin ki yetɔ a “N Yomdaanɔ, sɔɔ kur-i lekii taŋŋi tin ki nyika, ŋaan min ŋanin kan mi tin ki nyikani.”

³⁴ Ki Yisa jiin ki betɔ a “Barmɔniie ki n beera na, dinna nyiɔk na, nan kojousinsinn-n tan bui na, ki a nɔi taar munntaawa a a ki mimi.”

³⁵ Ki Piita jiin a “Li-i lekii baar a min nan fin-n lakin kpo gbaa, n kan mi ki nɔi a n ki miani.” Ki u poorpoweiteeb na kura mun din yet nna.

Yisa nba din miar Yennu nan nunmɔnn biaŋinba

³⁶ Ŋanne ki Yisa nan u poorpoweiteeb din saan siaminba ki bi yi Getsemane na; ki u saa betib a “Yii be nna man, ŋâan ki n gar i tɔɔnn po na ki saa miar Yennu.”

³⁷ Ki u jii Piita nan Sebedee waas bannlee na ki pukin u mɔŋ po. Ki u la parbiir nan yanyetuk,

³⁸ ki betib a “Parbiir booru nba soorin na per lin kpima. Biat nna man kii nyɔi nanin.”

³⁹ Ŋanne ki u chat ki saan waaminna bi tɔɔnn po, ki gbaan tiŋ ni, ŋaan mei Yennu ki yeen a “N Baa, li-i bo-i sa fiti, fan ŋaan ki fara nba baat n paak na-n yakirin. Ŋaan ŋaant ki a loommo-n tun, ki li daa tee n loommu.”

⁴⁰ Ki u tan ŋmat u poorpoweiteeb banntaa na boor ni, ki baar sɔɔ ki bi gɔɔnt; ki u boi Piita a “I lek kan fit kii nyɔi nanin yoo waamii?

⁴¹ Yii nyɔi man ŋaan kii mei Yennu ki i tan daa kɔɔ jinjammii ni, kimaan i sei ŋanin loon lin tun linba ŋan, ŋaan ki i gbanant kaa yaaki.”

⁴² Ki u din ŋmat taar munnlee ni ki saa mei Yennu ki yeen a “N Baa, li-i tee ki fara nba baat n paak na kan fit garin ŋann see ki n diir, ŋaant ki a loomm-n tun.”

⁴³ Ki u bia ŋmat ki saa baar sɔɔ ki u poorpoweiteeb na bia gɔɔna, kimaan gɔɔn din mɔkib bonchiann.

⁴⁴ Ki u bia ŋmat taar munntaa ni, ki saa mei Yennu ki yeen li biaŋ nan wa bo miar sinsinn na.

⁴⁵ Ŋanne ki u ŋmat ki baar u poorpoweiteeb maŋ boor ni ki tan boib a “I bia lek daa gɔɔnte ki foi-ii? Gotir man, yoo maŋ per na. Bi jii min nisaarik Bik na ki teenin biitdamm nuu niwa.

⁴⁶ Fiit man ki tin saan. Gotir man, wunba nyii n poor na pera.”

Ba soor Yisa biaŋinba

⁴⁷ U mɔb daa din ki baa tiŋi, ki Judas wunba tee u poorpoweiteeb na ni yenɔ dɔkit nan niburchiauŋ, ki siab dia jukbanjai, ki siab mun dia gbajara, ki nyii Yennu jiantu yudamm nan saakab boor ni.

⁴⁸ Judas wunba nyii u poor na poŋ daan wann niib maŋ nyinsiare a “Mi-i sai foont wunba ki mɔɔt u tankpinn, yii mi nan ŋɔɔe na, ki yin soorɔ man ken ken man.”

⁴⁹ Judas nba tan baar yoonba, li taakpaak ni ki u saan ki saa set Yisa peŋ ŋaan yetɔ a “N Yomdaanɔ, a nyiɔk po,” ŋaan mɔɔt u tankpinn.

⁵⁰ Ki Yisa jiant betɔ a “N yɔɔk, toonbooru nba ki a baar a a tan tun na paakii?” Li yoo na ki niib na ji wuur baar ki tan bib Yisa.

⁵¹ Ŋanne ki u poorpoweiteeb na ni yenɔ taan kakit nɔɔt jukbanjiak ŋaan chɔɔ pot Yennu jiantu yudaanɔ daabir tubir ki lu.

⁵² Ŋaan ki Yisa betɔ a “Jiint a jukbanjiak maŋ ki nɔɔn li took ni, kimaan wunba kɔn nan juk, u kpenn juk kuume.

⁵³ Nnara, n bo sa fit miar n Baa Yennu sommir po, ki u bo sa tun malakanba yiama, ki bin gar tusa piik nan ŋannlee.

⁵⁴ Ŋaan mi-i teen nna, nlee ki li sa tun ki gbeen linba sɔb Yennu gbouŋ ni ki yet a see ki n di fara nba baat na?”

⁵⁵ Ŋanne ki u boi niburchiauŋ na “I baar nan jukii nan gbajara a i tan soorin kaman nan n tee fatitɔɔe na-aa? N daan tuu be Yennu jiantu ŋasaakak ni daar kura ki want niib Yennu maan, ŋaan ki i tuu ki somi.

⁵⁶ Ŋaan linba na kur tun na a lin gbeen Yennu sɔkiniinba nba din sɔb linba Yennu gbouŋ ni nee.” Li yoo ki u poorpoweiteeb na kur chiar ŋaan nyikɔ.

Biaŋinba ki bi jii Yisa ki baar nanɔ buut boor ni

⁵⁷ Ki binba soor Yisa na jiiu ki saan nanɔ Yennu jiantu yudaanɔ Kayafas ŋaak, siaminba ki sennu wannteeb nan tiŋ na ni saakab kar ki guu na.

⁵⁸ Ba saan nan Yisa na, ki Piita waa u poorpo banfɔkira, ki saa baar see Yennu jiantu yudaanɔ maŋ ŋaak nanyer po, ki tan kɔɔ dundɔuŋ ni, ki saan saa kar toontunna boor ni, a wun la li joontu.

⁵⁹ Ki Yennu jiantu yudamm nan saakab maŋ kur yabir bi mɔŋ paak a bin la faak siara damm mɔb ni linba ki bi sa jii Yisa biit ki kpiu.

⁶⁰ Ki niib bonchiann set dii faak siara u paak, ŋaan kɔŋ u bisiat. Li poorpo ki jab bannlee nyii set ki yet a

⁶¹ “Jɔɔ na daan yet a u mɔk yikoo ki sa fit bet Yennu jiantu ŋasaakak na, ŋaan bia maar daa ŋanntaa sinsuuk ni.”

⁶² Ŋanne ki Yennu jiantu yudaanɔ maŋ fiir set, ŋaan boi Yisa “Linba ki jab maŋ piak a po na, li paak tee bee? A ki mɔk li jiinu-uu?”

⁶³ Ŋaan ki Yisa ki jiin siari. Ki Yennu jiantu yudaanɔ maŋ ŋamm boiɔ “Betirit manfodaanɔ Yennu paak, fine set tee u Niganntɔɔ Masia ki bia tee u Bija na-aa?”

⁶⁴ Ki Yisa jiin a “Nn, fine yaa. Ŋaan n beerie, la nyii mɔtana ki jii saa, i tan sa la min nisaarik Bik ki n kar Yabint Yennu nuudiitu po, ki bia tan sa lan ki n be sanpagbana ni ki siik.”

⁶⁵ Ŋanne ki Yennu jiantu yudaanɔ maŋ dat u mɔŋ liatir pat, ŋaan tian a “U yekint u mɔŋ nan Yennue. Ki ti poŋ ji loon siaradamm a ti teen bee? I kura na gbat wa yekint u mɔŋ nan Yennu biaŋinba.

⁶⁶ Ki i la nlee?” Ki bi jiin a “U ŋan nan kuume.”

⁶⁷ Li yoo na, ki bi ji piin ki siin mɔsant u paak, ki boou, ki siab pebitɔ tanpakii,

⁶⁸ ŋaan yeen a “Fin Masia, buntir wunba pebita na.”

Piita nba din nɔi a u ki mi Yisa biaŋinba

⁶⁹ Piita nba kar Yennu jiantu yudaanɔ ŋaadundɔuŋ ni na, ki ŋaak maŋ ni bonposiak baar u boor ni ki tan betɔ a “A mun tuu yɔɔ be nan Yisa wunba nyii Galilee na.”

⁷⁰ Ki Piita yet niib maŋ kura boor a “N ki mi fa piak linba na paaki;”

⁷¹ ŋaan fiir nyii ki saa kar nanyer po. Ki ŋaak maŋ ni bonpoleek bia nyii lau, ki yet binba be leŋ na a “Jɔɔ na mun tuu yɔɔ be Yisa nba nyii Nasaret na boor ni.”

⁷² Ki Piita yet buun nii muu ni, ki por a ŋɔɔ taan ki mi jɔɔ maŋi.

⁷³ Ki li yann waaminna ki jab nba see leŋ na baar ki tan yet Piita a “A set tee bi ni yenɔe, kimaan a pinpakit nee want.”

⁷⁴ Ki Piita por mɔb a li-i tee ki u faar faakie, Yennu-n dat u tubir, a ŋɔɔ ki mi jɔɔ maŋi. Li yoo maŋ ki kojouk bui.

⁷⁵ Ki Piita ji tiar Yisa nba betɔ na a “Kojouk daa tan kan bui sinsinn daanni ki a tan sa nɔi taar munntaae a a ki mimi.” Ki Piita nyii nanyer po ki saa bui ki fabin bonchiann.