Matiu 12 - Yennu Gbounpaauŋ Mɔɔr

Foon daar labaar

¹ Li yoo maŋ ki Yisa nan u poorpoweiteeb din gaar dii kpaab ni foon daar; ki kon tan soor u poorpoweiteeb na, ki bi kɔnii dikara ki pinii ki ŋman.

² Farisiinba na siab nba din la nna maŋ, ki bi bet Yisa a “Gotir, a poorpoweiteeb tuun linba ki ti sennu ki chab nan tii tuun foon daari.”

³ Ki Yisa jiin ki boib a “I ki karin Yennu gbouŋ ni David nba din tun biaŋinba-aa? Ki kon nba din soor ŋɔɔ nan u jɔɔmu,

⁴ ki u din kɔɔ Yennu ŋaak ni ki saa jii Yennu boroboro, ki ŋɔɔ nan u jɔɔmu ŋman; ŋaan ki sennu na din ki chab nan bi nisɔɔ-n di Yennu boroboro maŋi, see Yennu manteeb kuukɔɔ;

⁵ amii i ki karin Yennu sennu gbouŋ ni manteeb nba din tuun biaŋinba-aa? bi din tuu yɔɔ tuun toona Yennu jiantu ŋasaakak ni foon daar kura ki biir sennu na, ŋaan kaa biiti.

⁶ Ŋaan n beerie, wunba chee Yennu jiantu ŋasaakak be nna.

⁷ Li sɔb Yennu gbouŋ ni a ‘Yennu loon ninbatinue ki gar marouŋ;’ li-i tee ki i bo bann linba na paaki, i bo kii piak ki biir binba kaa biiti;

⁸ kimaan min nisaarik Bike mun bia yen foon daar.”

Yisa nba din te ki nuukpeenn daanɔ paak biaŋinba

⁹ Ki Yisa din nyii leŋ ki saan kɔɔ bi jiantu diiuk ni.

¹⁰ Ki jasɔɔ nna mun din be leŋ, ki u nuu kpo ki goon. Ki siab din loon bin la Yisa biita ki biirɔ; li paak, ki bi boiɔ a “Ti sennu saak a nirɔ-n te ki baatɔɔ paak foon daarii?”

¹¹ Ki u mun din ŋmant boib a “I yenɔ-i mɔk peyenɔkɔɔ, ki peeuk maŋ-i tan baa bunbunn ni foon daar, u kan donnɔ foon daar na-aa?

¹² I ki mi nan nisaarik mɔk nyɔɔt ki gar peeukuu? li paak, sennu na chab a tii tuun toonŋana foon daar.”

¹³ Ŋanne ki u din ŋmant bet nuukpeenn daanɔ na a “Tantir a nuu maŋ.” Ki u tant u nuu maŋ, ki li naat ki tee kaman nan leer na.

¹⁴ Ŋaan ki Farisiinba na nyii nanyer po, ki lor lor soor nan leeb ba sa teen biaŋinba ki kpi Yisa.

Yennu bigannkak po

¹⁵ Ki Yisa din bann bi lor maŋ po, ki din nyii leŋ. Ki niib bonchiann din waa u poor; ki u te ki baatib kura paak;

¹⁶ ŋaan kpaamm nan ninmɔnn a bi daa mɔɔntirɔ nan niibi.

¹⁷ U din tun nnee a linba ki Yennu sɔkinii Aisaya din sɔkin na, lin teen gbeen, a

¹⁸ “Gotir, ma gann n bik nbae na ŋɔɔe ki n mantik loonɔ na; n numm mantik gboouwa. N sa jii n Seyeeŋ ki teen u ni. U tan sa mɔɔnt buut bunu nba took ki tur binba ki tee Juu teebi.

¹⁹ U tan kii mɔk mɔniɔku; ki bia tan kii tee kpayɔk daanɔ, ki bia tan kii mɔk fuut yann yann sanjot ni.

²⁰ U tan kan kɔnn lanbankɔɔnn ki tonti, ki bia tan kan kpeen fitir nba ki di fanu. U tan sa te ki barbunu nba took-n la nyannu.

²¹ U sann paake, ki binba ki tee Juu teeb na tan sii mɔk dindann.”

Yisa nan narinbiit bat Beelsebul labaar

²² Li yoo na ki nisiab din baar nan jasɔɔ ki narinbiit be u ni ki teenɔ muuk ki bia teenɔ jɔɔŋ; ki Yisa din te ki u paak, ki u ninbina nyɔɔnt, ki u ji laat, ki bia muut ki ji piak.

²³ Ki li yaar ŋaan lit niib kur na bonchiann, ki bi boi bi leeb Yisa po a “Jɔɔ nee nɔk tee David yaaboonn na-aa?”

²⁴ Ŋaan Farisiinba na nba din gbat nna maŋ, ki bi yaa a “Narinbiit bat Beelsebule teen jɔɔ maŋ yikoo a wuu nyint narinbiit niib ni.”

²⁵ Ki Yisa din bann ba dukii linba, ki betib a “Naan niib-i ŋmat kɔn ki tookit bi leebi, bi naan maŋ sa biira. Ki doyennkɔɔ niib amii ŋayeŋkɔɔ niib-i ŋmat kɔn nan leebi, li kan seti.

²⁶ Li-i tee ki Sintaanii nyint u mɔŋ, li want nan u kɔn ki bɔkitir u mɔŋe; nlee ki u naan na sa seti?

²⁷ Ki li-i tee ki Beelsebul teenin yikoo a mii nyint narinbiit niib ni, ki yimm muni, ŋmee mun chab i niib a bii nyint narinbiiti? I mɔŋ niib maŋ toonae want nan i ki mɔk mɔnii kaa.

²⁸ Ŋaan min ŋanin, Yennu Seyeeŋ paake ki n nyint narinbiit niib ni; ŋanne mun bia want nan Yennu naan baar i boor niwa.

Yisa fit ki lor Sintaanii

²⁹ “Sɔɔ kan fit kɔɔ jawakitir ŋaak ni ki bakir u bona ki nyi nanni, li-i kii tee ki li yɔɔ dɔŋ ki lorɔ ŋmii kaawa, ŋaan fit ki kɔɔ ki bakir u bona maŋi.

³⁰ “Wunba ki see n poor, u kɔn nanime; ki wunba mun bia ki tikii niib ki teenimi, u yaatibe.

³¹ Li paak te ki n beeri na, Yennu sa nyik chab nifosaarik u biit nan barbiit kura; ŋaan wunba tan sukii Yennu Seyeeŋ, Yennu kan mi ki nyik chab li daanɔ.

³² Wunba piak barbiit ki teen min nifosaarik Bik, Yennu sa nyik chabɔ; ŋaan wunba tan piak barbiit ki teen Yennu Seyeeŋe, Yennu kan mi ki nyik chab li daanɔ dunia na ni, amii dunia nba tan sa baar na ni.”

Tiik nan u lɔɔna barjouk

³³ Ki Yisa bia din yet a “Li-i tee ki tiik ŋan, u loon tilɔɔnŋanae; ŋaan li-i tee ki tiik ki ŋani, u sii loon lɔɔnbiite, kimaan tiik lɔɔna nie ki bi bantɔ.

³⁴ Yimm walabirii booru na, ya tee nifobiit biaŋinba na, nlee ki barŋanii sa fit nyi i mɔi ni? kimaan linba ki nifosaarik dukii u par ni, ŋanne bia nyi u mɔb ni.

³⁵ Niŋanɔe tuun toonŋana, kimaan u par ni ŋan; ki nibiiuk mun tuun toonbiit, kimaan u par ni bi.

³⁶ “N beerie na, barbunu daar, Yennu tan sa bu niib buut nan ba din piak baryana kur nba na paak,

³⁷ kimaan sɔɔ kur pinpako tan sa nyinnɔ daar maŋ ni; sɔɔ kur pinpako mun bia tan sa biirɔ.”

Binba loon bin la nyinn labaar

³⁸ Ŋanne ki sennu wannteeb nan Farisiinba din bet Yisa a “Wanntɔɔ, ti loon ki a tun bakitnauŋ nyinne ki wannit.”

³⁹ Ki u din jiin ki yetib a “Mɔtana nigbouŋ nba tee biitdamm ki bia ki waa Yennu na loon ki bin la bakitnauŋ nyinna; ŋaan n kan mi tun nyinsiar ki turibi; Yennu sɔkinii Jona nyinbooru na kuukɔɔe ki n sa wannib;

⁴⁰ kimaan Jona maŋ nba din be jaŋgbeŋŋir poor ni yennu nan nyiɔk ki saan jaŋ daa ŋanntaa na, nnee ki min nifosaarik Bik mun tan sii be tiŋ ni yennu nan nyiɔk ki saa jaŋ daa ŋanntaa.

⁴¹ Buut daar, Nineva teeb tan sa set wann nan mɔtana nigbouŋ na mɔk biit; kimaan Jona maŋ nba din mɔɔnt Yennu maan ki turib na, bi din nyik bi biit; ki gotir manii, wunba chee Jona be nna.

⁴² Buut daar, poobat nba din nyii niidiitu po na mun bia tan sa set wann nan mɔtana nigbouŋ na mɔk biit, kimaan u din nyii digbann banfɔkirewa ki tan baar a wun gbiint Bat Solomon yanfoon na pinpauk; ki gotir manii, wunba chee Solomone be nna.

Narinbiiuk nba tuu jen kɔɔ nirɔ ni biaŋinba

⁴³ “Li-i tee ki narinbiiuk tan nyii nirɔ ni, u tuu yeeke ki lin mɔkooŋ ni, ki loon foon boor, ŋaan ki laati;

⁴⁴ li paak, u tuu tan yet u mɔŋe a ‘N sa ŋmat saan ŋaak nba ni ki n daan nyii nie;’ u ji kii ŋmat tan baari, wun la ki li dɔɔ yann, ki bi piar ki ŋamma,

⁴⁵ u ji sa ŋmat nyie ki saa yiin narinbileeb bannlore, binba bi ki chee u paak, ki baar namm, ki bin kɔɔ ki lakin be; nirɔ maŋ binbeŋ ji sii bi bonchiann ki gar wa daan tuu bi sinsinn biaŋinba nawa. Nee tan sa baar mɔtana biitdamm nigbouŋ na paak.”

Yisa naa nan u waarii labaar

⁴⁶ Yisa nba din daa piak ki teen niib na yoonba, ki u naa nan u waarii baar ki tan see nanyer po, ŋaan tun sɔɔ a wun yiinɔ ki bin pakɔ mɔbonsiar.

⁴⁷ Ŋanne ki sɔɔ din betɔ a “Gotir, a naa nan a waarii see nanyer po ki loon ki bin pak nana.”

⁴⁸ Ŋanne ki Yisa boi nirɔ nba betɔ linba na a “Ŋmee tee n naa? ki lamme bia tee n waarii?”

⁴⁹ ŋaan din tant u nuu ki wann u poorpoweiteeb ŋaan yet a “Gotirii, n naa nan n waariie na;

⁵⁰ kimaan wunba kur tuun n Baa Yennu nba be sanpaapo na loommu, ŋɔɔe tee n ninja, nan n niipoo nan n naa.”