Barŋanii nba ki LUK din sɔb nae na 15 - Yennu Gbounpaauŋ Mɔɔr

Pebotikauk barjouk

¹ Sianyoo ki lampogaarteeb nan biitdamm bonchiann din baat Yisa boor ni ki gbiintir u maan;

² ki Farisiinba nan sennu wannteeb din burin ki yeen a “Jɔɔ na gaar biitdamm ki bia di namm.”

³ Li paak, ki Yisa yimm barjouk na a

⁴ “I yenɔ-i mɔk pei kobik, ki yenɔ-n tan bot, u sa teen nlee? See ki u nyik pei piinnyia nan bannyia na muuk ni, ŋaan saan lon peyenɔ maŋ nba bot na nan wa tan sa lau.

⁵ Wa ji tan lau yoonba ki u ji mɔk parpeenn. Li yoo ki u jiiu ki bukɔ u bɔpiat paak

⁶ ki kun ŋaak ni. Li yoo na ki u yiin u yɔɔsinba nan u ŋakpiasinba ki lakimm ki yaa a ‘Yii mɔk parpeenn man, kimaan n la n pebotikauk maŋa.’

⁷ “Ŋanne mun ki n beeri biak, biitdaanyenɔ-i nyik u biit, parpeenn sii be Yendɔuŋ ni li daanɔ paak, ki gar la sii be biaŋinba niburchimm piinnyia nan bannyia nba ki loon bin nyik bi biit na paak.

Kutlikbinn nba bot barjouk

⁸ “Ki poo mun-i mɔk kutlikbinn piik, ki yenɔ tan boti, u sa teen nlee? See ki u joo fitir ki piar u diiuk ki lon fanu nan wa tan sa lar.

⁹ Wa ji tan lar yoonba, ki u ji yiin u yɔɔsinba nan u ŋakpiasinba ki lakimm ki yetib a ‘Yii mɔk parpeenn man, kimaan n la n kutlikbinn nawa.’

¹⁰ “Ŋanne mun ki n beeri biak, li-i tee ki biitdaanyenɔ nyik u biit, Yennu malakanba sii mɔk parpeenn u paake.”

Bibotikak barjouk

¹¹ Ŋanne ki Yisa ŋamm yet a “Jasɔɔ din mɔk bonjabis bannlee,

¹² ki waarɔ po tan yet u baa a ‘N baa, n loon ki a jii faar nba ki n tan sa gaar nee ki turin.’ Li yoo maŋ ki u baa bɔkit bi faar maŋ ki turib.

¹³ Ŋanne li ki yukiri ki waarɔ po na jii u mɔkint kur ki yaat saan digbann banfɔkira.

¹⁴ Wa be doo na ni ki u teen yann yann ki biir u likirii kur. Wa gbenn u likirii yoonba na, ki kon baa tiŋ maŋ ni bonchiann, ki soorɔ hei.

¹⁵ Ŋanne ki u ji saan be jasɔɔ ŋaak doo maŋ ni, ki u tuumɔ u kpaab ni a wuu dint u doorii.

¹⁶ Ki u tuu loon wun di doorii dabint na ki gboo; ŋaan sɔɔ ki teenɔ jesiati.

¹⁷ Li poorpo ki u yan jen, ki u yet a ‘N baa toontunna kura laat jeet di ki li jaŋitib, ki bia tent, ŋaan ki n tan kpenn nan kon nna na.

¹⁸ La ji be na, n sa kun n baa boore ki sa yetɔ a N chanbaa, n tun bonbiir ki biir Yennu nanawa.

¹⁹ N ji ki ŋan nan ki a yiinin a bijai. Teentin a toontunyenɔ.’

²⁰ Ŋanne ki u ji fiir ki ŋmat ki kun u baa boor. “Yoo nba ki u daa din be banfɔkir ki kun na, ki u chanbaa lau; ki ninbaauk soorɔ bonchiann, ki u chiar ki baar soor u bik na bɔpiat ki puur wɔbɔ.

²¹ Ŋanne ki bik na yaa a ‘N chanbaa, n tun bonbiir ki biir Yennu nanawa. N ji ki ŋan nan ki a yiinin a bijai.’

²² Ŋaan ki u baa yiin u daaba, ‘Teent yiama ki jii chinchenŋann na, nan baŋ, nan taasaat na, ki tan gbabinɔ, ŋaan pirimɔ baŋ nan taasaat na,

²³ ŋaan kii saa man ki saa soor naajakpammir na ki tan kpiu ki tin teen jaamm.

²⁴ N tuu mi a n bija na kpoe, ŋaan ki u be; ki bia mi a u bote, ŋaan ki u tan jenna.’ Ŋanne ki bi ji piin bi jaamm dinu nan parpeenn.

²⁵ “Li yoo na ki u bijakper na daa din be kpaab nie, ki ji din tan kpent ki per ŋaak ki gbat fuut, ki siak waa ki jinjeruk jerin.

²⁶ Ki u yiin u baa toontunyenɔ ki tan boiɔ, ‘Bee fuute fu ŋaak nna?’

²⁷ Ki toontunnɔ na yetɔ a ‘A waarɔ nee kpen, ki a baa te ki bi kpii naajakpammir, kimaan u jen nan laafiae.’

²⁸ Ŋanne ki u yɔɔrɔ maŋ wutoor ji doo hei, ki u yêt ŋaak ni kɔɔnu. Ki u chanbaa nyii ki barimɔ a wun baar kɔɔ.

²⁹ Ŋaan ki u jiin u chanbaa ‘Nnara, mii tuuma hei bina bonchiann. N bia ki mi yêt a mɔbu, ŋaan a poŋ taan ki mi turin buuk ki n kpii ki yiin n naasinyɔɔsinba ki ti tan di kii mɔk parpeenni.

³⁰ A bija nee mantik biir a faar kur ki tan teen joonbaaruk poob paak, ki wa tan jen yoonba, ki a bia kpii naajakpammir ki bia turɔ.’

³¹ Ki u baa yetɔ a ‘N bik, fin ŋanin poŋ tuu be nanin yoo kura; ki linba kur ki n tuu mɔk, li tuu tee a yare.

³² Li poŋ ŋan nan tin teen jaamm kii mɔk parpeenn, kimaan n tuu mi a a waarɔ kpoe, ŋaan ki u be; ki bia mi a u bote, ŋaan ki u tan jenna.’ ”