Jɔɔnn 9 - Yennu Gbounpaauŋ Mɔɔr

Yisa nba din nyɔɔnt jajɔɔŋ biaŋinba

¹ Li poorpoe ki Yisa din gɔrin saa ki tan la jɔɔŋ nna, ki u tee jɔɔŋ u maaru niwa.

² Ki u poorpoweiteeb boiɔ a “Chanbaa, ŋmee toonbiite te ki bi mar jɔɔ na jɔɔŋi? Li daa tee u mɔŋ toonbiit amii u damme?”

³ Ki u jiimm a “U toonbiit paak kaa te ki u jɔɔni. Li mun bia ki tee u damm toonbiit paak kaa, ŋaan u jɔɔn a Yennu-n te ki wun nyɔɔnte, ki niib-n la Yennu toonjaann.

⁴ Yoo nba ki yentu daa be na, li kpaa talase ki tii tuun wunba tumin na toona na, kimaan nyiɔk baat, yoo nba ki sɔɔ kan fit tun toonni.

⁵ Ma daa be tingbouŋ nna, n tee tingbouŋ na niib yentue.”

⁶ Wa yet nna maŋ poorpoe ki u siir mɔsant tiŋ ni, ŋaan buun tant, ki pɔr jɔɔŋ na ninbina paak,

⁷ ŋaan betɔ a “I saa Siloam biɔuŋ ni ki saa yibir.” (Siloam paak tee “ti tun sɔɔ.”) Ki u saan ki saa yibir, ki nyɔɔnt ki kun.

⁸ Ŋanne ki u leeb nan niib nba tuu laatɔ ki u mei likirii na boi bi leeb a “Jajɔɔŋ nba tuu mei na kaa na-aa?”

⁹ Ki siab yaa a “Ŋɔɔe,” ki leeb yaa a “Aaii, li ki tee ŋɔɔ kaa. U naanɔe.” Ŋanne ki jɔɔ maŋ tiauŋ yet a “Mine na.”

¹⁰ Ki bi boiɔ a “A nunii na teen nlee ki tan nyɔɔnti?”

¹¹ Ki u jiimm a “Jɔɔ nba ki bi yiu Yisa na, ŋɔɔe buun tant ki jii ki pɔr n ninbina paak, ŋaan betin a mii saa Siloam biɔuŋ ni ki saa yibir; ki n saan ki saa yibir ki nyɔɔnt.”

¹² Ki bi boiɔ a “U be lee?” Ki u jiin yetib a u ki mi.

Farisiinba nba boi jajɔɔŋ na nyɔɔntu maŋ po biaŋinba

¹³ Ŋanne ki bi jii jɔɔ maŋ ki saan nanɔ Farisiinba boor.

¹⁴ Daar nba ki Yisa din buun tant ki nyɔɔnt jɔɔŋ na, li daar din tee foon daare.

¹⁵ Ki Farisiinba na bia ŋamm boi jɔɔ na, a u teen nlee ki nyɔɔnti. Ki u betib a “Yisae buun tant, ki jii ki pɔr n ninbina paak, ki n yibir ki nyɔɔnt.”

¹⁶ Ki Farisiinba siab yet a “Yisa ki nyii Yennu boor ni kaa, kimaan u tuun toonn foon daar. Ŋannii want nan u ki dia foon daar sennu.” Ki bi siab mun boi a “Nlee ki biitdaanɔ sii fit tuun toonjaana na booru?” Ki bɔkitu baar Farisiinba na sinsuuk ni.

¹⁷ Li paak ki bi bia boi jɔɔ na a “Jɔɔ na nba nyɔɔnta na, a dukii nlee u po?” Ki u bia pak jiimm a “U tee Yennu sɔkiniie.”

¹⁸ Juu teeb yudamm na, ki li lek paar nan bin teen yada nan bi marɔ jɔɔŋe ki u tan nyɔɔnt. Ŋanne ki bi yiin u damm,

¹⁹ ki tan boib a “U tee i bijae-ee? I set yaa a i marɔ jɔɔŋee? Ki li teen nlee ki u ji laat mɔtana na?”

²⁰ Ki bi jiin yetib a “Ti mi nan u tee ti bija ŋarime, ki ti bia mi nan ti marɔ jɔɔŋe.

²¹ Ŋaan ti ki mi la teen biaŋinba ki u tan nyɔɔnti, ki ti bia ki mi wunba nyɔɔntɔ. U mɔŋ ji ki tee bik kaa. Boimɔ man. U sa fit pak u mɔŋ paaka.”

²² U damm din yet nna maŋ, kimaan bi tiin Juu teeb yudamm na jaŋmaanii, kimaan yudamm maŋ poŋ taan mɔb ki yet a wunba yaa a Yisae tee Yennu Niganntɔɔ Masia, see ki bi nyinnɔ bi Yenjiantu ni.

²³ Li paak te ki u damm din yaa a u ki tee bik kaa, a bi mɔŋ-n boiɔ.

²⁴ Ki li taar munnlee nie ki bi bia ŋamm yiin jɔɔ nba tuu tee jɔɔŋ ŋaan tan nyɔɔnt na, ki tan betɔ a “I teen Yennue nibaakir nan niipoouk; kimaan ti mi nan Yisae tee biitdaanɔ.”

²⁵ Ki jɔɔ na yetib a “Wa tee biitdaanɔ, amii wa ki tee, n ki mi. Ŋaan min ŋarin mi bonyenne: n tuu tee jɔɔŋe, ŋaan mɔtana n ji laat.”

²⁶ Ki bi ŋamm bia boiɔ a “U teen nlee ki nyɔɔntani?”

²⁷ Ki u jiimm a “N poŋ betiiwa, ŋaan ki i ki gbati. Bee ki i jin loon ki n betiini? I mun loon ki i teen u poorpoweiteebee?”

²⁸ Ŋanne ki bi wutoor ji doo, ki bi sukiiɔ, ŋaan betɔ a “Fine tee nirɔ maŋ poorpoweitɔɔ, ŋaan timm ŋarin tee Moses poorpoweiteebe.

²⁹ Ti mi nan Yennu din piak nan Moses, ŋaan nirɔ na ŋarin, ti ki mi wa nyii siami.”

³⁰ Ki jɔɔ nba nyɔɔnt maŋ yetib a “Bee paruko mani, ki i tan yaa a i ki mi wa nyii siami, ŋaan ki u nyɔɔnt n nunii.

³¹ Ti mi nan Yennu ki gbia biitdamm miaru, ŋaan u gbia damm nba jiantirɔ ki tuun wa loon biaŋinbae.

³² La nyii dunia piinu niwa, ti daa ki mi gbat a sɔɔ nyɔɔnt wunba ki bi marɔ jɔɔŋi.

³³ Li-i bo-i tee ki jɔɔ maŋ ki nyii Yennu peŋi, u bo kan fit ki tun bakitnauŋ toonn na booru.”

³⁴ Ki bi jiin ki yetɔ a “Fin nba ki bi mara nan biit na po, a tee ŋmee ki want timmi?” Ki bi nyinnɔ bi Yenjiantu ni.

Ninyentir labaar

³⁵ Yisa nba gbat a bi nyinnɔ bi Yenjiantu ni na, ki u tan lomɔ ki lau, ki boiɔ a “A teen nisaarik Bik na yada-aa?”

³⁶ Ki u jiin boiɔ, “Chanbaa, ŋmee tee nisaarik Bik na? Betirin wa tee wunba, ki n teenɔ yada.”

³⁷ Ki Yisa betɔ, “A poŋ mi lauwa. Ŋɔɔe bia tee min nba piak nana na.”

³⁸ Ki jɔɔ na yetɔ a “N Yomdaanɔ, n teena yadawa,” ŋaan gbaan u tɔɔnn po ki pukiiɔ.

³⁹ Ŋanne ki Yisa yet a “N baar tingbouŋ na ni a n bu niib buut, ki bia yent binba ki mɔk ninyentir numm po, ŋaan dɔkin binba mɔk ninyentir numm po.”

⁴⁰ Ki Farisiinba siab nba be leŋ na gbat ki u yet nna, ki bi boiɔ “A yaa a ti mun ki mɔk ninyentiree?”

⁴¹ Ki u jiimm a “Li-i bo-i tee ki i ki mɔk ninyentiri, i bo kii mɔk biiti, ŋaan ya sat yaa a i mɔk ninyentir na, i mɔk biit.”