Jɔɔnn 2 - Yennu Gbounpaauŋ Mɔɔr

Kana doo poochianu po

¹ Li daa ŋanntaa daar, ki bi yaa bin chian pooyookir, doo nba sann yi Kana na, ki li be Galilee tiŋ ni. Ki bi din poi Yisa naa,

² ŋaan mun bia yiin Yisa nan u poorpoweiteeb, a bin baar.

³ Tɔn, tilɔɔna daan nba ki bi tuu nyu na, ki li tan gbenn. Ki Yisa naa baar bet Yisa a “Pooyookir daan na gbenna.”

⁴ Ki Yisa betɔ a “N naa, min nan fin, nlee mantiki? N yooe daa ki baari.”

⁵ Ŋanne ki u naa maŋ bet toontunna na a “Linba ki u beti a yin tun, yin tun nna.”

⁶ Tɔn, ŋaan sɔɔ siar nna see leŋ ki naan bui ŋannloob, linba ki Israel teeb tuu tee nyun leŋ ki nit kaman nan bi jiantu nba tee biaŋinba, ki li bui din fit kɔɔ sɔborii nan nyun, ki li baat kaman nan piinnlee amii piinntaa nawa.

⁷ Ki Yisa bet toontunna na a “Gbeent bui na nan nyun.” Ki bi gbeen nan mɔgbanawa.

⁸ Ki u ji betib “Durin man nyun maŋ, ki finn ki tur jaamm na saakɔɔ.” Ki bi finn ki saan turɔ.

⁹ Ki u gaar ki lemm sɔɔ ki li kpant daama, ŋaan ki u ki mi daan na nba nyii siami, ŋaan toontunna nba dur nyun bui na ni ŋarin mi. Ŋanne ki saakɔɔ na yiin poo na sɔrɔ

¹⁰ ki betɔ a “Sɔɔ kur tuu tor damamm sinsinnewa. Li-i tee ki bi nyuu saama, wun ji tor linba ki man fanu na, ŋaan yimm ŋarin ŋmina, ki ji tan joont toor daan nba man ki gar siar kur na!”

¹¹ Tɔn, Yisa nba din tun toonjaann maŋ Kana nba be Galilee tiŋ ni na, ŋannii din tee u sinsinn nyinn, ki li wann niib wa mɔk Yennu paŋ biaŋinba; ki u poorpoweiteeb na teenɔ yada.

¹² Li poorpo ki Yisa nan u naa nan u waarii nan u poorpoweiteeb saan Kapenaum, ki saa be leŋ kaman nan daa ŋannlee nna.

Yisa nba ŋamm Yennu jiantu ŋasaakak biaŋinba

¹³ Ŋanne ki Israel teeb yukitgar tiaru jaamm tan per, ki Yisa saan Jerusalem, a wun saa di jaamm maŋ.

¹⁴ Wa baar Jerusalem yoonba, ki u kɔɔ Yennu jiantu ŋasaakak ni, ki saa la jab ki bi kɔi nei nan pei nan ŋmana, a niib-ii daa kii mann mannu; ki u bia la likikpenta ki bi kar kpentir likirii.

¹⁵ Ki u jii ŋmiit ki pian kpaasir, ki ber bonkobit na kura, ki nyinnib Yennu jiantu ŋasaakak maŋ ni, ŋaan tut tut likikpenta na teebura ki lu, ki likirii na yat baa;

¹⁶ ŋaan bia bet binba kɔi ŋmana na a bin nyinn ŋmana maŋ, ŋaan bia yetib a “I daa tee n Baa ŋaak kpinkpent boori.”

¹⁷ Li yoo na ki u poorpoweiteeb ji tiar Yennu gbouŋ nba yet biaŋinba na a “N mantik loon n Baa jiantu ŋasaakak bonchiann.”

¹⁸ Ŋanne ki Juu teeb yudamm boi Yisa a “A sa tun nyinlannpoe ki wannit a a mɔk yikoo ki tun fa tun linba na?”

¹⁹ Ki Yisa jiin a “Tɔn, yi yeer Yennu jiantu diiuk na, ŋaan daa ŋanntaa sinsuuk ni n sa maar kaar.”

²⁰ Ki bi yet a “Waa! Ti jii bina piinna nan ŋannloobo ki maa Yennu jiantu ŋasaakak na, ŋaan ki fin tan yaa a sa jii daa ŋanntaa kuukɔɔe ki maa!”

²¹ Ki Yennu diiuk nba ki Yisa din pak na din tee u mɔŋ mɔŋ gbanante.

²² Yennu nba din fiinɔ kuun ni na poorpoe, ki u poorpoweiteeb tiar linba ki u yet nna, ki bi ji teen Yennu gbouŋ yada, linba want Yisa kuunfiiru po, ki bia teen Yisa maan na yada.

Yisa nba mi sɔɔ kur dudukit biaŋinba

²³ Yukitgar tiaru jaamm maŋ yooe ki Yisa din biar Jerusalem, ki din tuun bakitnauŋ toonjaana, ki niib bonchiann din la ki teenɔ yada,

²⁴ ŋaan Yisa din ki jii u mɔŋ ki chabibi, kimaan u din mi sɔɔ kur nba tee wunba.

²⁵ U din mi niib dudukit bonŋann. Li paak u din ki loon sɔɔ-n wannɔ nifosaarik binbeŋ po.