Hiibru teeb 9 - Yennu Gbounpaauŋ Mɔɔr

Tingbouŋ na ni Yenjiantu nan Yendɔuŋ ni Yenjiantu labaar

¹ Tɔn, Yennu nba din lor sinsinn mɔlor ki turib na, u bia din turib sennii nba ki bi sii waa-r kii jiantirɔ fanu; ki bi bia din mɔk siaminba ki bi sii jiantirɔ leŋe.

² Bi din faa bonkobgbant lanbouŋo, ki li mɔk paklooru nan linn po, ki yi paklooru na Yennu yar. Bi din senn fitire paklooru na ni, ki teebur see leŋ ki boroboro tɔɔ li paak ki bi teen Yennu.

³ Ki li linn po mun ki bi yi leŋ Yennu yar nan barmɔnii.

⁴ Sarima binbintir din be, ki bi jokit wubit li paak ki teen Yennu, ki Yennu sennu lakir din be ki bi tabin sarima li kur po, ki sarima bobir din be lakir na ni nan jeet nba yi mana na leŋ. Ki Aron patu nba din bint fapaana na kpee lakir maŋ ni, ki tana ŋannlee nba ki bi din koor ki sennii sɔb li paak na kpee li ni.

⁵ Bonsia nba ki bi yir cherubim din tɔɔ lakir maŋ paak, ki bi kpinkpant bakin siaminba din tee toonbiit nyikinchab boor ni na, ki li want nan Yennu be leŋ. Ŋaan mɔtana ji ki tee yoo nba ki ti sa pak bont maŋ po nan li barnɔɔk kuri.

⁶ Ba din senn bona kura nna nee, ki manteeb din tuu kɔɔ Yenjiantu lanbouŋ maŋ paklooru ni yoo kur ki tuun Yenjiantu toona.

⁷ Ŋaan manteeb yudaanɔ kuukɔɔe din tuu kɔɔ lanbouŋ na linn po yomkɔɔ binn nɔɔk ni. U din tuu dia sɔme ki mann marouŋ ki tur Yennu, u mɔŋ toonbiit paak, nan niib nba din tuu kpet tun toonbiit paak.

⁸ Yennu Seyeeŋ din want Yenjiantu lanbouŋ na po fanu, a siaminba tee Yennu yar nan barmɔnii na daa ki loot yoo nba ki paklooru maŋ daa din see na.

⁹ Linba na tee barjokit ki tur timm nba be mɔtana, ki want nan binba din jiantir Yennu na nba din tuu teenɔ bi piinii nan bi bonkobit sɔn na kan fit wuur bi para ni biit Yennu boor ni,

¹⁰ kimaan ŋann din tuu tee jeet nan bonnyunyuut nba kɔɔ nan linba ki kɔɔ na po, nan gbanant ŋammu po. Linba na kur din tee gbanant senniie a bii waa-r mɔkmɔk nan yoo nba ki Yennu tan sa senn u sennpaanu.

¹¹ Ŋaan Masia wunba tee sɔnŋanu nba na mantɔyudaanɔ na baar na. Wa kɔɔ jiantu lanbouŋ nba ni ki tuun na tee lanbonjaann nba be fanu nan barmɔniie; li ki tee nisaarik nba faa linba kaa, li bia ki tee tingbouŋ na ni yar kaa.

¹² Masia nba din saan kɔɔ jiantu lanbouŋ maŋ ni ki saa gar boor nba tee Yennu yar nan barmɔnii na ni yomkɔɔ yoonba, ŋaan ki li gbenn nna, u din ki dia buunii nan naajai sɔn kaa ki mann marouŋ, ŋaan u din jii u mɔŋ sɔme ki pa ki nyinnit daabsin ni yoo nba kaa gbennu.

¹³ Bi din tuu jii buunii nan naajai sɔme, ki bia jii naasar ki mann ki joo muu, ŋaan jii li tanpent na ki mii mii niib nba din tuu mɔk yanbɔmm Yennu tɔɔnn na paak, ki lin ŋamm bi gbanant a bii yeen.

¹⁴ Linba na-i ŋamm gbanant, ki Masia sɔn mantik sa nyinn biit ti para ni a tii waa manfodaanɔ Yennu, kimaan Seyeeŋ nba be yoo nba kaa gbennu paŋ ni ki ŋɔɔ Masia din jii u mɔŋ ki mann marouŋ nba be fanu fanu ki tur Yennu.

¹⁵ Li paak, Masiae tee wunba ŋammii mɔsonpaann na, a Yennu nba din yiin binba na-n la yiar sanpaapo yoo nba kaa gbennu, kaman nan ŋɔɔ Yennu nba lor mɔlor na. Bi sa la yiar maŋ, kimaan Masia poŋ din kpowa; li paak, binba din tuun toonbiit yoo nba ki sinsinn mɔlor daa din senn na, u kuun maŋ nyinnib toonbiit maŋ tubdatu niwa.

¹⁶ Tɔn, nirɔ-i sɔb u fadinu gbouŋ, see ki bi tan wann nan wunba sɔb fadinu gbouŋ na kpowa.

¹⁷ Yoo nba ki wunba sɔb fadinu gbouŋ maŋ daa be u manfoor ni na, fadinu gbouŋ maŋ ki mɔk yikoo. Li yikoo be u kuun poorpoewa.

¹⁸ Li paake te ki sinsinn mɔlor na din tuu mɔk yikoo sɔn marouŋ poorpo.

¹⁹ Sinsinn, Moses din tuu mɔn Yennu sennu na kure kaman nan la sɔb biaŋinba na. Li poorpo wun jii dufatlai ki lor nan pekobmɔnt ki pakii naajai nan buunii sɔn nba ŋmat nan nyun na, ki miir sennu gbouŋ na paak nan niib maŋ kur paak,

²⁰ ki beerib a “Mɔlor nba ki Yennu senn turi a yin sakir na sɔme na.”

²¹ Moses bia din tuu mii sɔn maŋ Yenjiantu lanbouŋ na paake, nan bonsiar kur nba ki bi dia jiantir Yennu na paak.

²² Barmɔniie, Yennu sennu wannu ni, sɔme din tuu ŋamm bont kur ki li be fanu ki ki mɔk biiti, ki sɔm-i kii nyii, Yennu kan nyik chab niib biiti.

Masia marouŋ nee kpeen biit

²³ Li paak, li din tuu kpaa talase ki bin mann marouŋ ki ŋamm bona nba tee Yendɔuŋ ni bona ninnauŋ na; ŋaan marouŋ nba chee sa ŋamm Yendɔuŋ ni bona tiauŋ.

²⁴ Nifosaarik nba din ŋammir boor nba tee Yennu yar ki nannir kaman nan Yendɔuŋ ni bont nba tee li barmɔnii na, ki Masia din ki saan kɔɔ leŋ kaa, ŋaan u din saan kɔɔ Yendɔuŋ mɔŋ mɔŋ nie, siaminba ki u be Yennu tɔɔnn ti paak na.

²⁵ Juu teeb manteeb yudaanɔ na din tuu kɔɔ nan bonkobit sɔn boor nba tee Yennu yar na ni yomkɔɔe binn kur nɔɔk ni; ŋaan Masia ŋanin ki yaa wun mann marouŋ taar bonchiann kaa.

²⁶ Li-i diŋŋi bo-i tee nnaie, ŋann la din nyii dunia namu pinpiik niwa u din bo sa di fara taar bonchiann. Ŋaan mɔtana, yoo nba ji tan per joontu na ki u din dɔkit a wun jii u mɔŋ ki mann marouŋ ki kpeen biit.

²⁷ Yennu senn a see ki nirɔ kur-n kpo yomkɔɔ, ki li poorpo Yennu-n bu u buut.

²⁸ Li paak, Masia nba din jii u mɔŋ mann marouŋ yomkɔɔ ki nyinn nifosaarii bonchiann biit na tan sa jena, ki ji tan kan boi biit po kaa, ŋaan u tan sa tinn binba guu-u nan bi para kur nee.