Hiibru teeb 8 - Yennu Gbounpaauŋ Mɔɔr

Yisae tee ti mantɔyudaanɔ

¹ Barii na barnɔɔk want nan ti mɔk mantɔyudaanɔ nba tee nna mun, ki kar Yennu nba mɔk paŋ kur na naangbouŋ nuudiitu po Yendɔuŋ ni,

² ki tuun mantɔɔ yudant toona Yennu diiuk ni; li diiuko tee barmɔnii jiantu diiuk ki ti Yomdaanɔ din ŋammir, linba ki tee nisaarik ŋammu.

³ Mantɔɔ kur nba ki bi gannɔ na, li tuu kpaa talase a wun jii piinii ki bia mann marouŋ ki tur Yennu, nnee ki li mun kpaa talas ki ti mantɔyudaanɔ-n tur siar.

⁴ Li-i bo-i tee ki u be tingbouŋ na ni, u bo kii tee mantɔɔ fabaa, kimaan manteeb nba teen Yennu piinii, Juu teeb sennu nba senn biaŋinba na, poŋ be.

⁵ Ba tuun linba na tee Yendɔuŋ ni diiuk toona siara ninnauŋo; Moses nba din tun linba na din naan nnee; kimaan Moses nba din yaa wun faa Yenjiantu lanbouŋ yoonba na, Yennu din kpaanɔ ki yet a “A tun bonsiar kur kaman nan ma wanna jɔɔr na paak biaŋinba na.”

⁶ Ŋaan Yennu tur Yisa mannu toona nba chee bi mannu toona na, kaman nan u mɔlor nba chee ki be Yennu nan nisaarii sinsuuk ni biaŋinba na, kimaan u mɔlor maŋ gaa nan mɔsona nba chee nae.

⁷ Kimaan sinsinn mɔlor na-i diŋŋi fit te ki nisaarii be fanu, li ji din bo kii kpaa talas ki Yennu-n tur mɔlor pukin taar munnlee.

⁸ Ŋaan Yennu din la nisaarii biite yoo nba ki u yet a “Min nba tee i Yomdaanɔ nae beeri a yoo baat na, ki n tan sa lor mɔlorpaann ki tur Israel niib nan Juda niib.

⁹ Li tan kii tee kaman nan mɔlor nba ki n din senn ki tur bi yejamm daar nba ki n din kub bi nii ki nyinnib Ijipt tiŋ ni na. Bi din ki teen mɔlor nba ki n din lor ki turib na yada, li paak, ki n baka din kaa bi po.

¹⁰ Min nba tee i Yomdaanɔ na beeri ma yaa n senn mɔlor ki tur Israel niib daa nba baat na ni: n ji sa tabin n sennii maŋ bi dudukit nie, ki sɔbir tabin bi para ni. Mine sii tee bi Yennu ki bi tee n niib.

¹¹ Li ji kii kpaa talas ki bi sɔɔ-n wann u lɔɔ amii ki bet u lɔɔ a ‘Fini, bant ti Yomdaanɔ,’ kimaan bi kura tan sii mi mine, binba tee nijaana nan binba tee nitarii mun.

¹² N tan sa nyik bi biit ki chabib, ki ji kii tian bi biit na po.”

¹³ Yennu nba piak mɔlorpaann maŋ po nee, ki sinsinn mɔlor na teen mɔsonkper; ki bonsiar nba kpet ki kokir, li ji kan yukir nan botu.