Hiibru teeb 6 - Yennu Gbounpaauŋ Mɔɔr

¹ Li paak, ŋaant man ki tii dia saakayan kii tumii Masia barii ki saan tɔɔnn po; ŋaan ŋamm ki tumii u barii bonchiann ki pukin pinpiik ni wannu po; li ji ki kpaa talas a bin ŋamm wanni a Nyikin toonbiit nan kuun sɔnu, ki teen Yennu yada,

² ki bia wanni Yennu nyunwuru po, nan niiyiinu niib paak, nan kpeemm fiiru po, nan tubdatu nba kaa gbennu na po.

³ Yennu-i sak, ti sa saan tɔɔnne.

⁴ Masiaweira nba yêt u weiu, li ji tan sii paar nan bin jenna ki tan lebit bi dudukit. Sianyoo bi din tuu be Yennu yentu nie, ki gaar bi tora nba tee Yennu Seyeeŋ na, ki lemm Yendɔuŋ ni piiniiwa,

⁵ ki din tuu mi Yennu mɔmaan na manu po, ki din mi dunia nba baat na paŋ po,

⁶ ŋaan ji tan yêt Masia weiu. Li ji paar nan bin ji tan jen lebit bi dudukit, kimaan bi bia kpi Yennu Bija maŋe dapunpunn paak ki dintɔ fei paanu ni.

⁷ Tɔn, tiŋ nba ki saak baa li paak ki li maakit ki tee jeet teen binba ŋammitir na, Yennue senn mɔsonŋann ki teen tiŋ maŋ paak;

⁸ ŋaan tiŋ maŋ-i tee kunkonii nan mɔbiit, li ki mɔk nyɔɔti, li kan yukir ki Yennu tan sa por mɔb ki lin di muu biir.

⁹ Ti naa walonkai, ta lek piak linba na, ŋaan ti ki mɔk birsuk i po. Ti mi nan i yare tee linba chee ki bia tee tinnu yar.

¹⁰ Kimaan Yennue ŋan, ki kan tamm ya tun linba ki turɔ amii ya loonɔ biaŋinba ki somm Masiaweira, ki bia daa sommitib na.

¹¹ Ti loon ki i sɔɔ kur-n yabir u mɔŋ paake mɔkmɔk nan li joontu, ki ya mɔk dindann biaŋinba na, li set sa teen mɔnii ki turi.

¹² Ti ki loon ki yii tee gbannyakdammi, ŋaan ti loon ki yii tee binba teen Masia yadae, kii mɔk sukuru, ki tan gaar linba ki Yennu din senn mɔsonn li po na.

Yennu mɔsonn nba kaa birsuk

¹³ Yennu nba din senn u mɔsonn tur Abraham yoonba na, u din lor mɔlor a u tan sa tun wa din senn mɔsonn nba nawa. Sɔɔ ki be ki chee Yennu tiauŋ; li paak, u din jii u mɔŋ sanne ki lor u mɔlor maŋ.

¹⁴ U din yetɔ a “Li tee barmɔniie, n senn mɔsonŋann a paak ki bia sa tura yaaboona bonchiann.”

¹⁵ Ki Abraham din mɔk sukurue, ki tan gaar linba ki Yennu din senn mɔsonn a wun tan turɔ na.

¹⁶ Nirɔ-i senn mɔsonn, u tuu jii wunba garɔ sanne ki senn, ki mɔsonn maŋ-n kpi mɔniɔk kura.

¹⁷ Tɔn, binba din yaa bin gaar Yennu nba din senn mɔsonn nba na, u din loon wun wannib a u kan mi lebit u dudukiti; li paak ki u din pukin u mɔlor u mɔsonn maŋ paak.

¹⁸ Li paak, bona ŋannlee nba kaa lebitu na be ki wann nan Yennu set sa gbeen u mɔsonn maŋ. Li paak, timm nba chiar saan u boor ni ki tinn na mɔk parcheenn ki gaar dindann nba be ti tɔɔnn po na chib.

¹⁹ Dindann nba ki ti mɔk na tee kaman nan manfoor jaantarik nba dia ti manfoor fanu. Li tee dindann nba gar Yendɔuŋ ni diiuk kaaruk nee ki kɔɔ diiuk maŋ linn po.

²⁰ Leŋe ki Yisa poŋ din gaar ti paak ki gar ki tee ti sɔnliitɔɔ, ki teen ti mantɔyudaanɔ nan yoo nba kaa gbennu, ki bia tee Melkisedek paabu ni mantɔɔ.