Galasia teeb 5 - Yennu Gbounpaauŋ Mɔɔr

Yentinmɔŋ dianu po

¹ Yisa Masia poŋ fat timma, ki ti be ti yama nie. Li paak, i daa te ki siar ji dia-i ki i tee li daabir.

² Min Pɔɔl mɔŋ mɔŋ beeri a li-i tee ki i sak ki dia punkokitu sennu na, li want nan Masia ki mɔk nyɔsiat turiini.

³ N ŋammit beer nifosɔɔ nba waa punkokitu sɔnu nee, nan li kpaa talase ki wun wei sennu kura.

⁴ Yimm nba yabii a Yennu-n yet a i tee niŋamm u boor sennu weiu paak na, i poŋ bɔkit i mɔŋ nan Masia, ki bia nyinn i mɔŋ Yennu ninbatinu ni.

⁵ Ŋaan timm teen Masia yada, ki u Seyeeŋ mun be ti ni; li paak, ti mɔk dindann ki guu yoo nba ki Yennu sa yet a ti tee niŋamm u boor.

⁶ Kimaan ti-i be Yisa Masia ni, ti-i lekii pot ti puna amii ti-i kii poti, li ki kpaa talasi. Ti-i teen Yisa Masia yada ki loon leeb, ŋanne tee linba kpaa talas.

⁷ Ŋaan i din tuun fanu na, ki ŋmee tan te ki i nyik barmɔnii saku?

⁸ Yennu nba ganni na kaa tun linba na.

⁹ Bi tuu yeen a “Datiŋ waaminnee te ki boroborkunn fikitir piir.”

¹⁰ Ŋaan ti Yomdaanɔ paak, n bia mɔk yada a i sii mɔk dudukyenn nanin; ki li-i tee nirɔ nbae ŋmat i dudukit, Yennu sa dat daanɔ maŋ tubira.

¹¹ N naa waas, mi-i bia lekii mɔɔntir a niib-ii porii bi puna gbaa, nlee ki bi bia sii mukisimi? Li-i bo-i tee barmɔniie ki n mɔɔntir punpotu po nan ma mɔɔntir dapunpunn po na, ŋann li bo kii mɔk muksuku.

¹² Min bo summan ki binba ŋmat i dudukit na-n nyik punpotue, ŋaan tɔɔ bi mɔŋ lana.

¹³ N naa waas, Yennu yiini yentinmɔŋ nie, ŋaan i daa te ki i yentinmɔŋ maŋ tan te ki i niauŋ-n tan mann nyanniini. Ŋaan yimm-n jii loomm ki somm i leeb man.

¹⁴ Kimaan sennu maŋ yur yet a “I loon a lɔɔ kaman nan fa loon a mɔŋ biaŋinba na.”

¹⁵ Ŋaan li-i tee ki i tee i leeb danii ki biir i leeb kaman nan muuk ni bonkobit na, i set sa baan i leeb yann na.

Yennu Seyeeŋ nan nisaarik binbeŋ labaar

¹⁶ Ŋaan n beerie, ŋaant ki Seyeeŋ-ii dia i binbeŋ man, ki daa te ki i niauŋ tuun nisaarik loommu.

¹⁷ Kimaan nisaarik loomm nan Seyeeŋ maŋ loomm ki waa leebi. Loomm-nba taar munnlee na tee dataie nan leeb i ni; li paak, i kan fit tun ya loon linba fanu.

¹⁸ Li-i tee ki i saak ki Yennu Seyeeŋ ŋmakitiri sɔnu, i ji ki be sennu maŋ ni.

¹⁹ Nisaarik binbeŋ nba want li mɔŋ linba ni tee bonchonchonn toonae, nan jakint toona, nan lanmiok toona,

²⁰ nan patmannu, nan nyɔkdinu, nan dataar, nan kunkɔna, nan funfunbiiuk, nan wutoor, nan bɔkitu, nan lukitin,

²¹ nan punponn, nan dayibu, nan bandakir, ki bia jii bonlia nba naan nna ki pukin; n ji beeri kaman nan ma poŋ beti biaŋinba na, binba tuun linba na kan mi di Yennu naami.

²² Ŋaan Yennu Seyeeŋe te ki nirɔ mɔk loomm, nan parpeenn, nan parmaasir, nan sukuru, nan burchint, nan ŋamm, nan yada,

²³ nan sikininmɔŋ, nan mɔŋdianu. Sennsau ji kaa ki sa biir wunba diari.

²⁴ Ki Yisa Masia nba yen binba na ŋanin poŋ din kpii bi nisaarik binbeŋ nan li loonbiit kura.

²⁵ Yennu Seyeeŋ nba turit manfoor na, ŋɔɔe ki li ŋan tii waau.

²⁶ Li ki ŋan ki tii mɔk karinbaanii, amii tii fiint ti leeb wutoa, amii tii mɔk funfunbiit nan ti leebi.