Filipi teeb 2 - Yennu Gbounpaauŋ Mɔɔr

Masia sikininmɔŋ nan u yudantuk labaar

¹ Ya be Masia ni biaŋinbae teeni paŋ, ki u loomm maŋŋit i para, ki i mɔk burchint nan ninbatinu i leeb paak, ki mɔk Seyeeŋ weinanleeb,

² ŋanne te ki n beeri ma yii mɔk dudukit yennkɔɔ ki pukin n parpeenn na, kii mɔk loomm yennkɔɔ ki i dudukit kura-ii tee yennkɔɔ.

³ I daa tuun bonsiar ki li nyi i funfunn nan i karinbaanii loomm ni, ŋaan yii be soonna nan i leeb man, kii dukii i leeb po ki gar ya dukii i mɔŋ po biaŋinba.

⁴ I daa te ki i baka be i kuukɔɔ bona ni, ŋaan te ki i baka-ii be i leeb bona ni biak.

⁵ Yi ŋaan ki binbeŋ booru nba ki Yisa Masia din mɔk na mun-ii be i ni:

⁶ U din tuu yɔɔ be kaman nan Yennu nee, ŋaan u din ki mi dukin a u sa jii u mɔŋ ki yekin nan Yennu,

⁷ ŋaan din sak nan u mɔŋ mɔŋ loomm ni ki nyik wa din mɔk linba na, ki kpint u mɔŋ ki teen kaman nan daabir na ki teen nisaarik, ki tan dɔkit ki teen nisaarik.

⁸ U din sikin u mɔŋ, ki sak ki kpo dapunpunn paak gbaa.

⁹ Linba na paake ki Yennu din donnɔ gar sɔɔ kura, ŋaan turɔ sansiar nba tee sanjaann ki gar sana kura.

¹⁰ Ŋanne te ki binba be sanpaapo nan tingbouŋ na nan kpeentiŋ, bi kur tan sa gbaan bi duna paak ki tur ŋɔɔ Yisa sann maŋ nibaakir,

¹¹ ki sɔɔ kura tan sa yet a ŋɔɔ Yisa Masia tee Yomdaanɔ kii dont ti Baa Yennu sann.

Yii nyirii kaman nan ŋmaajara na man

¹² N naa walonkai, ma din be i boor ni ki i sak n mɔb biaŋinba na, ki mi-i lekii kaa i boor ni, li kpaa talas ki yin sak n mɔb. Yii biakii tuun i toona nan yentinu nan gbananjekint man, ki tont i tinnu,

¹³ kimaan Yennu yɔɔ tuun nanie, a yii loon yii tuun u loomm kii biakii tuun u loomm maŋ.

¹⁴ Yii tuun siar kura ki daa burimi, amii ki nɔi mɔniɔku;

¹⁵ ŋanne sa te ki i daa mɔk biit, ŋaan kii mɔk popeenn, kii tee Yennu waas nba ki mɔk daŋ, kimaan i be nijakina nan biitdamm sinsuuk nie na. Li kpaa talas ki yii nyirii bi sinsuuk ni kaman nan ŋmaajara nba nyirii sanpaapo biaŋinba na,

¹⁶ ŋaan yetib manfoor labaar. Li-i tee ki i tuun nna, n tan sii mɔk yaak nan mii mɔk yuugontir i paak Masia daar maŋ, kimaan li tan sa wann nan n fara nan n toona ki tee yanni.

¹⁷ Li-i tee ki n lu n miar na ki pukin fara nba ki n poŋ dii ma n te ki yin teen yada na, li bo sii manin, ki n bo sii mɔk parpeenn nan i kura.

¹⁸ Li kpaa talas ki i mun-ii mɔk parpeenn nanin man.

Timoti nan Epafrodaitus labaar

¹⁹ N mɔk dindann ti Yomdaanɔ Yisa ni nan man tun Timoti i boor ni mɔtana, ki gbat i labaar ki n par ni-n dɔɔr.

²⁰ Ŋɔɔ kuukɔɔe fiin i po nan barmɔnii kaman nan ma fiin i po biaŋinba na.

²¹ Sɔɔ kur nba ji biar gbaa nan bi mɔŋ mɔŋ yarae jiak jiak, bi ki fiin linba tee Yisa Masia yar na po.

²² I mɔŋ mi wa tun biaŋinba ki wann u kotir biaŋinba po, nan wa tuun nanin barŋanii toona ni kaman nan bik nba tuun nan u baa biaŋinba na.

²³ Mi-i la bont nba yaa lin ŋmakit n po biaŋinba, n mɔk dindann ma n tumɔe yiama.

²⁴ Ti Yomdaanɔ paak, n mɔk yada nan n mɔŋ sa fit baar i boor ni mɔtana.

²⁵ N dukin ki li kpaa talase nan man tun ti naa bik Epafrodaitus, wunba tuun nan nunmɔnn ki gbaa a wun sommin nan Masia toonn, ŋɔɔe bia tee wunba ki i daan teenɔ i toomii ki u daan sommin na.

²⁶ U set loon wun la i kura. U par daan biir bonchiann, kimaan i daan poŋ gbat nan u yiare.

²⁷ Li set tee barmɔniie, u daan yiare ki per kuuma, ŋaan Yennu daan tinɔ ninbaauk, ki li ki tee u kuukɔɔ kaa, ŋaan bia tin n mɔŋ ninbaauk, ki nyinnin parbijaann ni.

²⁸ Li paak, n jekiree nan man tumɔ i boor ni, ki i-i lau yoonba ki yin yaan la parpeenn, ki n mɔŋ parbiir-n bot.

²⁹ Yii gaarɔ nan parpeenn man kaman nan i naa bik na ti Yomdaanɔ ni. Yi tur nibooru nba tee nan ŋɔɔ na nibaakir man,

³⁰ kimaan u daan ki kɔn u manfoor paak ki tan yaa wun kpo Masia toonn na paak, a wun turin sommir nba ki i daan ki fit turin na.