Fiitu 9 - Yennu Gbounpaauŋ Mɔɔr

¹ Ki malaka nba pukin baŋŋmu na pebir u kikaak na, ki n la ki ŋmaabir nyii sanpagbant ni ki tan baa tingbouŋ na ni; ki bi turɔ bootuk nba sumii bonchiann ki kaa terik na li peenu.

² Ki ŋmaabir na loot bootuk na, ki munyuut nyii leŋ ki tee kaman nan musaakau munyuut na, ki li munyuut na dɔkin yennu, ki tingbouŋ na bɔnn.

³ Ki tɔɔrii nyii munyuut na ni ki sik tingbouŋ na ni, ki Yennu turib tonu kaman nan nanii nba mɔk tonu tingbouŋ na ni biaŋinba na.

⁴ Ki Yennu yetib a bi daa biir mɔɔt nan bonburkara nan tifaatii, a ŋaan mukis niib nba ki mɔk Yennu dɔkit bi yugbia paak na;

⁵ ki u turib mɔb a bi daa kpi niib maŋ, a ŋaan te ki bin di fara ki saa dian ŋmaarii ŋaŋŋmu, ŋaan bi-i jun nirɔ li tonu sii tee kaman nan naŋ tonu nee.

⁶ Li yoo maŋ, li nibooru sa lon kuun ŋaan kan la, bi bia tan sii loon bin kpo, ŋaan kuun sa chiar ŋaan nyikibe.

⁷ Ki tɔɔrii na tee kaman nan taanii nba tuu teen siir a bin took tɔb nee; ki bi yir linba naan nan sarima fokirii na, ki bi numm po naan nan nifosaarik numm po na,

⁸ ki bi yut naan nan poob yut na, ki bi nyana naan nan yambɔra nyana na.

⁹ Ki bi lia naagbankɔŋŋa ki li naan nan kut na ki dɔkin bi para paak, ki bi kpinkpant fu fuut kaman nan tɔb taanii nba tuu teen siir ki daar torit ki tookit tɔb na.

¹⁰ Ki bi mɔk joa nan lɔbii ki li naan nan nanii yar na, ki lɔbii maŋ mɔk paŋ ki sa mukis nifosaarii ki saa jaŋ ŋmaarii ŋaŋŋmu nae.

¹¹ Ki malaka nba guu bootsunsuŋ maŋ tee bi bat, ki Hiibru maan ni bi yiu Abadon, ki Griik maan ni bi mun yiu Apolion. (Sann maŋ paak tee “Biirtɔɔ.”)

¹² Sinsinn parbiir na gara, ŋaan parbiir munnlee biar ki waa poor.

Kikaak nba pukin ŋannloob ni labaar

¹³ Ki malaka nba pukin bannloob na pebir u kikaak na, ki n gbat ki kunkɔr nyii sarima binbintir nba see Yennu tɔɔnn po na, li mɔgbanjoontii ŋanna na ni,

¹⁴ ki kunkɔr na yet malaka nba pukin bannloob ki dia kikaak na a wun loot malakanba banna nba ki bi lorib mɔkir nba ki bi yir Yufretes ni na ki lub;

¹⁵ ki bi lootib ki lub; Yennue din diab ki teemm siir daar nba ki bi sa kpi nifosaarii bɔkitu taar munntaa na yenn;

¹⁶ ki n gbat ki bi yeen lanjimanba nba tee tanjakira na kann, ki li tee tusbamm-bamm.

¹⁷ Ki n yerintu maŋ ni ki n la taanii nan bi tanjakira na ki bi tee nnae: ki tanjakira na lia naagbankɔŋŋa nba dɔkin bi para paak, ki li mɔn kaman nan muu na ki bia tee kaman nan bonbɔnwuwur na, ki bia mɔn kaman nan dukpan na; ki taanii na yura naan nan yambɔra yura na. Ki muu nan munyuut nan sarwuutaa nyi bi mɔi ni.

¹⁸ Ki muu nan munyuut nan sarwuutaa nba nyi taanii na mɔi ni na kpii nifosaarii bɔkitu taar munntaa na yenn.

¹⁹ Taanii maŋ yikoo be bi mɔi ni nan bi joa nie, ki bi joa na naan nan wai na ki mɔk yura ki bi dia junt niib.

²⁰ Ki niib nba biar ki bonbiir maŋ ki kpiib na din ki nyik ba jiantir bi mɔŋ bonninana na; bi bia jiantir narinbiit nan chicherii nan tana nan pata nba ki nyɔi, ki bia ki gbia, ki bia ki sommi.

²¹ Niib maŋ bia ki nyik bi nikpinu, nan bi jabaa bunu, nan bi bonchonchonn toona, nan bi nanyuk toona.