Fiitu 8 - Yennu Gbounpaauŋ Mɔɔr

Yiit nba pukin ŋannlore na labaar

¹ Pebik na nba tabit yiit nba pukin ŋannlore na, li yooe ki Yendɔuŋ ni ŋmin surimm, ki li yann waan.

² Li poorpoe ki n la malakanba bannlore nba see Yennu tɔɔnn na; ki u turib kikai ŋannlore.

³ Ki n bia la malakaganɔ ki u dia sarima seŋ ki saan saa set binbintir na tɔɔnn. Ki Yennu turɔ wubit bonchiann a wun pukin Yennu niib kur miaru na ni ki jii paan sarima binbintir nba see naangbouŋ na tɔɔnn po na, ki tur Yennu.

⁴ Ki wubit na munyuut nan Yennu niib na miaru nyii malaka nba see Yennu tɔɔnn na nii ni ki do sanpaapo.

⁵ Ki malaka na jii sarima seŋ na ki mɔɔr muu binbintir na paak ki gbeen seŋ na ki kpaar mɔɔn tingbouŋ na ni. Ki saak tian, ki fuut fu, ki sanyikintii nyikii, ki tiŋ damm.

Kikai ŋannlore labaar

⁶ Ki malakanba bannlore nba dia kikai ŋannlore na teen siir nan bin peb kikai na.

⁷ Sinsinn malaka na nba dɔŋ pebir u kikaak na, ki sakaana nan muu ki li ŋmat nan sɔn ki mɔ tingbouŋ na ni, ki tingbouŋ na bɔkitu taar munntaa na yenn dii muu, ki tiinii bɔkitu taar munntaa mun dii muu, ki mɔmaasa kur dii muu.

⁸ Malaka nba pukin bannlee na nba pebir u kikaak na, ki bi lu siar ki li naan nan jɔgbeŋŋir na ki di muu, ki tan baa tingbouŋ na mɔkgbeŋŋa kur ni, ki mɔkgbeŋŋa na bɔkitu munntaa yenn kpant sɔn,

⁹ ki linba be mɔkgbeŋŋa nyun na ni bɔkitu taar munntaa na yenn kpo kpo, ki ŋarint nba paa mɔkgbeŋŋa nyun na paak na, ki li bɔkitu kann taar munntaa yenn kur biir.

¹⁰ Malaka nba pukin banntaa na nba pebir u kikaak na, ki ŋmaabir gbeŋŋir nba di ki naan nan muu na nyii sanpaapo ki tan baa mɔka nan nyunbua nba be tingbouŋ na ni li bɔkitu taar munntataa yenn ni.

¹¹ (Ŋmaabir na sann din yi “Ton.”) Ki nyun na bɔkitu taar munntaa yenn kpant ton; ki niib bonchiann nba nyuu nyun na kpo, kimaan nyun na nba ton na paak.

¹² Malaka nba pukin banna na nba pebir u kikaak na, ki yennu nan ŋmaarik nan ŋmaabira li chian yenni taar munntaa na ni yenn yenn bɔnn. Ki yennu nan ŋmaarik nan ŋmaabira yentu na li chian yenni taar munntaa bɔnn. Ki yentu nba tuu yeen yennu ni na, ki li chian yeŋ taar munntaa ni ji ki yeeni, ki ŋmaarik nan ŋmaabira mun ji ki yeeni, ki nyiɔk bɔnnu mun bɔkit li biaŋ ki mun bɔnn nna.

¹³ Li yoo ki n got ki la kanbagbeŋŋir ki u yuuk sanpagbant ni, ki yikin nan kunkɔsaakar a “Parbiir be, parbiir be, a malakanba banntaa nba biar na-i taŋŋi pebir kikai na, ki li mɔnii na bui, parbiir tan sii be tingbouŋ na niib paak.”