Fiitu 7 - Yennu Gbounpaauŋ Mɔɔr

Israel teeb labaar

¹ Li poorpo ki n la malakanba banna ki bi see tingbouŋ na loka ŋanna na ni, ki dia wouŋ nba nyi loka kur na ni, a li daa da tiŋ ni amii mɔkgbeŋŋa ni amii tisiaki.

² Li yoo ki n la malakaganɔ ki u nyii yendopo ki dia dɔk nba tee manfodaanɔ Yennu yar na; ki u yikin nan kunkɔsaakar ki yeen malakanba banna nba ki Yennu turib yaak a bin biir tiŋ nan mɔkgbeŋŋa na,

³ a bi daa biir tingbouŋ na nan mɔkgbeŋŋa na nan tiinii na see ki bi tan dɔk Yennu toontunna bi yugbia paak sinsinn.

^4-8 Ki n gbat binba ki bi dɔkib nan Yennu dɔk na kann, ki bi tee niib tuskobik nan tusa piinna nan tusa ŋanna, binba nyii Israel nibooru kur ni. Ki niib tusa piik nan ŋannlee nyii Juda booru ni, ki niib tusa piik nan ŋannlee mun nyii Ruben booru ni, ki niib tusa piik nan ŋannlee mun nyii Gad booru ni, ki niib tusa piik nan ŋannlee mun nyii Aser booru ni, ki niib tusa piik nan ŋannlee mun nyii Naftali booru ni, ki niib tusa piik nan ŋannlee mun nyii Manase booru ni, ki niib tusa piik nan ŋannlee mun nyii Simeon booru ni, ki niib tusa piik nan ŋannlee mun nyii Liifai booru ni, ki niib tusa piik nan ŋannlee mun nyii Isakar booru ni, ki niib tusa piik nan ŋannlee mun nyii Sebulun booru ni, ki niib tusa piik nan ŋannlee mun nyii Josef booru ni, ki niib tusa piik nan ŋannlee mun nyii Benjamin booru ni.

Niburchiauŋ nba din lakin na labaar

⁹ Li poorpoe ki n got ki la niburchiauŋ ki bi kaa kanni, ki nyii tingbouŋ na yent kur ni, nan nibooru booru kur ni, nan maaru kur ni, nan mabooru kur ni, ki lia liatfopeenii ki see naangbouŋ na nan Pebik na tɔɔnn po, ki dia dia biabfaat bi nii ni, ki yikin nan kunkɔsaakara ki yeen a,

¹⁰ “Tinnu nyi ti Yomdaanɔ Yennu nba kar naangbouŋ na paake, ŋɔɔe nan Pebik na.”

¹¹ Ki malakanba na kur set ki lint naangbouŋ na, nan saakab na, nan bonfoa banna na, ki baa funfaba naangbouŋ na tɔɔnn ki jiantir Yennu,

¹² ki yeen a, “Mɔmɔmm, paku nan dontir nan yan nan niipoouk turu nan nibaakir nan paŋ nan yikoo tee Yennu yare mɔkmɔk nan yoo nba kaa gbennu. Mɔmɔmm.”

¹³ Ki saakab na yenɔ boin a “Ki binba lia liatfopeenii na tee lamme, bi nyii lee?”

¹⁴ Ki n jiin ki yetɔ a “Chanbaa, fine mi, ŋaan min ki mi.” Ki u yetin a, “Niib na nyii fargbeŋŋir na nie, ki wuur bi liatfɔkit na Pebik na sɔn ni ki li ji peen,

¹⁵ a li paake ki bi see Yennu naangbouŋ na tɔɔnn ki tuun teenɔ nyiɔk nan yennu ni u jiantu diiuk na ni, a ki ŋɔɔ Yennu nba kar naangbouŋ na paak na sii be namm, ki u maasu sii dɔɔk bi paak;

¹⁶ a ki kon nan nyunyukiru kan mi soorib, ki yentonu amii tongbeŋsiar kan mi ki toŋ bi gbanu,

¹⁷ a ki Pebik nba be naangbouŋ na tɔɔnn na sii guub, ki chiamm saan namm nyunbuur nba teen manfoor na ni, a ki Yennu sa fiar bi ninnyuut kur.”