Fiitu 6 - Yennu Gbounpaauŋ Mɔɔr

Yiit na labaar

¹ Li poorpo ki n la ki Pebik na tabit yiit ŋannlore na yenn, ki n gbat bonfoa banna na yenɔ kunkɔr ki li tee kaman nan satianii na ki yiin a “Baat.”

² Ki n got ki la tanpeeŋ, ki wunba jak u paak na dia tadaauk, ki bi turɔ fokirik, ki u nyii, ki tee paŋ daanɔ, a wun kɔn ki nyann bonsiar kur.

³ Ki Pebik na bia tabit yiit nba pukin ŋannlee na, ki n gbat bonfoor nba pukin bannlee na kunkɔr ki u yiin a “Baat.”

⁴ Ŋanne ki n la tanmɔŋ nyii ki set, ki bi tur wunba jakɔ na yaak a wun nyinn parmaasir tingbouŋ na ni ki te ki niib-ii kpi bi leeb; ki bi bia kubinɔ jukbanjagbeŋŋir.

⁵ Ki Pebik maŋ bia tabit yiit nba pukin ŋanntaa na, ki n bia gbat ki bonfoor nba pukin banntaa na yiin a “Baat.” Ki n bia la ki tanbɔŋ see leŋ, ki wunba jakɔ na dia linba ki bi bikii bona na u nuu ni.

⁶ Ki n gbat fuut ki li tee kaman nan kunkɔr na ki nyii bonfoa banna na ni ki yeen a “Diŋmanbaŋ tee daar paauk, a ki karwɔntaa ŋmanbaŋ munntaa mun tee daar paauk; a ŋaan daa biir kpan nan daan na.”

⁷ Ki Pebik na tabit yiit nba pukin ŋanna na; ki n gbat kunkɔr ki li nyii bonfoor nba pukin banna na, ki u yiin a “Baat.”

⁸ Ŋanne ki n la tanpeenwuwur, ki wunba jakɔ na sann tee Kuun; ki kpeentiŋ mun waa u poor; ki Yennu turib yikoo a bin kpi tingbouŋ na niib bɔkitu kann taar munna yenn, a bin kpib nan jukbanjiak nan kon nan yiaru, ki bia kpib nan tingbouŋ na bonkobibiit.

⁹ Ki Pebik na bia tabit yiit nba pukin ŋaŋŋmu na, ki n la ki binba ki niib din kpiib kimaan ba din dia Yennu maan, nan barŋanii nba ki bi din mɔk na paak, ki bi be binbintir na nyakir ni,

¹⁰ ki yikin sanpaapo ki yeen a, “Ti Yomdaanɔ Yennu, fin nba tee popeendaanɔ ki bia tee barmɔnii daanɔ, a li sa yukir nleewa ki a tan bu tingbouŋ na niib na buut ki dat bi tuba, kimaan ba kpiit na paaki?”

¹¹ Ŋanne ki bi tur bi kur liatfopeenii, ŋaan yetib a “I toontunleeb nan i naa waas nba ki niib tan sa kpib kaman nan ba din kpii yimm biaŋinba na, yin foi waan kii guu yoo nba ki bi tan sa kpib ki gbenn.”

¹² Ki n la Pebik na ki u tabit yiit nba pukin ŋannloob na; ki tiŋ jek bonchiann, ki yennu bɔnn chimm, ki ŋmaamunn mɔnn kaman nan nyumɔnt na.

¹³ Ki ŋmaabira nyii sanpaapo ki baa tiŋ ni kaman nan wouŋ nba tuu fikit ki niŋ kinkaŋ ki u lɔɔna tuu baa biaŋinba na.

¹⁴ Ki sanpaak pɔbin pɔbin kaman nan pɔɔbit na ki bot, ki jɔɔt kur nan gbingbana kur chaat chaat siaminba ki li tuu be na.

¹⁵ Ŋanne ki tingbouŋ na kpanbara, nan nijaana, nan lanjimanba yudamm, nan nitarinyikaa, nan panii damm, nan sɔɔ kur, binba tee daaba, nan binba yen bi mɔŋ, ki bi kur chiar chiar ki kɔɔ tankɔrit nan jɔlɔnt ni,

¹⁶ ki yeen a jɔɔt nan tana na-n baa bi paak, a ki wunba kar naangbouŋ paak na kan lab, a ki Pebik na mun kan lab, nan u wutoor nba doo bi paak na,

¹⁷ kimaan wunba kar naangbouŋ na paak na nan Pebik na wutoor dagbeŋŋir daar maŋ baar na, ki sɔɔ kaa ki sa set bi wutoor maŋ tɔɔnn po.