Fiitu 5 - Yennu Gbounpaauŋ Mɔɔr

Gbanpɔɔbir nan Pebik labaar

¹ Ŋanne ki n bia la ki sɔɔ kar naangbouŋ na paak ki dia gbanpɔɔbir u nuudiitu ni, ki gbouŋ maŋ mɔk sɔbnii li numm po nan li poor po, ki bi din jii tiik yiit ki tabin li mɔi boa ŋannlore ni.

² Ki n la malaka nba mɔk paŋ ki u mɔɔntir nan kunkɔsaakar a “Ŋmee jaŋ nan wun pɔbit gbanpɔɔbir na ki tabit li yiiti?”

³ Ŋaan ki sɔɔ kaa Yendɔuŋ ni amii tingbouŋ na ni amii kpeentiŋ ki sa fit pɔbit gbanpɔɔbir na ki got li nɔɔk ni.

⁴ Li yoo ki n bui nan ninnyuut kimaan sɔɔ nba kaa ki jaŋ nan wun pɔbit gbanpɔɔbir na ki got li nɔɔk ni na.

⁵ Ŋanne ki saakab na yenɔ yetin a n daa bui, a n got wunba nyii Juda maaru ni ki u sann yi Juda Yambɔr na, wunba tee David yaaboongbeŋŋir ki nyann bonsiar kur na, ŋɔɔe sa fit ki tabit yiit ŋannlore na ki pɔbit gbanpɔɔbir maŋ.

⁶ Ki n la Pebik ki u see naangbouŋ na boor ki bonfoa banna na nan saakab na see ki lintɔ; ki Pebik na tee kaman nan pebik nba ki bi kpiiu ŋaan ki u fiir kuun ni na, ki u mɔk yina ŋannlore, nan ninbina ŋannlore linba tee Yennu Sei ŋannlore nba ki u tumm tingbouŋ na kur ni na.

⁷ Ki Pebik na saan ki saa gaar gbanpɔɔbir na daanɔ nba kar naangbouŋ na paak u nuudiitu ni.

⁸ Wa gaar gbanpɔɔbir na yoonba ki bonfoa banna na nan saakab piinnlee nan banna na gbaan u tɔɔnn, ki saakab na kur dia biat nan sarima senii, ki bonnunubit nba see Yennu niib miaru seenu niŋ gbee senii na ni ki muu di leŋ.

⁹ Ki bi yiin yanpaanii ki teen Pebik na ki yeen a, “A set jaŋ nan fan gaar gbanpɔɔbir na ki tabit li yiit ŋannlore na, kimaan a din kpoe ki jii a sɔn ki daa niib ki tur Yennu; niib maŋ nyii nibooru booru kur ni, nan mabooru kur ni, nan maaru kur ni, nan tingbouŋ na yent kur ni.

¹⁰ A bia te ki bi tee a naan ni niib binba tee manteeb, a bin tun Yennu toona; ki bi sii yen tingbouŋ na teeb.”

¹¹ Li poorpo biak ki n got ki la malakanba tusa tusa tusa, ki bia gbat bi kunkɔra, ki bi ŋaa lint bonfoa banna na nan saakab na nan naangbouŋ na.

¹² Ki n gbat ki bi yeen nan kunkɔsaakar a “Pebik nba ki bi din kpiiu ki u fiir na, ŋɔɔe jaŋ nan wun gaar paŋ nan mɔkint nan yan nan nyannu nan nibaakir nan dontir nan paku.”

¹³ Ki linba kur ki Yennu din nan na, linba be sanpaapo, nan linba be tingbouŋ na ni, nan linba be kpeentiŋ, nan linba be mɔkgbeŋŋa ni, n gbat bi kur yeen a, “Paku nan nibaakir nan dontir nan paŋ kur-ii be wunba kar naangbouŋ na paak na nan Pebik na paak ki jii saa yoo nba kaa gbennu.”

¹⁴ Ki bonfoa banna na sak ki yet a “Mɔmɔmm.” Ki saakab na kur gbaan Yennu nan Pebik na tɔɔnn ki jiantirib.