Fiitu 4 - Yennu Gbounpaauŋ Mɔɔr

Ba jiantir Yennu biaŋinba Yendɔuŋ ni

¹ Li poorpo ki n bia la Yendɔuŋ ni gann ki li loot, ki n gbat kunkɔr nba ki n poŋ gbat na ki li bia piak ki teenin ki naan nan kikaak nba tuu mɔ biaŋinba na; ki kunkɔr maŋ betin a n do nna ki wun wannin linba sa tun nanna poorpo.

² Li taakpaak ni ki Yennu Seyeeŋ na fiir n ni, ki n la ki sɔɔ kar naangbouŋ paak Yendɔuŋ ni,

³ ki u numm po nyirii kaman nan tana nba ki bi yi jaspa nan kanelian na, ki naatuuruk bɔɔn ki lint naangbouŋ na, ki naatuuruk maŋ tee kaman nan bonbɔnwuwur na.

⁴ Ki naangbant piinnlee nan ŋanna dɔɔ ki lint naangbouŋ na. Ki saakab piinnlee nan banna lia tapeenii ki yir sarima fokirii ki kar naangbant piinnlee nan ŋanna maŋ paak.

⁵ Ki sanyikintii nyi naangbouŋ maŋ ni nan fuut nan satianii. Ki fita ŋannlore lakin di naangbouŋ na tɔɔnn, ŋanne tee Yennu Sei ŋannlore na.

⁶ Ki siar naan nan mɔkgbeŋŋir ki dɔɔ naangbouŋ na tɔɔnn ki tee kaman nan mianu nba nyirii biaŋinba na. Ki bonfoa banna be leŋ ki lint naangbouŋ na, ki mɔk ninbina bonchiann bi numm po nan bi poorpo kur.

⁷ Sinsinn bonfoor na naan nan yambɔr nee, ki wunba waa bannlee na mun naan nan naajak na, ki wunba waa banntaa na numm po naan nan nifosaarik numm po na, ki wunba waa banna na mun naan nan kanbayuktuk nba yuuk na.

⁸ Ki bonfoa banna na kur mɔk kpinkpant ŋannloob-loob, ki bia mɔk ninbina bonchiann bi gbanant kur po. Ki yennu ni nan nyiɔk kur bi ki nyikit yanii yinu. Bi yiin a, “Popeendaanɔ, popeendaanɔ, popeendaanɔ tee ti Yomdaanɔ Yennu nba mɔk paŋ kura, ki din be, ki bia be nan mɔtana, ki bia tan sii be yoo nba kaa gbennu na.”

⁹ Bonfoa banna na-i taŋŋi teen wunba kar naangbouŋ na paak ki be mɔkmɔk nan mɔkmɔk na niipoouk nan dontir nan paku,

¹⁰ li yooe ki saakab piinnlee nan banna na tuu baa ki gbaan wunba kar naangbouŋ maŋ paak tɔɔnn, ki pukiiɔ, wunba be mɔkmɔk nan mɔkmɔk na. Bi bia tuu yit bi fokirii nee ki bir naangbouŋ na tɔɔnn ŋaan yeen a,

¹¹ “Ti Yomdaanɔ Yennu, li jaŋ nan tin jianta, ki tura nibaakir nan pakuwa, kimaan fine din nan bont kura. A loomm paake ki a naauŋ maŋ kur be, ki mɔk manfoor.”