Fiitu 2 - Yennu Gbounpaauŋ Mɔɔr

Masia labaar nba tee Efesus teeb yare na

¹ Ki wunba ki n lau na betin a n sɔb labaar na ki tur u weira nba lakin be Efesus doo ni na malaka a “Labaar na nyii wunba dia ŋmaabira ŋannlore u nuudiitu ni na ki bia somm sarima fita ŋannlore sinsuuk ni na boore:

² ŋɔɔe yet a ‘N mi i toona nba tee biaŋinba na, nan ya yabir ki tuun toonŋana nan sukuru biaŋinba, ki bia mi nan i ki loon nibiit i sinsuuk ni, li paake ki i din bikin binba tuu yaa a bi tee n toomiinba ŋaan ki ki tee na, ki i bann nan bi tee faidamme.

³ N mi nan i mɔk sukuru ki la fara n paak, ŋaan i ki nyikimi.

⁴ Ŋaan i biit tee nnee: i ji ki loonin kaman nan ya din dɔŋ loonin sinsinn biaŋinba na.

⁵ Tiat man ya din tuu be biaŋinba na ŋaan ji tan lebit ki nyikir na. Nyikin man i biit maŋ ŋaan kii tuun ya poŋ tuu tuun biaŋinba sinsinn ki li ŋan na; li-i tee ki i kan nyik i biiti, n sa baar i boor ki jii i fitir na li boor, ŋaan beri.

⁶ Ŋaan ya tuun linba ki li ŋane na; i ki loon toona nba ki Nikola niib tuun na, kaman nan n mɔŋ nba ki loon toona nba ki bi tuun na.

⁷ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na. “Wunba nyann nyannu maŋ, ŋɔɔe ki n sa turɔ sɔnu ki wun di manfoor tilɔɔna nba be Yennu boor, siaminba ki bi yir Paradais na.’ ”

Masia labaar nba tee Simirna teeb yare na

⁸ Ki wunba ki n lau na bia betin a n sɔb labaar na ki tur u weira nba lakin be Simirna doo ni na malaka a “Labaar na nyii wunba tee bont kura pinpiik nan li gbennu na boor ni; ŋɔɔe din kpo ki tan bia fiir kuun ni na;

⁹ ŋɔɔe yet a ‘N mi i fara po, ki bia mi nan i tee nandamme, ŋaan mɔmɔmm, Yennu boor ni, i tee mɔkitae; ki n mi nan nisiab piak ki biir i sana, ki bia yaa a bi tee Juu teebe, ŋaan ki ki tee nna; bi tee Sintaanii niibe.

¹⁰ I daa tiin jaŋmaanii nan fara nba baat i paak na. Gotir man, Sintaanii sa te bin soor i siab ki kɔɔmm dansarik ki bikimm, i bia tan sa la fara ki saa dian daa piik; ŋaan yii teenin yada mɔkmɔk nan i kuun, ki n tan sa pi-i piinii nba tee manfoor.

¹¹ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na. “Wunba nyann nyannu maŋ, u kan la kuun nba pukin munnlee na.’ ”

Masia labaar nba tee Pegamum teeb yare na

¹² Ki wunba ki n lau na bia betin a n sɔb labaar na ki tur u weira nba lakin be Pegamum doo ni na malaka, a ki yet a “Labaar na nyii wunba mɔk jukbanjiak nba di mɔleemii na boor nie:

¹³ ŋɔɔe yet a ‘N mi nan siaminba ki i be na tee siaminba ki Sintaanii naangbouŋ na be, ki n mi nan i set dia n sann; yoo nba ki bi din tan kpii Antipas nba din tee n siara daanɔ nan barmɔnii, i mɔŋ doo nba ki Sintaanii be na, li yoo maŋ gbaa ki i ki yêt n sɔnu.

¹⁴ Ŋaan mɔmɔmm, i mɔk biit ŋannlee nnae ki n sa wanni: siab be i sinsuuk ni ki dia Balaam sennu; ŋɔɔe din wann Balak wa sa teen biaŋinba ki te ki Israel teeb-n tun biit na. U din te ki bi dii pata nant, ki bia te ki bi chomm nan leeb.

¹⁵ Li mun bia tee nnee i sinsuuk ni, ki i siab mun waa Nikola niib maŋ wannu.

¹⁶ Li paak, yi nyik i biit maŋ; li-i kii tee nnai kaa, n sa baar mɔtana nan jukbanjiak nba tantir ki nyi n mɔb ni na, ki kɔn biir li nibooru.

¹⁷ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na. “Wunba nyann nyannu na, ŋɔɔe ki n sa turɔ woonin ni jeet nba ki bi yir mana na ki wun di, ki n bia sa turɔ tanpeenn nba ki sanpaann sɔb li paak ki sɔɔ ki mir na, see fin nba gaar na kuukɔɔ.’ ”

Masia labaar nba tee Tiataira teeb yare na

¹⁸ Ki wunba ki n lau na bia betin a n sɔb labaar na ki tur u weira nba lakin ki be Tiataira doo ni na malaka a “Labaar na nyii Yennu Bija nba ki u ninbina naan nan mupeenu na, ki u taa bia nyirii kaman nan nabint nba tuu nyirii biaŋinba na boor nie;

¹⁹ ŋɔɔe yet a ‘N mi i binbeŋ nba tee biaŋinba, ki bia mi i loomm, nan i yada teenu, nan i toona, nan ya mɔk mintir biaŋinba, ki bia mi nan i toonŋana tumu pukii ki gar i sinsinn toona na.

²⁰ Ŋaan i biit tee nnee: ya sak poo nba ki bi yiu Jesebel ki u yaa a u tee Yennu sɔkinii, ki ji taan ki be i boor ni ki kpann n toontunna ki wantib a bii chomm nan leeb kii di pata nant na.

²¹ N turɔ yoo a wun lebit u binbeŋ na, ŋaan ki u ki saak a wun nyik u chonchonsin na.

²² Li paak, n sa jiiu ki lu-u fara gado paak nan binba tuu lakin chomm nanɔ na kur; li-i kii tee ki bi nyik biit nba ki bi lakin tuun nanɔ na, n sa kɔɔmm fargbeŋŋir ni,

²³ ki kpi u weira kura; ki n weira kur sa bann nan mine tee wunba mi niib dudukit nan bi loomm nba tee biaŋinba, ŋaan sa tur sɔɔ kur u toona nyɔɔt nba tee biaŋinba.

²⁴ “Ŋaan i siab nba be Tiataira ki ki waa poo maŋ sɔnii na, ki bia ki waa linba ki siab yir Sintaanii woonin ni labaar na, n yeen yimme a n kan jinni jikpiata.

²⁵ Yii dia man linba ki i mɔk na fanu mɔkmɔk nan yoo nba ki n tan sa baar na.

^26-27 Wunba nyann nyannu na, ki tuun n loomm ki kan nyik, n sa turɔ paŋ nba ki n gaar n Baa boor ni na booru, ki bia turɔ tingbouŋ na nibooru kur yikoo ki u sii diab nan paŋ ki sa fit biirib kaman nan fa tuu dia kut patu ki faa boba ki yee biaŋinba na.

²⁸ N bia sa chab li yɔɔ sanyafaar ŋmaabir.

²⁹ “Wunba mɔk tuba, wun gbiint linba ki Yennu Seyeeŋ na yeen ki teen Masiaweira na.’ ”