Fiitu 18 - Yennu Gbounpaauŋ Mɔɔr

Babilɔnn nba baa biaŋinba labaar

¹ Li poorpo ki n bia la malakasɔɔ ki u mɔk yikoo bonchiann ki nyii Yendɔuŋ ni, ki u yentu ŋamm yent ki lint tingbouŋ na lokir kur po,

² ki u yeen nan kunkɔsaakar a “Dogbeŋŋir Babilɔnn na baawa, li set baawa, ki ji kpant siaminba ki narinbiit kur nan nɔɔnbiit nba mɔk sinsint na boore.

³ Kimaan booru kur poŋ nyuu u nianbiiuk daan nawa, ki tingbouŋ na kpanbara chomm nanɔ, ki tingbouŋ na kpinkpenta kpant mɔkita u nianbiiuk nba mantik yabit na.”

⁴ Ŋanne ki n bia gbat kunkɔsiar ki li nyii Yendɔuŋ ni ki yeen a “N niib, nyint i mɔŋ man u boor, ki daa lakin ki tuun toonbiit nanɔ, ki u biit maŋ tubdatu daa taabitiini,

⁵ kimaan u biit na doo bonchiann ki baar sanpagbanta, ki Yennu tian u biit maŋ po.

⁶ Tɔn, bin mun teen ki jiinɔ kaman nan wa tuu tee biaŋinba na, ki pa jiinɔ u biit pann taar munnlee, ki dat u tuba bonbiir, kimaan u te ki niib tun toonbiit bonchiann;

⁷ a ki te wun la muksuk nan parbiir a ki lin jaŋ nan wa din tuu be u yama ni ki dont u mɔŋ biaŋinba na, ki yeen u par ni a ŋɔɔ poobate kar na, a ki li ki tee a u tee pakɔɔki, a li paak a u kan mi la parbiiri.

⁸ Li paak, fara sa baar u paak dasiar, ki yiaru nan parbiir nan kon sa soorɔ, ki muu bia sa diu; kimaan ti Yomdaanɔ Yennu nba bu nanɔ na tee yabint daanɔe.”

⁹ Tingbouŋ na kpanbara nba chomm nanɔ ki di u mant na, bi-i taŋŋi la u muu dinu munyuut na, bi tan sa bui ki fabin u paak.

¹⁰ Bi tan sa tin jaŋmaanii u fara na paak, ki see banfɔkira ki ji yeen a “Aba, dogbeŋŋir na, aba, Babilɔnn, doo nba mɔk paŋ na, a tubdatu baar yiama.”

¹¹ Ki tingbouŋ na kpinkpenta tan sa bui ki fabin u paak, kimaan sɔɔ nba tan sii kaa ki sa daa bi tiat na paak,

¹² sɔɔ ji kan mi ki daa bi tiat nba tee sarima, nan nabint, nan tanchincheena, nan taŋant, nan gbaknii, nan agogo chinchena, nan daat nba mantik fan, nan linba ki bi jii loobuk nyana ki naan, nan bona nba ki bi dia daat nba yaa daauk paak ki naan na, nan kut, nan bont nba kur fan,

¹³ nan kakaduro, nan gasinbunn, nan tulaarii, nan mir, nan frankinsen, nan daan, nan kpan, nan yon, nan dii, nan nei, nan pei, nan taanii nan li torit, nan daaba nan nisaarii manfoa.

¹⁴ Ki kpinkpenta na yeenɔ a “Tiat nba ki a bo loon fii mɔk na, nan a mɔkint na, nan taŋant na gara, a ji kan mi ki la.”

¹⁵ Ki kpinkpenta nba kpentir ki tan la gor doo maŋ ni na tan sii see banfɔkira ki mɔ ŋaan fabin, kimaan bi tiin jaŋmaanii u fara na paak.

¹⁶ Bi sa bui ki fabin ki yeen a “Aba, dogbeŋŋir nba naan nan poo nba gbab chinchenŋana nan agogo chinchena nan sarima nan laanii nba daauk paar na,

¹⁷ yoo waaminna sinsuuk ni ki a mɔkint na kur biir.” Ki binba tee ŋarint yudamm, nan binba kɔɔ ki saa bi saanu na, nan ŋarinkanna, nan binba kur tuun mɔkgbeŋŋa ni, ki bi ji see banfɔkir,

¹⁸ ŋaan yikin, ba la ki muu diu ki li munyuut do sanpaapo na, ki bia yeen a “Ti ki mi la dogbeŋŋir na booru;”

¹⁹ ki bi finii tant ki pukin bi mɔŋ paak, ki bui ŋaan fabin ki yeen a, “Aba, dogbeŋŋir nba ki niib mɔk ŋarint ki lin mɔkgbeŋŋa ni ki kpentir ki laat gor leŋ na, ki li taan baa ki biir yoo waaminna nɔɔk ni.”

²⁰ Yendɔuŋ ni teeb, nan Yennu niib, nan u sɔkiniinba, nan Yisa toomiinba, i mɔk man parpeenn, kimaan Yennu bu dogbeŋŋir maŋ buut ki biirɔ ki turi.

²¹ Ki malakapaarɔ tɔkir tann nba gbeŋ kaman nan naagbeŋŋir na, ki lur mɔkgbeŋŋir ni, ŋaan yet a “Bi tan sa wokit dogbeŋŋir Babilɔnn na ki lu-u nnee wun biir, ki sɔɔ ji kan mi ki lau,

²² ki ji kan mi ki gbat ki bafaara faa biat, amii ki yan-yinna yiin yanii, amii ki yerpebira peeb yerii, amii ki naatunpebira peeb naatuna doo maŋ ni; ki toontunnɔ bia kan mi ki be leŋi, ki sɔɔ bia kan mi ki gbat naar fuut leŋi;

²³ a fitir yentu ji kan yent doo maŋ ni; a jakunt nan pookɔɔnt ji sii kaa leŋ biaki. Doo maŋ ni kpinkpentae tuu tee tingbouŋ na paarib, ki doo maŋ niib bia lin dia nyɔku ki kpann tingbouŋ na niib kur;

²⁴ a Yennu sɔkiniinba, nan u niib, nan binba ki niib kpiib tingbouŋ na kur ni na, a bi sɔn be Babilɔnn maŋ paak, li paak ki Yennu dat bi tuba.”