Fiitu 16 - Yennu Gbounpaauŋ Mɔɔr

Senii nba gbee nan Yennu wutoor labaar

¹ Li poorpo ki n bia gbat ki kunkɔsaakar nyii jiantu diiuk na ni ki piak teen malakanba bannlore na, a bin jii senii ŋannlore nba gbee nan Yennu wutoor na ki kpaar mɔɔn tingbouŋ na ni.

² Ki sinsinn malaka na saan ki saa kpaar linba be u seŋ ni na ki mɔɔn tingbouŋ na ni, ki nara nba bi ki yiar bonchiann soor binba mɔk bonkobuk na dɔk, nan binba jiantir li naauŋ na.

³ Ki malaka nba pukin bannlee na mun kpaar linba be u seŋ ni na ki mɔɔn mɔkgbeŋŋa ni, ki nyun na kpant nyumɔnt kaman nan kpeemɔ sɔn na, ki bonfoa nba kur be mɔkgbeŋŋa nyun na ni kpo.

⁴ Ki malaka nba pukin banntaa na mun kpaar linba be u seŋ ni na ki mɔɔn kpenii nan nyunbua ni ki li nyun na kpant sɔn.

⁵ Li poorpo, ki n gbat malaka nba tee nyun saakɔɔ na yeen a, “Ti Yomdaanɔ, Popeendaanɔ, wunba be, ki bia tuu yɔɔ be na, a buut na bunu tee linba took sɔnue,

⁶ kimaan niib kpii a niib nan a sɔkiniinba, ki a jii sɔn ki turib a bin nyu. Ŋanne jaŋ namm.”

⁷ Ki n bia gbat ki kunkɔr nyii binbintir na boor ki yeen a, “Ti Yomdaanɔ Yennu nba mɔk paŋ kur, a buut na tee mɔmɔmme, ki tee linba took sɔnu.”

⁸ Ki malaka nba pukin banna na kpaar linba be u seŋ ni na ki mɔɔn yennu paak ŋaan chabɔ yaak a li tonu na-n ŋamm funn niib ki yekitib nan muu na.

⁹ Ki yennu na ŋamm yekitib nan muu na; ki bi ji sukii Yennu wunba mɔk fara na paŋ na sann, ŋaan ki bi lek bia ki sak nan bin lebit bi dudukit kii teenɔ nibaakiri.

¹⁰ Ki malaka nba pukin baŋŋmu na kpaar linba be u seŋ ni na ki mɔɔn bonkobuk na naangbouŋ paak, ki bonkobuk maŋ naan yent kur kpant bunbɔnn, ki niib junt bi nyana tont na paak,

¹¹ ki bia sukii Yennu nba be Yendɔuŋ ni na, kimaan bi tont nan bi nara na paak, ki bia ki sak nan bin nyik bi toonbiit toona na.

¹² Ki malaka nba pukin bannloob na mun kpaar linba be u seŋ ni na ki mɔɔn mɔkir nba ki bi yir Yufretes na ni, ki li nyun na fɔɔr ki tur sɔnjouk, ki kpanbara nba be yendopo na gar poot.

¹³ Ki n la narinbiit banntaa ki bi naan nan pɔnta na ki nyii waakperbiiuk na, nan bonkobuk na, nan faak siara sɔkinii na mɔi ni.

¹⁴ Bi tee narinbiit nba tuun bakitnauŋ toonae ki lin tingbouŋ na ni kpanbara kur boor, ki tikiib a bin took tɔb na, ti Yomdaanɔ Yennu wunba mɔk paŋ kur na dagbeŋŋir daar maŋ.

¹⁵ Tɔn, Yisa yet a “Nnara, n baat kaman nan nanyukɔɔ nba tuu baar biaŋinba nae. Parpeenn be daanɔ nba ki gɔɔnt ŋaan nyɔi na paak, ki lia u tiat ki ki somm yanni, ki niib kan la u fei.”

¹⁶ Ki narinbiit na tikir kpanbara na ki saan namm siaminba ki Israel teeb yi Amagedon na.

¹⁷ Ki malaka nba pukin bannlore na mun kpaar linba be u seŋ ni na ki mɔɔn wan ni; ki kunkɔsaakar nyii naangbouŋ nba be Yenjiantu diiuk ni na ki yet a “Li tuma.”

¹⁸ Ki sanyikintii nyikintir, ki satianii tian fu, ki tiŋ damm bonchiann. Li tiŋ dammu booru ki mi damm kaawa la nyii yoo nba ki Yennu din nan nifosaarii, kimaan la damm bonchiann biaŋinba na.

¹⁹ Ki dogbeŋŋir na bɔkit taar munntaa, ki nibooru kur digbana baa, kimaan Yennu tiar dogbeŋŋir Babilɔnn niib na biit po, ki u wutogbeŋŋir nba do bi paak biaŋinba na, ki u dat bi tuba bonbiir.

²⁰ Digbana nba ki nyun lintir na, ki li kura mirint, ki jɔɔt kura mun bia mirint.

²¹ Ki sakaana nba gbeŋ ki li yenn kpai tee kaman nan naar na nyii sanpaapo ki tan baa niib paak, ki bi sukii Yennu, kimaan sakaangbeŋŋa nba baa bi paak na. Li din tee fargbeŋŋire.