Fiitu 11 - Yennu Gbounpaauŋ Mɔɔr

Siara damm bannlee labaar

¹ Ŋanne ki sɔɔ turin bikinu patu ki yetin a “Fiit ki saan ki saa bikin Yennu diiuk nan li binbintir, ki bia kan binba jiantir Yennu leŋ maŋ;

² ŋaan daa bikii li dundɔuŋ yabinti, kimaan n jii ŋanne ki tur binba ki tee Juu teeb na, ki bi tan sa ŋmaa ki lint Yennu doo ni ŋmaarii piinna nan ŋannlee;

³ ŋaan n tan sa te ki n siaradamm bannlee-n lia bootu tiat, ki n sa turib yaak ki bii sɔkint n maan ki teen niib ki saa jaŋ daa tusir nan kobiinnlee nan piinnloob.”

⁴ Siara damm bannlee nee tee Olif tiinii ŋannlee nan fita ŋannlee nba see ti Yomdaanɔ wunba yent tingbouŋ na tɔɔnn po.

⁵ Ki sɔɔ-i taŋŋi loon wun turib daŋ, muu sa nyi bi mɔi ni ki tan di bi datai maŋ; ki wunba kur loon wun turib daŋ, nnee ki bi sa teenɔ wun mun kpo.

⁶ Bi bia mɔk yikoo ki sa soor saak, ki saak kan baa yoo nba ki bi mɔɔntir Yennu maan na, ki bia mɔk yikoo ki sa te ki nyun-n kpant sɔn, ki bia sa fit te ki farbiiuk-n baa tingbouŋ na ni yoo kur nba ki bi loon.

⁷ Yoo nba ki bi tan sa gbenn bi siara toona na, bonkobsiɔk nba be bootsunsuŋ nba kaa terik na sa nyi ki tookib nan tɔb, ki nyannib ŋaan kpib.

⁸ Ki bi gbanant tan sii dɔɔ dogbeŋŋir sɔnjouk ni, siaminba ki bi din kpaa ti Yomdaanɔ dapunpunn paak na. Yennu pur doo maŋ Sodom amii Ijipt.

⁹ Ki niib nba nyii maaru kur ni, nan nibooru booru kur ni, nan mabooru kur ni, nan tingbouŋ na yent kur ni, tan sa tikir ki got bi gbanant damuna ŋanntaa nan dajinn, ki tan kan chab ki bin pii bi gbanant maŋi.

¹⁰ Tingbouŋ na niib sii mɔk parpeenn bonchiann niib bannlee na kuun paak, ki bi sa jerin ki pi bi leeb piinii, kimaan bee paaki, sɔkiniinba bannlee na te ki tingbouŋ na niib dii fara bonchiann.

¹¹ Ki daa ŋanntaa nan dajinn na nba gar, ki foon nba teen manfoor na nyii Yennu boor ki baar kɔɔb, ki bi manfoor jen, ki bi fiir set; ki jaŋmaanii bonchiann soor binba lab na.

¹² Li yoo na ki sɔkiniinba bannlee na gbat kunkɔsiar ki li nyii sanpaapo ki yetib a “Don man nna na.” Li yooe ki bi kɔɔ sanpagbouŋ ni ki doo Yendɔuŋ ni, ki bi datai na see ŋaan gorii.

¹³ Li taakpaak ni ki tiŋ damm, ki dogbeŋŋir maŋ chianu taar piik ni yenn biir, ki niib tusa ŋannlore kpo tiŋ maŋ dammu ni, ki jaŋmaanii soor binba biar na, ki bi donn Yendɔuŋ ni Yennu sann.

¹⁴ Gotir man, parbiir nba pukin munnlee na gara, ŋaan parbiir nba pukin munntaa na sa baar mɔtana.

Kikaak nba pukin munnlore na labaar

¹⁵ Li yoo ki malaka nba pukin bannlore na pebir u kikaak na, ki kunkɔsaakara yeen Yendɔuŋ ni a “Tingbouŋ na naan kur kpant ti Yomdaanɔ Yennu nan u Niganntɔɔ Masia yara, ki u sa diab mɔkmɔk nan yoo nba ki mɔk gbennu.”

¹⁶ Ki saakab piinnlee nan banna nba kar bi naangbant paak Yennu tɔɔnn na, ki bi baa funfaba ki ji jiantir Yennu,

¹⁷ ki yeen a “Ti Yomdaanɔ Yennu, wunba mɔk paŋ kur, wunba bia be, ki din yɔɔ be na, ti teena niipoouk, kimaan a jii a pangbeŋŋir ki dii tingbouŋ na naan na.

¹⁸ Binba ki waa Yisa nee jia wutoor, ki a mɔŋ wutoor mun doo. Ki yoo baar nan ki a bu binba kpo na buut, ki pa a toontunna nba tee a sɔkiniinba na, nan a niib kura nba jiantira na, binba tee nijaana nan nitarii kur, ki yoo bia baar nan ki a biir binba biir tingbouŋ na.”

¹⁹ Ŋanne ki Yenjiantu diiuk nba be Yendɔuŋ ni na loot, ki n la lakir nba ki Yennu sennu be li ni na, diiuk na ni. Ki sanyikintii nyikintir, ki satianii tian nan fuut, ki tiŋ damm, ki sakaana nba gbeŋ bonchiann baa.