Fiitu 10 - Yennu Gbounpaauŋ Mɔɔr

Malaka nan gbanpɔɔbik labaar

¹ Li yoo ki n bia la malakasɔɔ ki u nyii Yendɔuŋ ni ki siik, ki yoo sanpagbouŋ kaman nan chinchenn na, ki naatuuruk bɔɔn ki lint u yur paak, ki u numm po naan nan yennu na, ki u taa naan nan jaantarii nba di muu na.

² Ki u dia gbanpɔɔbik u nuu ni ki li pɔbit, ki u diitu taar tɔɔ mɔkgbeŋŋir paak, ki u gaŋ taar mun see tiŋ ni;

³ ki u tian nan kunkɔsaakar kaman nan yambɔr nba tuu yikin beet biaŋinba na. Wa tian gbenn yoonba na, ki satianii ŋannlore mun tian ki jiin.

⁴ Satianii maŋ poorpo, ki n teen siir a n sɔb, ŋaan gbat kunkɔsiar ki li nyii Yendɔuŋ ni ki yet a n bɔr satianii ŋannlore nba yet maan nba na lii be n ni, ki daa sɔbini.

⁵ Malaka nba ki n lau ki u see mɔkgbeŋŋir na paak nan tiŋ ni na donn u nuudiitu sanpaapo,

⁶ ki por nan Yennu nba yɔɔ be mɔkmɔk nan mɔkmɔk na, wunba din nan sanpaak nan tingbouŋ na nan mɔkgbeŋŋa nan bona nba kur be li ni na, ki yet a li ji kan yukiri;

⁷ a ŋaan malaka nba pukin bannlore na-i taŋŋi pebir u kikaak na daar nba, Yennu tan sa jii woonin ni maan ki tun nann toonn, kaman nan wa din yet ki tur u sɔkiniinba binba tee u toontunna biaŋinba na.

⁸ Ki kunkɔr nba ki n gbat ki li nyii Yendɔuŋ ni ki piak teenin na bia piak ki teenin a n saan ki saa gaar gbanpɔɔbik nba pɔbit ki be malaka nba see mɔkgbeŋŋir nan tiŋ ni na nuu ni.

⁹ Ŋanne ki n saan malaka na boor a n gaar gbanpɔɔbik maŋ, ki u chabin a n gaar ki ŋman; a ŋaan li sii tonne n nɔɔk ni, ŋaan n mɔb ni ŋanin li sii man kaman nan siat nee.

¹⁰ Ŋanne ki n gaar gbanpɔɔbik maŋ ki ŋman, ki li man kaman nan siat na n mɔb ni, ŋaan la sik n poor ni, li ji tonne.

¹¹ Ŋanne ki bi betin a “Li kpaa talas nan fan ŋamm ki sɔkin Yennu maan ki tur nibooru bonchiann nan tingbouŋ na yent bonchiann nan mabooru bonchiann nan kpanbara bonchiann.”