Fiitu 1 - Yennu Gbounpaauŋ Mɔɔr

¹ Maan nba ki Yisa Masia din fiit na sɔb gbouŋ na nie. Yennu din turɔ maan maŋ a wun wann u toontunna linba sa teen mɔtana. Masia din tun u malaka u toontunnɔ Jɔɔnn boor ni, a wun betɔ maan maŋ kur.

² Ŋanne ki Jɔɔnn din fiit ki wann linba ki u din la na kur ki li tee barii nba nyii Yennu boor ni, nan linba ki Yisa Masia din fiit ki wannɔ na.

³ Wunba karin sɔkinii mɔmaan nba sɔb gbouŋ na ni, parpeenn tee u yare, ki binba gbia mɔmaan maŋ ki saakir, parpeenn tee bi yare mun, kimaan yoo pera ki linba kur sa tun na lin tun.

Masiaweira nba bɔkit ki be digbana ŋannlore na labaar

^4-5 Min Jɔɔnn sɔbin gbouŋ na ki teen Masiaweira nba bɔkit ki be digbana ŋannlore, ki be Asia yent ni na. Yennu nba be, ki din be, ki bia tan sii be yoo nba kaa gbennu, ki sei ŋannlore be u naangbouŋ tɔɔnn na, nan Yisa Masia wunba mɔɔntir Yennu maan nan barmɔnii, ki tee sinsinn wunba din kpo ki fiir kuun ni ki bia tee tingbouŋ na kpanbara kur Kpanbar na, bin turi sommir nan parmaasir. U loont, ki din gaar ti paak ki kpo, ki nyinnit ti biit daabsin ni;

⁶ ŋaan te ki ti tee u naan ni niib nba tee manteeb, a tin tun u Baa Yennu toonn; ŋɔɔe yen paku nan paŋ mɔkmɔk nan yoo nba kaa gbennu. Mɔmɔmm.

⁷ Gotir man, ŋɔɔe be sanpagbant ni ki baat na. Sɔɔ kur ninbina tan sa lau, nan binba din ŋmu-u na gbaa. Yoo nba ki u tan sii baat na, tingbouŋ na niib kur tan sa bui u paak. Mɔmɔmm, li sa teen nnawa.

⁸ Ti Yomdaanɔ Yennu wunba mɔk paŋ kur, ki be, ki din be, ki bia tan sii be yoo nba kaa gbennu, ŋɔɔe yeen a “Mine tee bont kura pinpiik nan li gbennu.”

⁹ Tɔn, min Jɔɔnn wunba tee i naa bik ki taan nani ki di fara nan sukuru Yisa paak, ma din lin ki mɔɔntir Yennu maan, nan Yisa barŋanii, ki bi din jiin ki saan nanin Patmos tiŋ nba ki nyun lintir na ni.

¹⁰ Ki lasir dasiar ki Yennu Seyeeŋ din fiir n ni, ki n gbat kunkɔsaakar ki li naan nan kikaak na ki piak n poorpo,

¹¹ ki betin a n sɔb linba ki n laat na ki teen gbouŋ ni ki nakin ki tur Masiaweira nba be digbana ŋannlore: binba be Efesus nan Simirna nan Pegamum nan Tiataira nan Saadis nan Filadelfia nan Laodisea na.

¹² Ki n ŋmant ki yaa n got wunba piak ki teenin na; ma ŋmant yoo nba na ki n la sarima fita ŋannlore ki li see.

¹³ Ki sɔɔ be li sinsuuk ni ki naan nan nisaarik Bik na, ki lia liatfouk ki li tan siit u taabira, ki sarima gbann boob u nyaauk ni,

¹⁴ ki u yut peen kaman nan gungunt na, ki u ninbina naan nan mupeenu na,

¹⁵ ki u taa nyirii kaman nan kut nba ki bi tuu naantir muu ni ki li nyirii biaŋinba na, ki u kunkɔr fu kaman nan siɔk kpenu ni nyun nba tuu fu biaŋinba na.

¹⁶ Ki u kub ŋmaabira ŋannlore u nuudiitu ni, ki jukbanjiak nba di mɔleemii tant nyii u mɔb ni, ki u numm po yeen kaman nan yennu nba tuu yeen yensuuk ni na.

¹⁷ Ma lau yoonba ki n baa dɔɔr u tɔɔnn kaman nan kpeemɔ na. Ki u jii u nuudiitu ki yii n paak, ŋaan yet a “Daa tiin jaŋmaanii; mine tee bont kura pinpiik nan li gbennu;

¹⁸ ki bia tee footɔɔ na, ki din kpo, ŋaan mɔtana n fiira ki sii fo yoo nba kaa gbennu, ki bia mɔk kuun nan kpeentiŋ paŋ;

¹⁹ a li paak a sɔb linba ki a la mɔtana, nan linba be mɔtana, nan linba tan sa tun yoonbawa;

²⁰ a ŋmaabira ŋannlore nba ki a la n nuudiitu ni na, nan sarima fita ŋannlore na woonin ni paak tee nnee: ŋmaabira ŋannlore nee tee n weira nba be digbana ŋannlore na malakanba, ki fita ŋannlore na mun tee n weira maŋ bujir munnlore maŋ.”