Efesus teeb 6 - Yennu Gbounpaauŋ Mɔɔr

Waas nan wadamm labaar

¹ Waas, yii saak i damm mɔi ti Yomdaanɔ Masia paak, kimaan ŋanne took nan yin tun.

² Sinsinn sennu nba pukin Yennu mɔsonn tee a “Teent a naa nan a baa nibaakir,

³ ki a bont kur-n somm fanu, ki a manfoor-ii biakii fɔkit tingbouŋ na ni.”

⁴ Baanba, i daa dia i waas diabiiuk ki dont bi wutoa, ŋaan kii wantib kii kpaamm ti Yomdaanɔ nba loon biaŋinba.

Daaba nan bi chanbaanba labaar

⁵ Tɔn, binba tee daaba mun-ii saak bi chanbaanba mɔi, kii tiimm jaŋmaanii, kii tuun toonn kii teemm nan i para kura kaman nan ya bo sii tuun ki teen Masia biaŋinba na.

⁶ I daa tiimm yoo nba ki bi tuu gorii-i ki i tuun na kuukɔɔ kaa, a bin pakiini, ŋaan yi jii i mɔŋ teen Masia daaba kii tuun linba tee Yennu loomm nan i para kura.

⁷ Yii tuun i toona nan parpeenn ki lii want nan i tuun ki teen ti Yomdaanɔ Masiae, ŋaan daa dukii nan i tuun teen nisaariki;

⁸ kii tian nan ti Yomdaanɔ tan sa tur wunba yen u mɔŋ nan daabir kura bi toonŋana paauko.

⁹ Chanbaanba, yii mun-ii dia i daaba bonŋann ki daa diab nan ninmɔnni. Yii mun-ii tian nan yimm nan i daaba maŋ kura taan mɔk Yomdaanɔ yenɔkɔɔe Yendɔuŋ ni, ki u ki mɔk lukitimi.

Yennu naagbankɔŋŋir labaar

¹⁰ Linba joont tee nnee, yii chee i para ti Yomdaanɔ ni, kii mɔk yabint paŋ nba ki u turi na.

¹¹ Yi jii Yennu naagbankɔŋŋir na ki lia, ki lin te ki yin fit nyann Sintaanii muksubiiuk.

¹² Kimaan ti ki kɔn nan wunba mɔk gbanant nan sɔn kaa, ŋaan ti kɔn nan narinbiite nan bi yikodamm, nan mɔtana dunia bunbɔnn ni yudamm, nan sanpagbann ni narinbiit.

¹³ Li paak, yi jii Yennu naagbankɔŋŋir na ki lia, ki fit set dabiir nba tan sa baar maŋ daar, ki daa nyikiti.

¹⁴ I set man, ki jii barmɔnii ki bobin i sai ni, kii mɔk yentinu nba tee kaman nan naagbankɔŋŋir na,

¹⁵ ki teen siir kii mɔɔntir barŋanii nba teen niib parmaasir na, linba tee kaman nan taasaat na.

¹⁶ Linba pukin na paak, yi jii yada nba tee kaman nan naagbankɔŋŋir nba ki i sa fit kpeen Sintaanii peenii nba mɔk muu na,

¹⁷ ki dia i tinnu nba tee kaman nan kut fokirik, ki bia dia Yennu barii nba tee kaman nan jukbanjiak nba ki u Seyeeŋ tuun nann na.

¹⁸ Yii mei Yennu yoo kur nan ninmɔnn, u Seyeeŋ nba sommi biaŋinba na; ki yin chekin i mɔŋ nan gbankur ki pukin Yenmiaru kii teen Masiaweira kura,

¹⁹ ki bia miar Yennu tur n mun ki man fit la sɔnu ki pak nan parcheenn ki mɔn woonin ni barŋanii na,

²⁰ kimaan li paake ki n tee toomii ki kɔɔ dansarik ni. Yii mei Yennu ki turin ki man mɔn barŋanii maŋ nan parcheenn kaman nan la kpaa talas nan man pak biaŋinba na.

Foont joontii labaar

²¹ Mɔtana ti naa bilonkak Tikikus wunba tee ti Yomdaanɔ toontunnɔ nan barmɔnii na sa beti ma be biaŋinba nan linba ki n tuun.

²² Li paake ki n tuumɔ i boor ni, ma wun turi labaar ki yin bann ta be biaŋinba, ki wuu biakii kɔɔnti para.

²³ Ti Baa Yennu nan ti Yomdaanɔ Yisa Masia-n tur yimm Masiaweira kur parmaasir nan loomm nan yada.

²⁴ Yennu-n somm binba kur loon ti Yomdaanɔ Yisa Masia nan loomm nba kaa gbennu na.