3 Jɔɔnn 1 - Yennu Gbounpaauŋ Mɔɔr

¹ Min Jɔɔnn nba tee Masiaweira saakɔɔ nee, sɔbin gbouŋ na ki teen n yɔɔk fin Gaius, fin nba ki n nian nan mɔnii.

² N yɔɔk, n mei Yennu a paak nan fii mɔk laafia, ki a bont kur-n somm fanu kaman nan a seek nba be fanu Yennu boor biaŋinba na.

³ N mɔk parpeenn bonchiann nan ti naa wasiat nba daan baar nna, ki tan betin a po na, nan biaŋinba ki a waa Yennu barmɔnii wannu na, ki a benu nee bia want li sɔnu nan mɔnii.

⁴ Siar ki penn n par ni ki mantik baar ma gbat a n waas waa wannu nba took na.

Yisa mɔɔntdamm sommir po

⁵ N yɔɔk, fa sommit ti naa waas nba tee saamm gbaa biaŋinba na, a tuun linba ŋan.

⁶ Ba tuu tan baar Masiaweira lakinu ni yoonba, bi tuu tiar a burchintuk maŋ po. Li paak, bi-i tuu kii baar a boor ni, ki a bia ŋammit bi sɔnii maŋ ki sommitibie, ŋann a tuun bonŋanne na. I diab bonŋann kimaan bi tee Yennu yabe.

⁷ La tee Yisa sann paak nee ki bi lin ki mɔɔntir u maan, ŋaan ki gaan siar binba ki tee Masiaweira na boor ni.

⁸ Li paak, timm Masiaweira ŋarin, li kpaa talase nan tii gaan li nibooru saantuk. Ŋanne sa te ki timm nan ŋamm-ii taa Yisa barmɔnii wannu mɔɔntii.

Jɔɔ nba ki bi yiu Diotrefes na po

⁹ N poŋ mi sɔb barsai nna ki tur Masiaweira nba be a boor ni na, ŋaan ki Diotrefes yêen n mɔb, kimaan u loon wun pur u mɔŋ nijaanne.

¹⁰ Li paak, mi-i taŋŋi baar, n sa fiit linba kur ki u tun, nan bonbisiar nan faak nba ki u pak ki biirit na. Ŋaan biit nba ki u tuun maŋ na, li lek daa ki gboo u numm gbaa. Ti naa waas nba tuu tan baar u boor ni, u bia tuu ki gaanibi, ki damm nba tuu loon bin gaar ti naa waas maŋ saantuk, u bia tuu ber nyinnib Masiaweira lakinu maŋ nie.

¹¹ N yɔɔk, daa tokii sɔɔ biiti, ŋaan kii tuun linba ŋan. Wunba tuun bonŋann, u tee Yennu yɔɔe; ŋaan wunba tuun biit, u ki bann Yennu.

Jɔɔ nba ki bi yiu Demetrius na po

¹² Sɔɔ kur piak Demetrius; ki u benu nee bia want nan u waa barmɔnii wannu; ki ti mɔŋ mun piakɔ; ki a mun mi nan ti set tee barmɔnii damme.

Chabitii

¹³ N bia mɔk maan bonchiann ki loon ki n pak ki tura, ŋaan n ki loon ki n sɔb gbouŋ ni kaa ki turani.

¹⁴ Ŋaan n mɔk dindann nan n tan sa baar ki la-a daa ŋannlelee na ni, ki tin tan pak nan leeb mɔi ni.

¹⁵ Parmaasir-ii be a paak. Ti yɔɔsinba foonta. Ti yɔɔsinba nba mun bia be a boor ni na, a foont bi sɔɔ kur nan u sann yenɔ yenɔ.