2 Tesalonika teeb 3 - Yennu Gbounpaauŋ Mɔɔr

Yii mei Yennu kii teent man

¹ Ti naa waas, linba joont tee nnee, yii mei Yennu kii teent man ki ti Yomdaanɔ barŋanii maŋ-n lin yian yian kii mɔk yikoo kaman nan la din tee i boor ni biaŋinba na.

² I bia kii mei Yennu ki wun nyinnit nifobiit nan biitdamm nuu ni, kimaan sɔɔ kur kaa teen barŋanii maŋ yada.

³ Ŋaan ti Yomdaanɔ tee barmɔnii daanɔe, ki sa turi paŋ kii guui ki biitdaanɔ Sintaanii kan fit teeni siari.

⁴ Ti Yomdaanɔ paak ki ti teen yada nan i tuun ta din beti linba na, kii bia sii tuun nna yoo kura.

⁵ Ti Yomdaanɔ maŋ-n sommi ki yin bann Yennu nba loont biaŋinba, ki bia mɔk gbankur nba ki Masia teent na.

Li kpaa talas ki sɔɔ kur-ii tuun toona

⁶ Ti naa waas, ti Yomdaanɔ Yisa Masia sann ni ki ti beeri, yi nyinn i mɔŋ nan ti naa wasiat nba tee gbannyakdamm kura na sinsuuk ni, nan binba ki waa ta din turi kpaanii nba na sinsuuk ni.

⁷ I mɔŋ poŋ mi fanu nan li kpaa talase ki yii tuun kaman nan ta din tuun biaŋinba na. Ta din be i boor ni na, ti din ki tiin gbannyakiri.

⁸ Ti din ki mi gaar sɔɔ sommir yann ki ki pa li paaki. Ŋaan ti kpan din tuune ki nyi naauk, ki lek tuun yennu nan nyiɔk, a ti daa te ki sɔɔ biir i siar ti paaki.

⁹ Ta din tuun nna maŋ na, li ki want nan ti ki mɔk yikoo nba sa boi sommir po kaa; ti din tun nna a ti teen nyinne ki turi ki yin weir.

¹⁰ Ta din be i boor ni na ti din tuu yɔɔ beeri a “Wunba kur ki saak toona, li yɔɔ ki ŋan nan bin turɔ jeeti.”

¹¹ Ti gbia a nisiab be i sinsuuk ni ki ki loon toona, ŋaan lin kɔɔ bi leeb barii nie, li paak te ki ti beeri linba na.

¹² Ti Yomdaanɔ Yisa Masia sann ni ki ti beer niib maŋ ki kpaamm a bi baka-ii be bi tiauŋ toona ni, kii be soonna, kii di bi naauk nyɔɔt.

¹³ Ti naa waas, yii mi ki i bak nan toonŋana tumu man.

¹⁴ Li pasiar ta teeni labaar nba ti gbouŋ ni na, nisɔɔ kan sakiri. Li-i tee nnaie, yin bann i yan ni nan li yɔɔ, ki i baka daa be u po, ki wun di fei.

¹⁵ Ŋaan i daa teeu kaman nan u tee i dataake na, yi kpaanɔ kaman nan i naa bike na.

Barjoontii

¹⁶ Ti Yomdaanɔ wunba teent parmaasir na-n turi parmaasir yoo kur, siar kura ni. Ti Yomdaanɔ-ii be nan i kur.

¹⁷ Min Pɔɔl sɔbin nan n mɔŋ mɔŋ nuue ki foonti na. N gbant kura siarae na; n sɔbin ki joontir n gbant nnee.

¹⁸ Ti Yomdaanɔ Yisa Masia-n somm i kura.