2 Piita 1 - Yennu Gbounpaauŋ Mɔɔr

¹ Min Simon Piita, wunba tee Yisa Masia daabir nan u toomii nae sɔbin gbouŋ na ki teen binba teen Yennu nan ti Tinntɔɔ Yisa Masia yada u burchint paak, kaman nan ta mun teemm yada biaŋinba na.

² Ya bann Yennu nan ti Yomdaanɔ Yisa na paak, ninbatinu nan parmaasir-n ŋamm pukini.

Yennu niib binbeŋ labaar

³ Yennu paŋ yab bonchiann; ki u teent linba kur tee manfoor nan yentinu yar kimaan ta miu na paak; ŋɔɔe din yiinit u yentsaakar nan u binbenŋaŋ ni.

⁴ Li paak, ki u din senn mɔsonjaana nba ŋan bonchiann ki turit a tin nyi kuun nba be tingbouŋ na ni loonbiit na paak, ŋaan gaar u binbeŋ.

⁵ Linba na paak, yii yabir i mɔŋ ki pukin binbenŋaŋ i yada paak man; ki bia pukin Yennu bannu i binbenŋaŋ maŋ paak;

⁶ ki bia pukin mɔŋdianu i bannu maŋ paak; ki bia pukin gbankur i mɔŋdianu maŋ paak; ki bia pukin yentinu i gbankur maŋ paak;

⁷ ki bia pukin naataann i yentinu maŋ paak; ki bia pukin loomm i naataann maŋ paak.

⁸ I binbeŋ-i be nnaie, li sa te ki i ŋamm bann ti Yomdaanɔ Yisa Masia yoo kur, kii mɔk nyɔɔt bonchiann ki turɔ.

⁹ Ŋaan nisɔɔ nba ki mɔk binbenbooru maŋi, li yɔɔ jɔɔne, ki poŋ tamma nan Yisa din nyinn u toonbiit sianyoowa.

¹⁰ N naa waas, Yennue yiini ki ganni, li paak, yi ŋamm yabir i mɔŋ paak man, ki te ki lin set wann nan i tee u niibe. Li-i tee ki i tuun linba na i kan mi ki baa;

¹¹ ki Yennu sa te ki yin tan kɔɔ ti Yomdaanɔ Yisa Masia nba tee ti Tinntɔɔ na naan ni; u naan maŋe yɔɔ be ki ki mɔk gbennu.

¹² Li paak, n sii yɔɔ ki tiani labaar na poe yoo kur; ŋaan n lek mi nan i poŋ gbatira, ki mir fanu, ki diar chimm;

¹³ ŋaan n dukin nan li ŋan ki n ŋamm tiari ki fiin i dudukit ma daa be n manfoor ni na.

¹⁴ N mi nan li kan yukiri ki n sa nyi n gbanant ni kaman nan ti Yomdaanɔ Yisa Masia nba din betin na.

¹⁵ Li paak te ki n yaa n yabir n mɔŋ ki sɔb gbouŋ na ki lii tiani labaar na po yoo kur nan n kuun poorpo.

Yennu nba donn Masia biaŋinba

¹⁶ Ta poŋ din beti nan ti Yomdaanɔ Yisa Masia tee paŋ daanɔe, ki bia tan sa jena, labaar maŋ ki tee faak kaa, li tee barmɔniie. Ti ninbinae din la wa mɔk paŋ biaŋinba.

¹⁷ Ki ti din be nanɔ yoo nba ki ti Baa Yennu turɔ paku yentsaakar ni. Li yoo maŋe ki kunkɔr nyii ti yabint Yennu nba tee yentsaakar daanɔ boor ni ki yet a, “N Bilonkakii na, wunba ki n numm gboou nee na.”

¹⁸ Ti mɔŋ mɔŋ tubae din gbat kunkɔr maŋ ki li nyii Yendɔuŋ ni na. Li yooe ki ti din be nanɔ jɔɔr nba ki Yennu gannir na.

¹⁹ Ŋanne mantik kat wantit nan Yennu sɔkiniinba nba din pak Yisa labaar na po din tee barmɔniie. Li ŋan ki yin gbiint ba din yet linba na fanu. Bi mɔbona maŋ tee kaman nan fitir nba teen yentu bunbɔnn ni biaŋinba nee mɔkmɔk nan yoo nba ki Yisa tan sa jen; ŋanne sa te ki i numm-n yent fanu.

²⁰ Ŋaan linba gar li kur tee nee; yii tian man nan Yennu sɔkiniinba nba din sɔb Yennu gbouŋ ni barii nba na din ki tee bi tiauŋ mɔmaan kaa,

²¹ kimaan Yennu sɔkiniinbasɔɔ din ki mi dukin u mɔŋ loomm ni ki paki, ŋaan Yennu Seyeeŋe din wantib biaŋinba ki bi sa pak labaar nba nyii ŋɔɔ Yennu boor ni na.