2 Korint teeb 6 - Yennu Gbounpaauŋ Mɔɔr

¹ Li paak, timm nba tuun Yennu toona u sommir paak na, ti barimiie, i daa te ki u ninbatinu na tee yanni.

² Kimaan Yennu yet a “Yoo nba din tan jaŋ na, n din gbiint i miaru na. Ki yoo nba din tan jaŋ nan niib-n la tinnu na, n din sommiiwa.” Gbiintir man, dinnae tee yoo nba jaŋ. Dinnae ki yaak be ki niib sa la tinnu maŋ.

³ Timm ŋanin ki tuun bonsiar linba sa gɔɔr sɔɔ Yisa Masia sɔnu ni, ki sɔɔ-n tan mann yet a ti toona na mɔk biiti.

⁴ Ti binbeŋ nba tee biaŋinba nae want niib nan ti set tee Yennu toontunnae, kimaan ti laat fara, nan muksuk, nan maan, ŋaan lek di sukuru li kur na ni.

⁵ Niib dia kpaasa ki boot, ki loontit dansarii ni; ki ti paak ki niib fu fuut; ki ti lek tuun toona ki ki gɔɔnt nyiɔku, ki ki di sianyoo gbaa.

⁶ Ti tee popeendamme, ki ti mi Yennu mɔmaan, ki mɔk sukuru nan burchint, ki gbee nan Yennu Seyeeŋ, ki loon niib,

⁷ ki beerib Yennu mɔmaan nba tee barmɔnii na, ki mɔk ŋɔɔ Yennu paŋ; ki bia mɔk yentinu binbeŋ nba tee jatiat nba be ti nuudiitu ni nan nuugaŋ ni na.

⁸ Nisiab teent nibaakir, ki nisiab mun sukiit, nisiab biir ti sana, ki nisiab mun piakit; nisiab yeen a ti lin kpann niibe, ŋaan ki ti piak barmɔniie.

⁹ Ti ki mɔk sann niib boor ni, ŋaan ti mɔk sann Yennu boor ni. Kuun tiin waat, ŋaan ki ti lek mɔk manfoor; Yennue te ki fara baatit, ŋaan u ki te ki li kpiti.

¹⁰ Ti mɔk parbiir ŋanin, ŋaan Yisa paak ti mɔk parpeenne yoo kura. Ti tee tariie, ŋaan timme te ki niib bonchiann tee mɔkita Yennu boor ni. Ti ki mɔk tingbouŋ na mɔkint siari, ŋaan ti mɔk linba gar mɔkita kura. Nanna kurae want nan ti set tee Yennu toontunnae.

¹¹ Yimm Korint doo teeb, ti poŋ beti ti nɔɔk ni barii kura. Ti looni bonchiann;

¹² li ki tee timm kaa ki looniini; yimme ki loon timm.

¹³ N piak teeni kaman nan nirɔ nba bo sa pak u tiauŋ waas biaŋinba nee; yii loonin man kaman nan ma looni biaŋinba na.

I mi binba ki teen Masia yada na sɔnii man

¹⁴ I daa mɔk weinanleeb nan niib nba ki teen Yisa yada na. Linba fan nan linba ki fan sa fit lakin ki be nan leebaa? Yentu nan bunbɔnn sa fit lakin taan mɔb ki be nan leebaa?

¹⁵ Masia nan Sintaanii sa fit taan mɔbaa? Nisɔɔ nba waa Yisa sɔnu nan wunba ki waa-r, bi sa fit taan binbenyeŋaa?

¹⁶ Yennu diiuk nan pochianfeek tee yemmee? Aaii. Timme tee diiuk ki tur manfodaanɔ Yennu, kimaan ŋɔɔ Yennu din yet a “N sii be n niib para nie, kii somm bi sinsuuk ni. N sii tee bi Yennue, ki bi mun sii tee n niib.”

¹⁷ Li paak ki ti Yomdaanɔ Yennu bia yet a “Bɔkitir i mɔŋ man, ki nyi tingbouŋ na niib sinsuuk ni man, ki nyik biit kur, ki n sa gaari.

¹⁸ N sii tee i Baae, ki yii tee n bonjabis nan n sapaanbis. Min, i Yomdaanɔ Yennu nba mɔk paŋ kur na beeri nna.”