2 Korint teeb 13 - Yennu Gbounpaauŋ Mɔɔr

Kpaanjoontii nan foontjoontii labaar

¹ N sa baar ki tan foonti ki pukin taar munntaa. Li-i tee ki i jii sɔɔ taari, n kan saki, see ki siaradamm bannlee amii banntaa pak biir li yɔɔ.

² Ma din baar i boor taar munnlee ni na, n din kpaan i kur nba poŋ tun toonbiit na, nan i leeb kura. Ma ji ki be i boor ni na, ŋaan n lek kpaani kaman nan ma din poŋ kpaani biaŋinba sinsinn na; mi-i taŋŋi baar, n sa dat bi tubawa.

³ Ŋanne sa wann nan Masiae te ki n piak. U ki tee butimɔɔ kaa i sinsuuk ni, u mɔk paŋ i boor ni.

⁴ U din jii u paŋ maŋe ki bakin bir ŋaan din sak ki bi kpaau dapunpunn paak. Mɔtana, Yennu paŋ paak ki u be u manfoor ni. Mɔtana, timm nba lakin be u ni na, ti ki mɔk paŋi, ŋaan ta lakin taan nanɔ na paak, ti mun mɔk manfoor Yennu paŋ paake, ki fit jii li paŋ ki wanni.

⁵ Gotir i mɔŋ mɔŋ binbeŋ ni ki laan i set teen Yisa Masia yada amii i ki teeni; li kpaa talas ki yii gorii i mɔŋ binbeŋ nba tee biaŋinba. I ki mi nan Yisa Masia be i niee? U set be i ni, kimaan li-i tee ki u ki be i ni, ŋann i ki tee u niib nan barmɔnii.

⁶ N mɔk dindann nan i sa bann nan timm ŋanin tee u niibe nan barmɔnii.

⁷ Ti mei Yennu teeni a i daa tuun toonbiiti. Li ki tee a ti want ti mɔŋ a ti tee barmɔnii damm kaa; li-i lekii tee ki i dukii a timm ki tee Masiaweira, ŋaan ti loon ki yii tuun toonŋanae,

⁸ kimaan ti ki loon ki tin jiin Yennu mɔmaan poori; ti loon ki mɔmaan maŋe-n dɔŋ tɔɔnn po.

⁹ Li-i tee ki i mɔk paŋ ki tuun toona nba fan, ŋanne sa maŋ ti para ni, kimaan ti ki loon ki tin wanni ti paŋ kaa; li paak te ki ti mei Yennu ki teeni, a i ŋamm i binbeŋ.

¹⁰ Li paak, ma ki be i boor ni na, ki n sɔbin gbouŋ na ki teeni, a mi-i taŋŋi baar i boor ni yoonba, li kii kpaa talas ki n dat i tuba ki wanni n paŋ; ŋanne te ki n sɔbir. Ti Yomdaanɔe din turin yudantuk na a n sommi ki yin wei u sɔnu fanu. U din ki turin yudantuk maŋ a n biiri kaa.

¹¹ N naa waas, linba ji biar tee min chabie. Ŋammit i sɔnu man, kii saak n kpaanii man, kii mɔk mɔtaauk, nan parmaasir; ki Yennu nba loonit ki teent parmaasir na sii be nani.

¹² I foont i leeb kpammii man.

¹³ Yennu niib nba kur be nna na foonti.

¹⁴ Ti Yomdaanɔ Yisa Masia sommir, nan Yennu loomm, nan u Seyeeŋ mɔtaauk na-ii be nan i kura.