2 Korint teeb 11 - Yennu Gbounpaauŋ Mɔɔr

Pɔɔl nan faak toomiinba labaar

¹ Mi-i piak jatiie, ŋaan yimm-n lek yabir i mɔŋ ki di sukuru n paak.

² N looni bonchiann kaman nan Yennu nba looni biaŋinba na. I tee kaman nan sapaamɔ nba ki mi jɔɔ nae, ki n loon ki n jiie ki tur Masia ki yii waa ŋɔɔ kuukɔɔ.

³ N mɔk jijeet i paak ma n mi niib tan sa mann kpanni a i ji daa waa Masia fanu, kaman nan Sintaanii nba din kpann Adam ŋaapoo Iif biaŋinba na.

⁴ Nisɔɔ-i baar i boor ni ki beeri labalia nba ki tee Yisa labaar nba ki ti din beti na, bee te ki i tuu di sukuru nan li yɔɔ? Bee te ki i gaan labaar nba ki tee Yisa barŋanii; bee te ki i bia gaan seek nba ki tee Yennu Seyeeŋi?

⁵ Niib nba kpanni a bi tee Yisa toomiinba na, n ki dukin nan bi garimi.

⁶ Li-i lekii tee ki n ki mi barii paku fanu, ŋaan n mi Yennu mɔmaan na nan li sɔnu, ki yoo kur ti bia din wanni li kura paanu ni.

⁷ N lek sikin n mɔŋe ma n donni, kimaan ma din beti Yennu barŋanii maŋ na, n ki gaar i bonsiar li paaki. Ki ma din tun nna maŋ, n mɔk biite li paakii?

⁸ Ma din beeri Yennu mɔmaan na, Masia nisiab din tuu pan li paak, ŋaan yimme bo sa turin li sommir.

⁹ Ma din be i boor ni yoonba ki ki mɔk siar na, ŋaan n lek din ki mukisi ma yin sommin nan siari. Ti naa waas nba din nyii Masedonia din baar nan bonsiar nba ki n din loon na. Ma lek din be biaŋinba li yoo na, n bia lek sii be nnee; n kan mukisi a yin sommin nan bonsiari.

¹⁰ Mɔmɔmme ki n piak Masia paak, n kan mi mukis i sɔɔ la nyii Akaya tingbouŋ ni loksiar kura po a li yɔɔ-n sommin nan bonsiari.

¹¹ Bia paake? Linba na want a n ki looniee? Yennu ŋanin mi nan n looni.

¹² N lek bia sii beeri Yennu mɔmaan na, ŋaan n kan mi ki boi-i li paatii po. Li paak, kpinkpannii damm maŋ nba gaan paatii na kan fit donn bi mɔŋ ki yet a bi mun tee kaman nan timm na.

¹³ Li nibooru kpanniie a bi tee Masia toomiinba, ŋaan bi ki tee u toomiinba kaa. Ba tuun biaŋinba na, bi kpanniie.

¹⁴ Bi-i tuun nna, ya daa te ki li teei yaarlituku; nnee ki Sintaanii tiauŋ nant u mɔŋ kaman nan yentu malaka na.

¹⁵ Li paak, Sintaanii toontunna-i kpann a bi tee Yennu yabe, ya daa te ki li teei yaarlituk mani. Yennue tan sa dat bi tuba kaman nan bi toona nba jaŋib biaŋinba.

Pɔɔl fardinu Masia paak labaar

¹⁶ N bia sa ŋamm betiiwa, i daa dukii nan n tee jatuko. Li-i tee ki i lekii dukii nnaie, ŋaan yin di sukuru nanin ki n pak n mɔŋ waaminna.

¹⁷ Ma yaa n beti linba na ki tee ti Yomdaanɔ mɔmaan kaa. Mi-i piak n mɔŋ mɔmaan, n set piak kaman nan n tee jatuk nee.

¹⁸ Niib bonchiann want bi mɔŋe; li paak, n mun sa wann n mɔŋa.

¹⁹ I dukii a i mɔk yame, ŋaan ki bee te ki i di jatit sukuru ki mɔk parpeenn nammi?

²⁰ Ma yeen linba na tee nnee: nisɔɔ-i soori ki ji-i teeni u daaba, ki ŋmab i bont, ki kpanni, ki mɔk karinbaanii, ki pebiti tanpakii, ŋaan i tuu di sukuru nan li yɔɔe.

²¹ Ta din ki teeni nna na paake te ki i biir ti sana a ti ki mɔk paŋ amii nlee? Nisɔɔ-i mɔk par ki want u mɔŋ, n mun sa tee nnee. N set piak kaman nan jatuk nee!

²² Kpinkpannii damm maŋ-i yi bi mɔŋ Juu teebie, n mun tee Juu nirɔe; bi-i yi bi mɔŋ Israel teebie, n mun tee Israel nirɔe; bi-i tee Abraham yaaboonaie, n mun bia tee yenɔe;

²³ bi-i yi bi mɔŋ Masia toontunnaie, mine set tuun mantik; (n piak kaman nan jatuk nee; teentin gafara man!) mine set tun Masia toona nan barmɔnii bonchiann, ki kɔɔ dansarii bonchiann. Niib boon kpaasa bonchiann Masia paak. N din la nunbɔŋ ki din per kuuma.

²⁴ Taar muŋŋmu ki Juu teeb din boon kpaasa piinntaa nan ŋannyiia.

²⁵ Rom teeb din boon lanbana taar munntaa. Niib din tan jaatin sianyoo tana. Ŋarint din libit chaan nanin nyun ni taar munntaa; ki yentumunn nan nyamunn ki n din be dajingbir paak mɔkgbeŋŋir nyun paak.

²⁶ N din tuu somm yoo kur ki saa n sɔnii, ki laat nyun ni nunbɔŋ, ki bia tuu laat nunbɔŋ fatiteeb boor ni, nan n tiauŋ niib boor ni, nan niboorganu boor ni, ki bia laat nunbɔŋ digbangbeŋŋa ni, nan muuk ni, nan mɔkgbeŋŋa ni, nan nisiab nba kpann a bi tee Masiaweira na boor ni.

²⁷ N din set tuun Yisa Masia toona nan nunmɔnn, ki laat fara, ki ki gɔɔnt nyiɔku; kon nan nyunyukiru din tuu soorin; ki n kɔŋŋit jeet; ki waat son; ki n bongbabkar ki jaŋŋitimi.

²⁸ Linba na kuukɔɔ nunbɔŋ kaa ki n din laati; n din tuu mɔk parbiire daar kura Masiaweira kur paak.

²⁹ Nisɔɔ-i tee yadapɔɔrin daanɔ, li mun tuu baŋ n kpinkpante; nisɔɔ-i te ki u lɔɔ tun toonbiit, li bont dont n wutoore.

³⁰ Mi-i faa parbiir, n sii faa parbiir n kpinkpant baŋŋu paake.

³¹ Ti Yomdaanɔ Yisa Baa Yennu, wunba yen paku nan yoo nba kaa gbennu na, ŋɔɔe mi nan n piak barmɔniie;

³² ma din be Damaskus doo ni yoonba, Bat Aretas yoo na, doo maŋ ni saakɔɔ din loon wun soorime, ki din te ki lanjimanba see doo maŋ tammɔb ni ki gorii a bin soorin.

³³ Ŋanne ki n yɔɔsinba din jiin ki kpeenin kpanchubigbeŋŋir ni, ki din dɔɔnt sikinin takoru nba be doo maŋ joonn ni na, ki n din nyii jɔɔ maŋ nuu ni.