1 Timoti 2 - Yennu Gbounpaauŋ Mɔɔr

Masiaweira jiantu labaar

¹ Li paak, linba gar kur tee yii puk Yennu, kii meiɔ, kii boiɔ, kii teenɔ niipoouk niib kur paak.

² Yii mei Yennu batnba nan binba kur tee yikoo damm na paak, a tii be nan laafia nan parmaasir, kii tee yentina, kii be soonna.

³ Ŋanne ŋan ki pent ti Tinntɔɔ Yennu par ni;

⁴ ŋɔɔe loon sɔɔ kur-n bann u maan nba tee barmɔnii ki wun tinnib;

⁵ kimaan Yen-yenɔkɔɔe be, ki sindantinnɔ tee yenɔkɔɔ ki be Yennu nan nisaarik sinsuuk ni; li yɔɔe tee Yisa Masia

⁶ wunba din jii u mɔŋ ki mann mannu ki tur sɔɔ kur na a wun nyinnib daabsin ni; ki bi mɔɔntir barŋanii maŋ yoo kur.

⁷ Li paak ki Yennu gannin ki n teen Masia toomii ki mɔɔntir barŋanii maŋ ki teen binba ki tee Juu teeb na, ki wannib ŋɔɔ Masia maan nba tee barmɔnii na, a bin teenɔ yada. Ma beeri linba na, n ki fa faak kaa, li tee barmɔniie.

⁸ N loon ki jab-ii mei Yennu siaminba kur. Jab nba set tee popeendamm ki ki mɔk wutoor amii mɔniɔk na sa fit donn bi nii sanpaapo kii mei Yennu.

⁹ N bia loon ki poob na mun-ii be kaman nan Yisaweira nba bo sii be biaŋinba na, ki bann chinchenbabu nan taliannu nba jaŋ nan Yisaweira na. Bi-i lorin bi yut nan kut nyinyirit, amii ki pir sarinbana amii laan nyinyirit nan tiat nba ki li daauk paar, linba na kan teemm fanti;

¹⁰ linba sa turib fant tee binbenŋaŋ kaman nan pooyentina nba bo sii be biaŋinba na.

¹¹ Poob-ii be soonna kii tumii nan mɔsaku kura.

¹² Min ki sak ki poosɔɔ-n wann jab, amii wuu mɔk yaak ki gar jabi; poo-ii be soonna;

¹³ kimaan Yennu din dɔŋ nan Adame sinsinn, ki li poorpowa ki u tan nan Adam ŋaapoo Iif.

¹⁴ Ki nyik nna, Sintaanii din fit kpann Iife ki u biir Yennu sennu, u din ki kpann Adami.

¹⁵ Ŋaan poo-i teen Yisa yada, kii loon niib, kii tee popeendaanɔ, kii be soonna, Yennu sa tinnɔ u maaru niwa.