1 Tesalonika teeb 5 - Yennu Gbounpaauŋ Mɔɔr

Teent siir ti Yomdaanɔ jenu po man

¹ Ti naa waas, li ki kpaa talas ki tin sɔb wanni yoo nba ki linba na tan sa tume,

² kimaan i mɔŋ poŋ mi fanu nan ti Yomdaanɔ jenu daar maŋ tan sii tee kaman nan nanyukɔɔ nba tuu baat nyiɔk biaŋinba nee.

³ Yoo nba ki niib tan sii yeen a “Parmaasir nan laafia be na,” li yoo maŋe ki biiru tan sa baarib yiama kaman nan matyiaru nba baat poo biaŋinba na, ŋaan bi tan kan fit fat bi mɔŋ li barbiiuk ni.

⁴ Ti naa waas, yimm ki be bunbɔnn ni kaa; li paak, li daar tan kii tee kaman nan nanyukɔɔ baaru na kaa i boor ni,

⁵ kimaan i tee yentu waase, ti ki tee nyiɔk yab kaa; ti ki be bunbɔnn ni kaa.

⁶ Li paak, ti daa dɔɔ gɔɔnt kaman nan nisiab nba tuun biaŋinba na, ŋaan tii nyɔi kii sub man,

⁷ kimaan binba gɔɔnt na gɔɔnt nyiɔko, ki binba nyu daan yib na mun yib nyiɔk.

⁸ Ŋaan timm nba ki tee nyiɔk yab na, tii sub man, ki jii yada nan loomm lia kaman nan naagbankɔŋŋir na, ki bia jii tinnu dindann ki yir kaman nan naagbankɔŋŋir na.

⁹ Kimaan Yennu din ki gannit a wun tan dat ti tuba kaa, ŋaan u gannit a tin la tinnu ti Yomdaanɔ Yisa Masia paak;

¹⁰ ŋɔɔe din gaar ti paak ki kpo, a ti-i lekii kpo amii ti-i be u jenu yoo maŋ, timm nan ŋɔɔ-n tan taan kii be.

¹¹ Li paak, yii kɔɔnt i leeb para ki somm i leeb kaman nan ya tuun biaŋinba mɔtana na.

Kpaanjoontii nan foontjoontii labaar

¹² Ti naa waas, ti barimiie a i baka-ii be binba tuun ti Yomdaanɔ toonn nani, ki tee i yudamm u sɔnu ni, ki teeni kpaanii.

¹³ Yii teemm nibaakir nan loomm nba yab, kimaan bi toona nba ki bi tuun na paak. I mɔŋ-ii be nan i leeb nan parmaasir man.

¹⁴ Ti naa waas, ti barimiie a yi kpaan gbannyakdamm, ki maŋ jaŋmaandamm para, ki somm tarii, ki di sukuru nan sɔɔ kura.

¹⁵ I kpan daa tuun biit ki jiint biit paaki, ŋaan yii te ki lii tee i lor yoo kur nan yin tun linba ŋan ki tur i leeb nan sɔɔ kur man.

¹⁶ Yii mɔk parpeenn yoo kur man,

¹⁷ kii mei Yennu yoo kur man,

¹⁸ kii teen Yennu niipoouk bonsiar kur ni, kimaan ŋanne tee Yennu nba loon biaŋinba, ya tee Yisa Masiaweira na paak.

¹⁹ I daa gɔi Yennu Seyeeŋ nba loon biaŋinba;

²⁰ i daa fiakit Yennu sɔkiniinba maami,

²¹ ŋaan yi tuu mintaa ki bikin bonsiar kur, ki gaar linba ŋan,

²² ki nyi biitbooru booru kura ni.

²³ Yennu nba teent parmaasir na tiauŋ-n teeni popeendamm ki gbenn, ki dia i sei nan i manfoa nan i gbanant mun, ki li daa mɔk biit ti Yomdaanɔ Yisa Masia jenu maŋ po.

²⁴ Yennu nba yiini na sa sak tun nna, kimaan u tee barmɔnii daanɔe.

²⁵ Ti naa waas, yii mei Yennu ki turit man.

²⁶ Yii foont Masiaweira na kura ki kpammii.

²⁷ Ti Yomdaanɔ sann ni ki n kpaani, yi karin gbouŋ na tur Masiaweira kur.

²⁸ Ti Yomdaanɔ Yisa Masia-n sommi.