1 Piita 5 - Yennu Gbounpaauŋ Mɔɔr

Kpaanii

¹ Yudamm nba be i sinsuuk ni, n kpaaniie, min wunba mun tee yudaanɔ, ki n ninbinn din la Masia nba din dii fara biaŋinba, ki n bia sa lakin di mant bonchiann nba tan sa nyi paanu ni na,

² n kpaaniie, yii guu Yennu niib nba be i nuu ni na, ki li daa tee miar kaa, ŋaan ki lii tee i yanbɔɔte, Yennu nba loon biaŋinba; ki li bia daa tee likirii paaki; ŋaan ki lii tee i kpan koor a i tume.

³ Daa mantik dia niib nba ki Yennu tura ki a diab na nan ninmɔnni, ŋaan te ki i binbenŋaŋ-n wannib ba sii be biaŋinba.

⁴ Ki Masia wunba tee yudamm kur yudaanɔ na-i taŋŋi jen, i sa la piinii nba kan biiri.

⁵ Nnee mun, yimm nba tee nipaauŋ, yii saak saakab mɔi; ki i kur-ii gaan leeb mɔi, ki i kur-n teen tarii i leeb boa, kimaan li sɔb Yennu gbouŋ ni a “Ŋɔɔ Yennu yêen karinbaandamme, ŋaan sommit binba sikint bi mɔŋ na.”

⁶ Li paak, yi sikin i mɔŋ ki teen Yabint Yennu nuu ni, ki u sa donni yoo nba ki u loon.

⁷ Jiin man i muksuk kur ki turɔ, kimaan u baka be i ni.

⁸ Yii dia i mɔŋ man, ŋaan kii mi i dataak nba tee Sintaanii na po; u line kaman nan yambɔr nee, ki loon wun la sɔɔ ki soor ŋman.

⁹ Yêtirɔ man, ŋaan set teen Masia yada fanu, kimaan i mi nan Masiaweira leeb nba be tingbouŋ na ni mun di fara kaman nan ya di biaŋinba nee.

¹⁰ Ŋaan li-i tee ki i di fara yoo waaminna, ki Yennu nba mɔk ninbatinu kur na sa ŋamm i binbeŋ, ki chee i para, ki turi paŋ; ŋɔɔe din yiini Masia paak a yii di u mant nba kaa gbennu na.

¹¹ Ŋɔɔe sii mɔk paŋ kura mɔkmɔk nan yoo nba kaa gbennu. Mɔmɔmm.

Foontii nba joont

¹² Sailas wunba ki n mi nan u tee Masiaweirɔ nan barmɔnii na, ŋɔɔe sommin ki n sɔb gbouŋ nba ki fɔk na a n chee i para, ki kpaani, a ŋannii tee Yennu maan nan barmɔnii. Li paak, yii diar fanu man.

¹³ I leeb nba be Babilɔnn ki Yennu din gannib na, bi foonti. N bik Mak mun foonti.

¹⁴ Yi foont i leeb nan loomm foontii. Parmaasir-ii be yimm nba kur tee Masiaweira na paak.