1 Piita 2 - Yennu Gbounpaauŋ Mɔɔr

Manfoor tann labaar

¹ Ŋannimi, yi nyik biit kur, nan faak kur, nan kpinkpannii, nan funfunn, nan sanjaauŋ.

^2-3 I poŋ la nan ti Yomdaanɔ ŋane, li paak, yii loon Yennu mɔmaan man kaman nan sanpantik nba loon biin biaŋinba na; kimaan maan maŋ sa te ki yin kpaat tinnu sɔnu ni.

⁴ Baat u boor man; ŋɔɔe tee manfoor tann nba ki niib yêtɔ, ŋaan ki Yennu gannɔ ki u ŋan bonchiann na.

⁵ Ŋaant man ki Yennu-n jii-i ki yi teen kaman nan manfoor tana na ki wun maa ŋaak nba ki u Seyeeŋ sii be li ni; ki i sii tee Yennu mɔŋ mɔŋ toontunna a yii tuun u toonn nan u Seyeeŋ paŋ, ki u sa gaar li toonn Yisa Masia paake;

⁶ kimaan li sɔb Yennu gbouŋ ni a u yet a “Gotir, n gann tann ki bir Sion doo ni, ki li tee lɔtik ni tann, ki bia ŋan bonchiann, ki wunba kur teenɔ yada, u kan di fei.”

⁷ Yimm nba teenɔ yada na mi nan u ŋan bonchiann ki turi; ŋaan binba ki teenɔ yada, bii mi nan li sɔb Yennu gbouŋ ni a “Tann nba ki tanmaara yêtɔ na, ŋanne set tee lɔtik ni tanŋann.”

⁸ Li bia sɔb a “Tann maŋe ki niib sa gbiat, tanpiiuk maŋe sa te ki niib-n baa.” Ba ki sak Yennu mɔmaan paake ki bi gbiatir kaman nan wa din sennib biaŋinba na.

⁹ Ŋaan yimm ŋanin tee Yennu nigannkabe, ki bia tee u naan ni niib binba jiantirɔ, ki bia tee nibooru nba tee popeendamm, ki bia tee u tiauŋ niib, ki yii mɔɔntir u burchintuk po, ŋɔɔ nba nyinni bunbɔnn ni, ki baar nani u bakitnauŋ yentu ni.

¹⁰ Sianyoo i din ki tee Yennu niibi, ŋaan mɔtana i set tee u niibe; sianyoo u din ki tini ninbaauku, ŋaan mɔtana u tini ninbaauka.

Yennu daaba labaar

¹¹ N naa walonkai, ya tee saamm tingbouŋ na ni na, n kpaaniie a yi nyik gbanant loonbiit nba kɔn nan i sei na,

¹² ŋaan kii be fanu tingbouŋ na niib sinsuuk ni, ki li-i tee ki bi sukii-i a i tee biitdamm, bi sa la i toonŋana ki dont Yennu, daar nba ki u tan sa baar na.

¹³ Ti Yomdaanɔ paak, i saak man yentdamm mɔi; yii saak wunba tee yent kur daanɔ mɔb;

¹⁴ wa senn sennudamm a bin dat binba tuun toonbiit na tuba, ŋaan kii guu binba tuun toonŋana, yii saak bi mɔi mun.

¹⁵ Kimaan Yennu loommu tee a yii tuun toonŋana ki gɔɔr jatdamm maan nba ki mɔk nyɔɔti.

¹⁶ I be nan yentinmɔŋ binbeŋ; ŋaan i daa dia i yentinmɔŋ binbeŋ na ki li teeni yaak ki i tuun toonbiiti, ŋaan kii mɔk Yennu daaba binbeŋ.

¹⁷ Yii teen sɔɔ kur nibaakir, kii loon Masiaweira, ŋaan tin Yennu, kii teen yent kur daanɔ nibaakir.

¹⁸ Yimm nba tee toontunna, yii saak i yudamm mɔi ŋaan bia kii teemm nibaakir, ki li ki tee niŋamm kuukɔɔ kaa, ŋaan nan binba tee nibiita gbaa.

¹⁹ Li-i tee ki a la tubdatu a toonŋana paak, ki a dukii Yennu po ki di sukuru, ŋanne sa penn u par;

²⁰ ŋaan fi-i tun biit ki bi dat a tubir, ki a gaar tubdatu na soonna, nlee ki bi sa pakani? Ŋaan fi-i tun linba ŋan ki gaar tubdatu li paak soonna, nee sa penn Yennu par.

²¹ Ki Yennu din yiinit a tii di fara, kimaan Masia tiauŋ din di fara ti paak, a tii gotir u binbeŋ kii waa u taapauŋ.

²² U ki tun biit gbaa; sɔɔ bia ki mi gbat ki faak nyii u mɔb ni.

²³ Ba din sukiiɔ, u din ki jiin sukiti; wa bia din be fara ni, u ki jeen sɔɔ, ŋaan din jii u mɔŋ ki teen Yennu wunba bu niib buut fanu na nuu ni.

²⁴ Ŋɔɔ Masia mɔŋ mɔŋe din jii ti toonbiit u gbanant ni, ki bi kpaau dapunpunn paak, a tin nyi biit ni ŋaan tee niŋamm. U daŋ paake ki i la laafia.

²⁵ I din tuu tee kaman nan pebotkai nee, ŋaan mɔtana i jen i kpaarik wunba guu i sei na boora.