1 Korint teeb 14 - Yennu Gbounpaauŋ Mɔɔr

Seyeeŋ piinii labaar biak

¹ Yii loon loomm ki gar bont kur; ŋaan kii biakii loon Yennu Seyeeŋ piinii nan ninmɔnjar; ŋaan kii mantik-ii loon piinii nba tee barsɔkinu.

² Wunba piak barganii nba ki Yennu seyeeŋ wannɔ na, u piak teen Yennue, u ki piak teen niib kaa, kimaan sɔɔ ki bant li paak, wa piak woonin ni maan Seyeeŋ paŋ po na;

³ ŋaan wunba sɔkint Yennu maan ki teen niib, u teemm paŋe, ki kɔɔntib para, ki bia teemm parpeenn.

⁴ Wunba piak barganii, u sommit u mɔŋ kuukɔɔe; ŋaan wunba sɔkint Yennu maan, u sommit Masiaweirae.

⁵ N loon ki sɔɔ kur-ii piak barganii, ŋaan n bia mantik loon ki i kura-ii sɔkint Yennu maan. Wunba sɔkint Yennu maan, li mɔk nyɔɔt ki gar wunba piak barganii, see ki sɔɔ be ki fit kpint maan na ki wann Masiaweira ki lin sommib.

⁶ N naa waas, mi-i baar i boor ki tan piak barganii, somm lanne ki n sommitiini? Sommir kaa; see ki n baar ki fiit bona nba nyii Yennu boor ki wanni, amii yan, amii ki sɔkin Yennu maan ki turi, amii wannu.

⁷ Li-i lekii tee bona nba ki mɔk manfoor kaman nan yerik amii biauk nna, ki li ki tee a li mɔ kɔɔt kɔɔt ŋaan lakin taan mɔyomm, a sa teen nlee ki bann yerik mɔnii nan biauk mɔnii?

⁸ Wunba faa tinpanii ŋaan ki faa nan ninmɔnn faanu, ŋmee sa teen siir nan tabu?

⁹ Nnee mun, li-i tee ki i piak barganii, nlee ki bi sa bann ya piak linba; li paku sii tee yanne; see ki i piak linba ki bi sa fit bann li paak.

^10-11 Mabooru bonchiann be tingbouŋ na ni, ŋaan li kur mɔk paake. Ŋann ki mi-i kii mi maan paak, n tee saamɔe ki tur wunba piak nanin na; ki wunba mun piak teenin na mun tee saamɔe n boor.

¹² Ya set loon Seyeeŋ piinii na, yii loon piinii nba sa somm Masiaweira.

¹³ Wunba piak barganii, wuu mei Yennu wun te ki wun fit sɔkin linba ki u piak maŋ.

¹⁴ Mi-i mei Yennu nan barganii ni, n seek nee mei, ŋaan n yan kaa leŋi.

¹⁵ Ki n sa teen nlee? N sa miar Yennu nan n seeke, ki bia miarɔ nan n yan ni; ki yin yanii ki tur Yennu nan n seek, ki bia yin yanii nan n yan ni.

¹⁶ Fi-i jii barganii ki mei Yennu nan u Seyeeŋ paŋ ni, ki nirɔ nba ki a be nanɔ na ki mi fa yeen linba, u sa teen nleewa ki sak a Yenmiaru na a li tee mɔmɔmme?

¹⁷ A Yenmiaru na lek ŋan, ŋaan li ki mɔk sommir ki tur sɔɔ.

¹⁸ N tur Yennu niipoouk nan ma piak barganii ki gar i kur na;

¹⁹ ŋaan mi-i be Masiaweira sinsuuk ni, n sii loon ma n pak mɔbona ŋaŋŋmu nba mɔk paak ki lin somm leeb na, ki gar ma sa pak mɔbona tusir barganii ni.

²⁰ N naa waas, i daa dia bisin ni dudukiti, ŋaan biit ni, yii tee kaman nan sanpantii nee; ŋaant man ki i dudukit-ii tee subintɔɔ dudukit.

²¹ Li sɔb Yennu gbouŋ ni a u yet a “N tan sa tun nisiab bin nyi siarpo ki tan pak barganii ki tur n niib, ŋaan bi lek kan gbat li paaki.”

²² Li paak, barganii tee nyinne ki tur binba ki teen Masia yada na, li ki tee binba teenɔ yada na kaa. Ŋaan sɔkinii maan tee wannu ki tur yada damm, ki li ki tee binba ki teen Masia yada na kaa.

²³ Masiaweira kur-i lakin leeb, ki sɔɔ kur piin piak barganii, ki binba ki tee Masiaweira amii binba ki bann li po tan kɔɔ, bi kan yet a i waatee?

²⁴ ŋaan Masiaweira-i lakin leeb, ki bi gaan Yennu maan ki sɔkint teen niib, ki wunba ki tee Masiaweirɔ amii wunba ki bann li po tan kɔɔ ki gbat ba sɔkint linba na, ŋanne sa te ki wun bann u biit ki bu u mɔŋ buut,

²⁵ ki u sa bann u woonin ni dudukit ki li dɔɔ yeenin ni, ki u sa gbaan ki pukii Yennu ki bet a “Mɔmɔmm, Yennu be nani.”

Masiaweira nba sii jiantir Yennu biaŋinba

²⁶ N naa waas, n ji sa yet a bia? Li-i tee ki i lakin leeb a yi jiant Yennu, ki sɔɔ mɔk yaŋ, ki sɔɔ mɔk wannu, ki sɔɔ mɔk mafiit kar ki sa wann, ki sɔɔ mɔk barganii paku, ki sɔɔ mun mɔk barganii maŋ kpintu; yi teen linba na kur ki lin somm Masiaweira.

²⁷ Bi-i loon bin pak barganii, bi daa gar niib bannlee amii banntaa, bii piak yenɔ yenɔ ŋaan ki sɔɔ mun-ii kpintir li paak yenn yenn.

²⁸ Wunba sa fit kpint li paak na-i kaa, wunba piak barganii na-n ŋmin Masiaweira na sinsuuk ni, ŋaan pak ki tur u mɔŋ nan Yennu.

²⁹ Ŋaant man ki sɔkiniinba bannlee amii banntaa-n pak, ki binba biar na-n got maan na ni.

³⁰ Ŋaan li-i tee ki sɔɔ be i sinsuuk ni ki tan loon wun sɔkin Yennu maan, wunba bo piak na-n ŋmin.

³¹ I kur sa fit ki sɔkin Yennu maan yenɔ yenɔ, a i kur-n tumii ki lii kɔɔnti para.

³² Yennu sɔkinii sa fit soor u mɔŋ yoo nba ki li baarɔ;

³³ kimaan Yennu ki yiinit a tii tee kpir kpir; ŋaan kii tee soonna.

³⁴ Poob-n ŋmin bi mɔi soonna Masiaweira sinsuuk ni kaman nan la tee biaŋinba Masiaweileeb kur sinsuuk ni na. Yaak kaa ki bi sa pak, kaman nan Yennu sennu nba wann a bi ki mɔk yaak bin pak siar amii ki teen yudamm na.

³⁵ Siar-i be ki bi loon bin boi bann, bin boi bi sɔrib ŋei niwa. Li tee feie ki poo-n pak Masiaweira tintaankaanu sinsuuk ni.

³⁶ Labaarii? Yennu mɔmaan na nyii i boorii? li baar i kuukɔɔ booree?

³⁷ Wunba mi nan u tee Yennu sɔkinii amii ki mɔk Yennu Seyeeŋ piinii, wun bann nan linba ki n sɔbin ki teeni na tee ti Yomdaanɔ sennue.

³⁸ Ŋaan wunba ki gbat, i mun daa gbia u yari.

³⁹ Li paak, n naa waas, yii loon ki i sɔkin Yennu maan, ki daa yêen barganii paku.

⁴⁰ Ŋaant ki bont kura-n tun bonŋann ki wei leer paak.